ރީތި ދޮންވެލި ގޮނޑުދޮށުގައި ބީއްސައިލަމުންއެދާ ރާޅުތަކުގެ ޙަރަކާތްތަކަށް ބަލަހައްޓައިގެން ދޮންބެއްޔާ ފިކުރެއްގެ ތެރެޔަށް ގެއްލިފައި އިނެވެ. ރާޅުއަރަމުން އެދާ ހިސާބުން ކުޑަތަންކޮޅެއް މައްޗަށް އެރިނަމަވެސް ގޮނޑުދޮށުގައި އެކިވަރުގެ ކަކުނި ކޮނެ އޭތީގެ ރައްކައުތެރިކަމާއި ޙިމާޔަތް ހޯދައިގެން ފިލާތިބި ކަކުނީގެ ހޮރުތައް ނެތިދާނެއެވެ. ކަކުނި ހޮރު ކޮނެފައިވަނީ އެކަކުންޏެއްގެ ވަރުންނެވެ. ވަރަށް ކުދި ހޮރާއި ބޮޑެތި ހޮރުތައް ހުށްޓެވެ. ކުދިހޮރު ކުދިކުދި ކަކުންޏަށެވެ. ބޮޑެތި ހޮރު ބޮޑެތި ކަކުންޏަށެވެ.
ދޮންބެއްޔާ ކަނޑުގެ ލޮނުގަނޑަށް ބަލައިލިއެވެ. އެއީ ދިޔަވަރު ހިކެމުންދާ ގަޑިޔެވެ. އެހެންކަމުން ގޮނޑުދޮށަށް ބީހިމެންދާ ރާޅުތައް މިހާރު އަރަމުން އެދާ ވަރަށްވުރެ މައްޗަކަށް ނުދާނެއެވެ. އެހެންކަމަށް ވަންޏާ ކަކުނިތައް އެސޮރުމެންގެ ޙިމާޔަތަށް ކޮނެ ވަދެ ރައްކާތެރިކަން ހޯދާފައިވާ ހޮރުތައް ސަލާމަތުން ހުންނާނެއެވެ. ނަމަވެސް އެހޮރުތައް ސަލާމަތުން ހުންނާނީ އިރުކޮޅަކަށެވެ. ބޮޑުދިޔައިގާ އަންނަ ރާޅުތަކުގެ ޝިކާރަޔަކަށް އެސޮރުމެންގެ ހޮރުތައް ވާނެއެވެ. އޭގެކުރިން އެސޮރުމެން އެސޮރުމެންގެ ސަލާމަތް ހޯދާނެއެވެ. އެއީ ދުނިޔެ ހިނގާގޮތެވެ.
ދޮންބެއްޔާ އޭނާގެ ނަޒަރު ، ކަނޑުގެ ޞަތަޙައިން މައްޗަށް އުފުލައިލިއެވެ. އިސް އުފުލައިލުމުން ދޮންބެއްޔާއަށް ފެނުނީ އަޞުރުން ތިރިވެފައިހުރި ހަނދެވެ. ހަނދު އެދަނީ އޮއްސޭށެވެ. އެޔެއް ނުހުއްޓުވޭނެއެވެ. އެކަމަކު ހަނދު އެހުރީ ހުޅެވި ހަނދެއްގެ ގޮތުގައެވެ.
ދިޔަވަރު ހިކި އަދި ބޮޑުވުމަށް ބަދަލުގެންނަ މައިގަނޑު އެއްޗަކީ ހަނދެވެ. އެހެނަސް އިރަކީވެސް ދިޔަވަރަށް ބޮޑެތި ބަދަލުތަކެއް ގެންނަ އެއްޗެކެވެ. ހަނދު ބޮޑުކޮށް ފެނުނީމަ ދިޔަވަރު ބޮޑުވަނީ ، ހަނދާއި އިރުން އެއްފަހަރާ ބިމަށް ގްރެވިޓީ ފޮނުވާތީއެވެ. ހަނދާއި ދިޔަވަރާ ގުޅިފައި އޮންނަނީ ހަނދަކީ އިރަށްވުރެ ބިމާކައިރި އެއްޗަކަށް ވާތީއެވެ.
