(14 އޭޕްރީލް 2023 ގައި ޝާއިއުކުރި ބަޔާ ގުޅޭ)
ﷲ ސުބްޙާނަހޫ ވަތަޢާލާ ، އެކަލާނގެ ޚަލްޤުކުރައްވައި އުފަންކުރައްވާފައިވާ އިންސާނުންގެ މައްޗަށް ފޮނުއްވާފައިވާ ރަޙުމަތާއި ލައްވާފައިވާ ނިޢުމަތުގެ ވާހަކައިން ، ހޫދުގެފާނު އެކަލޭގެފާނުގެ ޤައުމުގެ މީސްތަކުންނަށް ވިދާޅު ދެއްވިއެވެ. އެބައިމީހުންނަކީ ، ސަލާމްލެއްވި ނޫޙުގެފާނުގެދަރިފަސްކޮޅުން އައިސްތިބި ބައެއްކަމާއި ، އެބައިމީހުންނަށް ބާރާއި މުދަލާ އަދި ފައިސާ ދެއްވާފައިވާ ކަމާއި ، އުޑުން ވާރޭވެއްސަވައި ، ބިމަށް ދިރުންދެއްވައި ރޯދިބަރަކާތް ތަނަވަސްކޮށްދެއްވާފައިވާ ގޮތުގެ މައްޗަށް އެކަލޭގެފާނު ވާހަކަފުޅު ދެއްކެވިއެވެ.
ހޫދުގެފާނުގެ ޤައުމުގެ މީހުން ، އެކަލޭގެފާނު އެވިދާޅުވި ކަންކަމުގެ މައްޗަށް ވިސްނައި ފިކުރުކޮށް ، އެބައިމީހުންނަކީ ، ދުނިޔޭގައިވާ އެންމެ ބާރުގަދަ މީހުންކަމުގައި ނިންމިއެވެ. އަދި އެކަމަށް ބޮޑާވެ ، އެހެންމީހުންގެ މައްޗަށް ނުފޫޒާއި ބާރު ފޯރުވުމަށް އިސްނެގިއެވެ. އެކަމާބެހޭގޮތުން ، ހޫދުގެ ފާނާ ވާހަކަދައްކައި އެމީހުން އެކަލޭގެފާނާ ދެބަސްވިއެވެ. އެމީހުން ބުނޫއެވެ. " އޭ ހޫދުގެފާނެވެ ! ކަލޭގެފާނު ތިވިދާޅުވަނީ ، އަހުރެމެން މަރުވެ އަޅިޔަށްވާނެވާހަކަ ތޯއެވެ ؟ އަދި އަލުން ދިރުއްވައި ، ޤިޔާމަތް ދުވަހު މަޙުޝަރު ކުރައްވާނެ ވާހަކަތޯއެވެ ؟ " އެކަލޭގެފާނު ޖަވާބު ދެއްވިއެވެ.
" އާނއެކެވެ ! ތިޔަބައިމީހުން މަރުވުމަށްފަހު އަލުން ދިރުއްވައި މަޙުޝަރު ކުރައްވާނެއެވެ. ތިމަންކަލޭގެފާނާއި ތިޔަބައިމީހުންގެ ވެރި ރަސްކަލާނގެ ޙަޟުރަތަށެވެ. އެދުވަހަކުން ، ދުނިޔޭގައި ތިޔަބައިމީހުން ޢަމަލުކުރި ގޮތުގެ ފުރިހަމަ ހިސާބު ، ކޮންމެ މީހެއް ވަކިވަކިން ބެލެވޭނެއެވެ. " އެކަލޭގެފާނު އެހެން ވިދާޅުވުމާއެކު ، އެބައިމީހުން އެކަލޭގެފާނަށް ހީ މަލާމާތް ކުރިއެވެ. އަދި ބުންޏެވެ.
