ފަޓާސް ، މިއަޑެއް މިހާރަކު ރާއްޖެޔަކުން ނުއިވެއެވެ. ފަޓާހެއް ނުވެސް ފެނެއެވެ. ރާއްޖެއިން ފަޓާހުގެ ކުޅިވަރު ދުށްމީހަކު މިހާރު ވަރަށް މަދުވާނެއެވެ. އެހެންޤައުމަކުން ، ޚާއްޞަކޮށް ، އިންޑިއާގެ ޓަމިލްނާޑޫގެ ސިވަކާސީން މިހާރުވެސް ފަޓާސް ފެނިދާނެއެވެ.
ރާއްޖެއިން ފަޓާސް ނުފެންނަނީ ، ރާއްޖެޔަށް ފަޓާސް އެތެރެކުރުން މަނާކުރެވުނީމައެވެ. ދޮންބެއްޔާ ހަނދާންވާގޮތުގައި ރާއްޖެއަށް ފަޓާސް އެތެރެކުރުން މަނާކުރެވުނީ 1988 ގައެވެ. ކޮންމެ ސަބަބަކާހުރެ ނަމަވެސް ފަޓާސް އެތެރެކުރުން އެއޮތީ މަނާކޮށްފައެވެ. އެއީ ކަމަކަށްވެގެން މީހުންނެއް ނޫޅެއެވެ. ވަގަށް ފަޓާސް އެތެރެކުރާކަށް ނޫޅެއެވެ. ފަޓާހާ ނުލައި ނޫޅެވިގެން އުޅޭތަނެއް ނުފެނެއެވެ.
ދުނިޔޭގެ ވަރަށްގިނަ ޤައުމުގައި ، ފަޓާހަކީ މަނާއެއްޗެކެވެ. ނުވަތަ ވަކިމިންވަރެއްގެ ހުރަހަކާއި ހުއްދައަކާއެކީ ބޭނުންކުރެވޭ އެއްޗެކެވެ.
ޕްލާސްޓިކް ކޮތަޅުވެސް ، އެއީ ގެއްލުންހުރި އެއްޗެއްކަމަށްވަންޏާ އެތެރެކުރުން މަނާކުރަންވީ ނޫންތޯއެވެ ؟ ޕްލާސްޓިކް ކޮތަޅާނުލައި ދިވެހިންވަނީ ބާޒާރުވެސް ކޮށްފައެވެ. ގޮދަންފުށު ތެރަސްލައިގެން ކަރުދާހުން ގޮށިހަދައިގެން " ޒިއުރިކް " ފަދަ ފިހާރަތަކުން ހަކުރާއި ފުށާ އަދި ހަނޑޫ ގަންނަ ހަނދާން ދޮންބެއްޔާ އަދިވެސް އެބަހުއްޓެވެ. އެއީ ސާޅީހަކަށް އަހަރު ކުރިއެވެ. އެހެނަސް ، ޕްލާސްޓިކް ކޮތަޅެއް ނުފެނެއެވެ. ގިރާވަރު މީހުންނަކީ ޅ ގެ ބަދަލުގައި ރ ކިޔޭ ބަޔެކެވެ. އެމީހުންވެސް ، ކޮތަރެއް ހޯދާކަށް އެއިރަކުވެސް ނޫޅެއެވެ. ކަރުދާހު ގޮށިން ނުވަތަ ފޮތި ކޮތަޅަކުން އެކަމެއް ހަމަޖައްސައިލައެވެ. މިހާރުވެސް އެއަށްވުރެ މާމޮޅަށް އެކަން ހަމަ ނުޖެއްސެންވީ އެއްވެސް ސަބަބެއް ނެތެވެ. ކޮންމެހެން ގޮދަންފުށު ތެރަހުން ކަރުދާހުން ގޮށި ހަދާކަށް ނުޖެހޭނެއެވެ. އެއަށްވުރެ މާ އީޖާދީ ޒަމާނީގޮތްތައް މިހާރު ހުންނާނެއެވެ.
ދުނިޔޭގެ ސަތޭކައަށްވުރެ ގިނަ ޤައުމުގައި ޕްލާސްޓިކް ކޮތަޅު ބޭނުންކުރުން މަނާކުރުން ނުވަތަ މަދުކުރުން ނުވަތަ ބޭނުންކުރުން މަނާކުރުމުގެ ފިޔަވަޅުތައް އަޅަމުން އެބަގެންދެއެވެ. މިކަން ފެށުނީ 2010 އާއި 2019 އާ ދެމެދުގައެވެ. އެ މުއްދަތަކީ ދިވެހި ސިޔާސީ މަޝްރަޙުގައި ތިމާވެށްޓަށް މާބޮޑު ސަމާލުކަމެއް ދެވިފައިއޮތް ދުވަސްވަރެއް ނޫނެވެ. އެއަށްވުރެ ސިޔާސީ ކޯޅުން މާ ގަދަ ދުވަސްވަރެކެވެ. މުޅިންވެސް އުޅެންޖެހުނީ އާކުކުޅަށް ގާބިސް އެޅިގެންނެވެ. ލިބިގެންދިޔަ ސިޔާސީ އާރާއިބާރު މުށުތެރެޔަށް ނުލެވިގެންނެވެ. އަދި އަތުގައި ހޭކެމުންދިޔަ ރައްޔިތުންގެ ފައިސާ ދަތުގައި ހޭކޭނެގޮތެއް ނުފެނިގެންނެވެ. ޤައުމުގެ ލާބައާއި މަންފާއަށް ވިސްނައިލާނެ ސިކުންތެއްވެސް ނުލިބެއެވެ. ފައިސާއާއި ބާރުފިޔަވައި އެހެން އެއްޗެއް ބޮލުތެރެޔަކަށް ނުވެއްދެއެވެ.