ހަނދު ދައުރުކުރަނީ ބިމާ އެއްމިސްރާބަކަށެވެ. ބިމަށް މިފެންނަނީ ހަނދުގެ އެއްފަރާތެވެ. އެއީ ހަނދުގެ ކައިރިފަރާތެވެ. ހަނދުގެ ދުރުފަރާތް ބިމަކަށް ނުފެންނާނެއެވެ. އެއީ ހަނދާއި ބިން އެއްމިސްރާބަކުން ދައުރުވާތީއެވެ. ބިމަށް ދަތުރު ކުރެވެނީ ހަނދަށްވުރެ ލަހުންނެވެ. ހަނދާ އަރާ ހަމަކުރަން 50 މިނިޓްގެ ވަގުތެއް ބިން ، ނަގައެވެ. 24 ގަޑިއިރެއްގެ ތެރޭގައި ދެފަހަރަށް ދިޔަވަރު ބޮޑުވެފައި ހިކެއެވެ. އެއިން ކޮންމެ ދިޔަވަރު ބޮޑުވުމެއްގެ ދެމެދުގައި 12 ގަޑިއާއި 25 މިނިޓްގެ ވަގުތު ނަގައެވެ.
ހަނދު ފެންނަ ފަރާތުގައި ދިޔަވަރު ހިކޭނެއެވެ. އަދި ހަނދު ދުރުފަރާތުގައި ދިޔަވަރު ބޮޑުވާނެއެވެ.
ދޮންބެއްޔާއަށް މިވަގުތު އެފެންނަނީ ހަނދު އޮއްސެންދާތަނެވެ. ހަނދު އޮއްސުމާއެކު ދިޔަވަރު ބޮޑުވާން ޖަހާނެއެވެ. އޭރަށް ރާޅުބޮޑުވެ ގޮނޑުދޮށަށް ބީއްސާލާ ރާޅުތައް ކަކުނި ހޮރުތަކާހަމަޔަށް އަންނާނެއެވެ. އެހެންކަމުން ކަކުންޏަށް އެސޮރުމެންގެ ހޮރުތަކުގައި ސަލާމަތުން ތިބެން އެލިބެނީ 12 ގަޑި 25 މިނިޓެވެ.
ދޮންބެއްޔާ އިރަށް ބަލައިލިއެވެ. އިރުހުރީ މެދުޖެހޭ ހިސާބުގައެވެ. އިރުކޮޅަކުން އިރުވެސް މެންދުރުން އަނބުރައި އޭގެ އޮއްސުމާ ކުރިމަތިލާނެއެވެ. އޭރު ހުންނާނީ ހަނދުވެސް އޮއްސިފައެވެ. އިރުއޮއްސި އަނދިރިވިޔަސް ހަނދެއް ނުފެންނާނެއެވެ. ހަނދުގެ އަލިކަމެއް ނުހުންނާނެއެވެ. ހަނދުގެ އަލިކަން ލިބޭނީ ދުނިޔެ ބުރެއްޖަހައި އަލުން ހަނދު އެރީމައެވެ. އެއީ ދުނިޔެ ހިނގާގޮތެވެ.
ދުނިޔެ ހިނގާގޮތް ބަދަލެއް ނުކުރެވޭނެއެވެ. ދުނިޔޭގައި ދިރިއުޅެވޭނީ ދުނިޔެ ހިނގާގޮތަށް ތަބާވެގެންނެވެ. ދުނިޔެ ހިނގާނީ އިންސާނާ ބޭނުންވާހާ ގޮތަކަށްނޫނެވެ. ދުނިޔެއަކީ ، ﷲ ގެ ކުޅަދުންވަންތަ ކަމާއެކު ، ޤުދުރަތުގެ ނިޒާމަކުން ތަރުތީބުވެގެން ހިނގާ އެއްޗެކެވެ. ދުނިޔެ ހިނގާގޮތަށް އުޅެން ނޭނގިއްޖެމީހާއަށް ދުނިޔެ އުޅުން ދަތިވާނެއެވެ.