" ކަލޭގެފާނު ތިވިދާޅުވަނީ ކިހިނެއްވާނެކަމެއް ހެއްޔެވެ ؟ އިންސާނުން މަރުވުމުން އަޅިޔަށްވެ ބިމުގެ ފަހާއެކުވެގެން ވަޔާ ، ވިއްސިވިހާލިވެގެންދާނެއެވެ. އެއަށްފަހު ، އަލުން ފުރާނައެޅިގެން އއެއިންސާނާ ، އޭނާގެ އަޞްލަށް ރުޖޫޢަވެ ، އަންނާނީ ކޮންފަދަޔަކުން ހެއްޔެވެ ؟ އެހެންކަމަށްވަންޏާ ހިސާބު ބައްލަވާ ދުވަހުގެ ބޭނުމަކީ ކޮބައި ހެއްޔެވެ ؟ ހަށިގަނޑަށް ފުރާނައެޅިގެން ދިރިގެން ތެދުވާނީ ކިހިނަކުން ހެއްޔެވެ ؟ " ހޫދުގެފާނުގެ ޤައުމުގެ މީސްތަކުންގެ އަޑު އެކަލޭގެފާނާހަމަޔަށް ފޯރިއެވެ. ޤިޔާމަތް މަޙުޝަރު ދުވަހާބެހޭގޮތުން ، އެކަލޭގެފާނުގެ ޤައުމުގެ މީސްތަކުންނަށް އޮޅުންފިލުއްވައި ދެއްވިއެވެ. ކީރިތި ﷲ ގެ ޢަދުލުވެރިކަމުގެ ދަރުބާރަށް ޚާއްޞަކުރެވިގެންވާ މަޙުޝަރު ދުވަހަކީ މުހިންމު ދުވަހެއްކަން ، މީސްތަކުންނަށް އަންގަވައި ދެއްވިއެވެ. އަދި ﷲ ސުބްޙާނަހޫ ވަތަޢާލާގެ ޢަދުލުވަންތަވެރިކަން ހެކިކޮށްދިނުމުގައި ، މަޙުޝަރުދުވަހުގެ މުހިންމުކަން ބަޔާންކޮށް ދެއްވަމުން ގެންދެވިއެވެ. އެއީ ކުރިން ފޮނުއްވާފައިވާ ނަބިއްޔުންނާއި ރަސޫލު ބޭކަލުން ، މީސްތަކުންނަށް ބަޔާންކޮށްދެއްވަމުން ވަޑައިގެންފައިވާ ކަމެއްކަން ސާފުކޮށް ދެއްވިއެވެ.
ހިސާބު ބައްލާވާދުވަހެއް މުހިންމުވަނީ ، ރަނގަޅަކީ ދުނިޔޭގައި އަބަދު ދެމިއޮންނައެއްޗަކަށް ނުވާތީކަމަށް ، އެކަލޭގެފާނު ، މީސްތަކުންނަށް ސާފުކޮށްދެއްވަމުން ގެންދެވިއެވެ. އެހެނީ ، ކުށްފާފައަކީ ބައެއްފަހަރަށް ، ރަނގަޅުގެ މައްޗަށް ގަދަވެގަންނަ އެއްޗަކަށްވާތީއެވެ. ރަނގަޅު ހެޔޮ ޢަމަލުތަކާއި ، ފާފަތައް ހިސާބުކޮށް ، އެމީހަކަށް ޙައްޤު ސަވާބާއި ދަރުމަ އެމީހަކަށް މިންވަރުކުރައްވަނީ ، މާތް ﷲ ކަން ، އެކަލޭގެފާނު މީސްތަކުންނަށް އަންގަވައި ދެއްވިއެވެ. ހޫދުގެފާނު ދެއްކެވި ވާހަކަތައް އެމީހުން ކަނުލައި އަޑުއެހިއެވެ. އެހެންނަމަވެސް ، އެވާހަކަތަކަށް އެކަލޭގެފާނުގެ ޤައުމުގެ މީހުންދިނީ ބީރު ކަންފަތެކެވެ. ޤިޔާމަތްދުވަހާބެހޭގޮތުން ، ހޫދުގެފާނުގެ ޤައުމުގެ މީހުން ޤަބޫލުކޮށްގެން ތިބި ގޮތުގެ މައްޗަށް ، ކީރިތި ޤުރުއާނުގެ އަލްމުއުމިނޫން ސޫރަތުގެ 33 ވަނަ އާޔަތުން ފެށިގެން 38 ވަނަ އާޔަތުގެ ނިޔަލަށް ، އެ ހަ އާޔަތުގައިވާ ވަޙީބަސްފުޅުގެ މާނައިގާ ވެއެވެ.
