(4 އޭޕްރީލް 2023 ގައި ޝާއިއުކުރި ބަޔާ ގުޅޭ)
ބިމުން ފެން ހިނދުމާއެކު ، ނޫޙުގެފާނުގެ ނާކޮޅުވެސް ފަރުބަދައެއްގެ މައްޗަށް ބީހުނެވެ. އެއީ ކީރިތި ޤުރުއާނުގައި ބަޔާންކުރެވިފައި އޮންނަ ، ޖޫދިއްޔި ފަރުބަދައެވެ. ކީރިތި ޤުރުއާނުގެ ހޫދު ސޫރަތުގެ 44 ވަނަ އާޔަތުގައި ، ﷲ ސުބްޙާނަހޫ ވަތަޢާލާ ވަޙީކުރައްވައި އަންގަވައިފާ ވެއެވެ.
وَغِيضَ الْمَاءُ وَقُضِيَ الْأَمْرُ وَاسْتَوَتْ عَلَى الْجُودِيِّ
" އަދި ، އެންގެވިއެވެ. އޭ ބިމާއެވެ ! ތިޔަބިމުގެ ފެންގަނޑު ދިރުވައިލާށެވެ ! އަދި ، އޭ އުޑާއެވެ ! ވެހުން ހުއްޓައިލާށެވެ ! ދެން ފެންގަނޑު ހިނދިއްޖެއެވެ. އަދި ، ( އެއުރެން ހަލާކުވެދިއުމުގެ ) ކަންތައް ވެނިމިއްޖެއެވެ. އަދި ، ޖޫދިއްޔި ފަރުބަދައިގެ މައްޗަށް ، އެ ( ނާކޮޅު ) ބީހި ހަމަޖެހިއްޖެއެވެ "
އެ ފަރުބަދަޔަކީ ، ޖަޒީރަތު އިބްނު ޢުމަރުގެ އިމުގެ ތެރޭ ނުވަތަ އެތާކައިރީގައި އޮންނަ ފަރުބަދައިގެ ޖޫދިއްޔި ނުވަތަ ޤަދްރު އެވެކިޔާ ހިސާބެވެ. އެއީ މިޒަމާނުގެ ، ސީރިއާއާއި ޢިރާޤާ އިންވާ ތުރުކީގެ ދެކުނު އިރުމަތީ ބިތުގައި އޮންނަ އުސް ފަރުބަދައެކެވެ. ނޫޙޫގެފާނުގެ ނާކޮޅުގެ ސައިޒެއްކަމަށް ތާރީޚީ ޢިލްމުވެރިން ލަފާކުރައްވަނީ ، ދިގުމިނުގައި 144.6 މީޓަރު އަދި ފުޅާމިނުގައި 24.1 މީޓަރު އަދި އުސްމިނުގައި 14.46 މީޓަރެވެ. މިއީ މިޒަމާނުގެ އާދައިގެ މުދާ އުފުލާ ބޯޓަކާ އެއްވަރުގެ މިނެކެވެ.
ޖޫދިއްޔި ފަރުބަދަމައްޗަށް ، ނާކޮޅުބީހުމާއެކު ، ﷲ ސުބްޙާނަހޫ ވަތަޢާލާ ، ނޫޙުގެފާނަށް އަންގަވައި ވަޙީ ކުރެއްވިއެވެ.
ކީރިތި ޤުރުއާނުގެ ހޫދު ސޫރަތުގެ 48 ވަނައާޔަތުގައިވާ ފަދައިންނެވެ.
قِيلَ يٰنُوحُ ٱهْبِطْ بِسَلاَمٍ مِّنَّا وَبَركَاتٍ عَلَيْكَ وَعَلَىٰ أُمَمٍ مِّمَّن مَّعَكَ وَأُمَمٌ سَنُمَتِّعُهُمْ ثُمَّ يَمَسُّهُمْ مِّنَّا عَذَابٌ أَلِيمٌ
" އެންގެވިއެވެ. އޭ ނޫޙުގެފާނެވެ ! ތިމަންރަސްކަލާނގެ ޙަޟުރަތުން ، އަމާންކަމާއެކު ، އަދި ކަލޭގެފާނާއި ، ކަލޭގެފާނުގެ އަރިހުގައިވާ މީޙުންގެ ތެރެއިން އުފެދޭ އުއްމަތްތަކަކަށް ބަރަކާތާއެކު ( ނާކޮޅުން ) ފައިބައިވަޑައިގަންނަވާށެވެ ! އަދި ، އުއްމަތްތަކެއް ވެއެވެ. ތިމަންރަސްކަލާނގެ އެއުއްމަތްތަކަށް ( ދުނިޔޭގައި ) އުފަލާއި އަރާމު ދެއްވާހުށީމެވެ. ދެން ، ތިމަންރަސްކަލާނގެ ޙަޟުރަތުން ، އެއުރެންނަށް ވޭންދެނިވި ޢަޒާބެއް އައިސް ޖެހޭނެތެވެ. "
ﷲ ގެ ޙަޟުރަތުން ، އެންގެވިގޮތުގެމަތިން ، ނޫޙުގެފާނާއި އެކަލޭގެފާނާއެކުގައިވާ މީސްތަކުން ނާކޮޅުން ފޭބިއެވެ. އަދި ނާކޮޅުގައިވާ އެންމެހައި ޖަނަވާރާއި ދޫނިސޫފާސޫފި ބިމަށް ދޫކޮށްލެވުނެވެ. އެއީ ފެހިކަން ގަދަ ތަނަވަސް ބިމެކެވެ. ނޫޙުގެފާނު ނާކޮޅުން ފައިބައިވަޑައިގެން ، ﷲ ގެ ރަޙުމަތްފުޅާއި މިންވަރުފުޅަށް ޝުކުރު ވެރިވެވަޑައިގެން ބިންމަތީ ސަޖިދަ ޖެއްސެވިއެވެ. ނޫޙުގެފާނުގެ ޤައުމުގެ މީސްތަކުން ، ﷲ ގެ ޙަޟުރަތަށް ޙަމްދާއި ޝުކުރުކޮށް ، އެދުވަހަކީ އެބައިމީހުން ރޯދަޔަށް ތިބޭ ދުވަހެއްކަމުގައި ނިންމިއެވެ. ނޫޙު ޢަލައިހިއްސަލާމާ ސީދާ މުޚާޠަބުކުރައްވާ ، ކީރިތި ޤުރުއާނުގެ މޫރިތި 47 އާޔަތް ، ބާވައިލައްވާފައި ވެއެވެ. އެއާޔަތްތަކަކީ ؛
އާލްޢިމްރާން ސޫރަތުގެ 33 ވަނަ އާޔަތް
إِنَّ ٱللَّهَ ٱصْطَفَىٰ آدَمَ وَنُوحاً وَآلَ إِبْرَاهِيمَ وَآلَ عِمْرَانَ عَلَى ٱلْعَالَمِينَ
" ހަމަކަށަވަރުން ، ﷲ ، އާދަމުގެފާނާއި ނޫޙުގެފާނާއި ، އިބްރާހީމުގެފާނުގެ އާލުވެރިންނާއި ، ޢިމްރާނުގެ އާލުވެރިން (އެދުވަސްވަރުގެ) ޢާލަމްތަކުގެ މައްޗަށް ޚިޔާރު ކުރެއްވިއެވެ.
(ނުނިމޭ)