މިއަދުގެ ސަރުކާރުން ޑިސެމްބަރ 2022 ގައި އެވަނީ ، ބާޒާރުކުރަން ބޭނުންކުރާ ޕްލާސްޓިކް ކޮތަޅުން ދެރުފިޔާ ނަގަން ޤާނޫނެއް ފާސްކޮށް ޢަމަލުކުރަން ފަށާފައެވެ. އެއީ އުފެދުމުގައިވެސް ހަމަނުޖެހޭ ކަމެކެވެ. އެބިލާމެދު ރައްޔިތުންގެ މަޖިލީހުގައި ބަހުސްކޮށް ، ފާސްކޮށް ، ރައީސުލްޖުމްހޫރިއްޔާ އެބިލް ތަސްދީޤު ކުރެއްވުމުން ، ޤާނޫނަކަށް ބަދަލުވެ ، އެއްމަސްފަހުން ޢަމަލުކުރަން ފެށުނުއިރު ، އެއީ އެހާ ހަމަޖެހޭ ބިލަކަށް ނުވަތަ ޤާނޫނަކަށް ނުވިއެވެ. އެކަން އެނގުނީ ވާނެއެއްޗެއްވީ ފަހުންނެވެ. އެހެންކަމުން އަނެއްކާވެސް މަޖިލީހުގައި އެޤާނޫނާމެދު ބަހުސްކުރަންވަނީ ފަށްޓާފައެވެ. ޕްލާސްޓިކް ކޮތަޅަށް ދެންވާނެގޮތެއް ހަމަ ، ނޭނގެއެވެ.
ޕްލާސްޓިކް ކޮތަޅު ރާއްޖެ އެތެރެކުރުން މަނާކޮށްގެން ޤައުމަށް ފައިދާއެއް ލިބެން އޮއްވައި އެކަން ނުކުރަންވީ އެއްވެސް ސަބަބެއް ނެތެވެ. ޕްލާސްޓިކް ކޮތަޅު މަނާކޮށްގެންނޫނީ ޕްލާސްޓިކާ ނުލައި އުޅެން އުނދަގޫ ވާނެއެވެ. އަދި ޕްލާސްޓިކްނޫން އެހެން އެއްޗެއް ހޯދުމަށް ބޭނުމެއް ނުވާނެއެވެ. ޕްލާސްޓިކް ކޮތަޅު ގެންގުޅުން މަނާވިޔަސް އެއީ ދޫކޮށްލަން އުނދަގޫވާނެ އެއްޗެއްނޫނެވެ.
ފަޓާސްވެސް ރާއްޖެ އެތެރެކުރުން މަނާކުރީއެވެ. އެކަމަކު ފަޓާސް ނުޖެހިޔަސް ، ވަކި ޤަވާޢިދެއްގެ ދަށުން ހަވާ އެބަ އަރުވައެވެ. ޕްލާސްޓިކް ކޮތަޅުވެސް ރާއްޖެ އެތެރެކުރުން މަނާކުރަންވީއެވެ. އެއީ ރާއްޖޭގެ ތިމާވެށްޓަށް ވަރަށް މުހިންމު ކަމެކެވެ. ޕްލާސްޓިކް ކޮތަޅު އެތެރެކުރުން މަނާވީމަ ، ބަޒާރުކުރާ މީހުންނާއި ފިހާރަވެރިން ، ޕްލާސްޓިކް ކޮތަޅުގެ ބަދަލުގައި އެހެންގޮތްގޮތް ހޯދާނެއެވެ. އިރާދަކުރެއްވިއްޔާ ، އެއީ ކުރިޔަށްވުރެ އެތައް ގޮތަކުން ރަނގަޅު ގޮތްގޮތަށް ވާނެއެވެ. ފިޔަވަހި ފަހަނައަޅައި ކުރިޔަށް ކަނޑަން އުނދަގޫ ބައެއްކަންކަން ދުނިޔޭގައި ހުންނާނެއެވެ. އަދި އެއްބުރުން ، އެއްފަހަރުން ނިންމަންޖެހޭކަންކަންވެސް ހުންނާނެއެވެ. ކުރާކަމެއްކުރަން ނިކުންނަންވާނީ ނިކަން ކެރިގެންނެވެ.