" އެކަލޭގެފާނުގެ ޤައުމުގެ މީހުންގެ ތެރެއިން ، ކާފިރުވެ އަދި ، އާޚިރަތާ ބައްދަލުވާނޭކަން ދޮގުކޮށް އުޅުނު ، އަދި ދުނިޔޭގެ ޙަޔާތުގައި ތަނަވަސްކަމާއި ނިޢުމަތް ، އެއުރެންނަށް ތިމަންރަސްކަލާނގެ ދެއްވި ބޮޑުންގެމީހުން ބުނޫއެވެ. ތިޔަބައިމީހުން ކަހަލަ އާދަމުގެ ދަރިޔަކު ކަމުގައި މެނުވީ ، މީނާ ނުވެއެވެ. ތިޔަބައިމީހުން އެ އެއްޗަކުން ކައިއުޅޭ ތަކެތިން ، އޭނާވެސް ކައިއުޅެތެވެ. އަދި ، ތިޔަބައިމީހުން އެ އެއްޗަކުން ބޮއިއުޅޭ ތަކެތިން އޭނާވެސް ބޮއެ އުޅެތެވެ. (33) އަދި ، ހަމަކަށަވަރުން ، ތިޔަބއިމީހުން ކަހަލަ އާދަމުގެ ދަރިޔަކަށް ތިޔަބައިމީހުން ކިޔަމަންތެރިވެއްޖެނަމަ ، އެ ހިނދު ހަމަކަށަވަރުން ، ތިޔަބައިމީހުންނީ ، ގެއްލެނިވެގެންވާ ބައެއްކަން ކަށަވަރެވެ. (34) ހަމަކަށަވަރުން ، ތިޔަބައިމީހުން މަރުވެއްޖެހިނދު ، އަދި ވެއްޔާއި ކަށްޓަށް ތިޔަބައިމީހުން ވެއްޖެ ހިނދު ، އަލުން ދިރުއްވައި ނެރުއްވާނޭކަމަށް އޭނާ ތިޔަބައިމީހުންނަށް ވަޢުދުކުރަނީ ހެއްޔެވެ ؟ (35) ތިޔަބައިމީހުންނަށް ވަޢުދުކުރައްވާ ކަންތައް ދުރުވެގެން ވެއެވެ. ( ވަރަށް ) ދުރުވެގެން ވެއެވެ. (36) އެ ދިރިއުޅުމަކީ ، ތިމަންމެންގެ ދުނިޔޭގެ ދިރިއުޅުން ފިޔަވައި އެހެން އެއްޗެއް ނޫނެވެ. ތިމަންމެން މަރުވަމުއެވެ. އަދި ދިރިއުޅެމުއެވެ. އަދި އަލުން ދިރުއްވައި ފޮނުއްވާނޭ ބަޔަކުކަމުގައި ތިމަންމެން ނުވަމުއެވެ. (37) ﷲ އާމެދު ހަދައިގެން ދޮގެއްބުނި ފިރިހެނަކުކަމުގައިނޫނީ ، އޭނާ ނުވެތެވެ. އަދި ، އޭނާއަށް އީމާންވާ ބަޔަކުކަމުގައި ތިމަންމެން ނުވަމުއެވެ. (38)
(ނުނިމޭ)
