(24 މާޗް 2023 ގައި ޝާއިއުކުރި ބަޔާ ގުޅޭ)
އަދި އެކަލާނގެ ކުޅަދުންވަންތަ ކަމުގެ ތެރެއިން ، ނުވަތަ ނެތުމުގެ ތެރެއިން އާދަމުގެފާނު އުފައްދަވައި ، އެކަލޭގެފާނަށް ސަޖިދަކުރުމަށް އެންމެހައި މަލާއިކަތް ބޭކަލުންނަށް އެންގެވިއެވެ. އަދި ، އިބިލީސްފިޔަވައި އެހެން ހުރިހައި މަލާއިކަތްބޭކަލުންނެއްގެ ފަރާތްޕުޅުން ، އެކަލޭގެފާނަށް އެމަތިވެރި ޝަރަފް ލިބިވަޑައިގަތެވެ. ސަޖިދަކުރުން އެއީ ﷲ ގެ މަތިވެރިވަންތަ ޙަޟުރަތަށް ޚާއްޞަވެގެންވާ އަޅުކަމެއްކަމުގައިވިޔަސް ، މަލާއިކަތްބޭކަލުން ، އާދަމުގެފާނަށް ސަޖިދަކުރެއްވުމަށް ، ﷲ އެންގެވި އެންގެވުން އެއީ އެކަލޭގެފާނަށް ﷲ ގެ ޙަޟުރަތުން ލިބިވަޑައިގެންނެވި މަތިވެރި ނިޢުމަތެކެވެ. ބުނެވޭގޮތުގައި ، އާދަމުގެފާނުގެ ހަށިކޮޅުގައި ފުރާނަފުޅު ލެވުނުހިނދު ، ކިނބިއްސެއްއެޅުއްވުމާއެކު ، ވަގުތުން ﷲ އަށް ޙަމްދުކޮށް އެކަލާނގެ ކަށަކުޅަދުންވަންތަކަމަށް ހެކިވެވަޑައިގަތެވެ. އެއާއެކު ، ﷲ އެކަލާނގެ ރަޙުމަތްފުޅު ، އާދަމުގެފާނަށް ފޯރުކޮށްދެއްވުމަށް ، މަލާއިކަތް ބޭކަލުންނަށް ، އެކަލޭގެފާނަށް ސަޖިދަކުރެއްވުމަށް އެންގެވިއެވެ.
ބުނެވޭގޮތުގައި އާދަމުގެފާނު އުފައްދަވާފައިވަނީ ، ފުރިހަމަވެގެންވާ ސޫރައެއްގައި ﷲ ގެ މަތިވެރިވަންތަ ތަޞައްވުރު ހިމެނޭ ގޮތަށެވެ. އެހެންނަމަވެސް އޭގެ މާނަޔަކީ ، ﷲ އަށް ޚާއްޞަވެގެންވާ ހުރިހައި މާތްސިފަފުޅުތަކެއް ، އާދަމުގެފާނަށް ލިބިވަޑައިގެންފައިވުމެއްނޫނެވެ. އެހެނީ ، ﷲ އީ އެންމެހައި މަތިވެރި ސިފަފުޅުތަކުން ތަޞައްވުރުކުރެވިގެންވާ މަތިވެރި އިލާހެވެ. އެފަދަ ދެވަނަ އެއްޗެއް ނުވާ އެއްކައުވަންތަ އިލާހެވެ. އާދަމުގެފާނަށް ލިބިވަޑައިގަތީ ، ޙައްދެއްނެތް ރަޙުމަތާއި ނިޢުމަތާ އަދި އިޙްތިރާމާއި ލޯބި އަދި އަމިއްލަފުޅު ނަފުސުގެ ފުރިހަމަ އިޚްތިޔާރުފަދަ ސިފަފުޅުތަކެވެ.
އާދަމްގެފާނުގެ އަރިހުގައި އިށީނދެވަޑައިގެން ތިއްބެވި ، މަލާއިކަތުންގެ ޖަމާޢަތަކާ ކުރިމަތިލައްވައި ، " އައްސަލާމް ޢަލައިކުމް " އޭ ވިދާޅުވެ އެބޭކަލުންނަށް ސަލާމްކުރެއްވުމަށް އެކަލޭގެފާނަށް އެންގެވުނެވެ. އަދި މަލާއިކަތްބޭކަލުންވެސް ، ތިބާއަށްވެސް ﷲ ގެ ރަޙުމަތާއި ބަރަކާތާ އަދި ސަލާމްހުއްޓޭ ވިދާޅުވެ ސަލާމް ބައްލަވައިގެންނެވިއެވެ. އެދުވަހުންފެށިގެން ، ﷲ ގެ ބަރަކާތާއި ރަޙުމަތް އެދި ، ސަލާމްކުރެވެމުންމިދަނީ އެބީދައިންނެވެ.
ﷲ ސުބްޙާނަހޫ ވަތަޢާލާ ، އިންސާނުންނަށް އަންގަވާފައިވަނީ ، އިންސީން (ނާއި ޖިންނީން) އެކަލާނގެ ޚަލްޤު ކުރައްވާފައިވަނީ ، އެކަލާނގެ ޙަޟުރަތަށް އަޅުކަން ކުރުމަށްޓަކައެވެ. މިދުނިޔޭގައިވާހައި އެއްޗެއް އުފައްދަވައި ، ތަނަވަސްކޮށްދެއްވާފައިވަނީ ، އާދަމުގެފާނަށާއި އެކަލޭގެފާނުގެ ދަރިފަސްކޮޅަށްޓަކައެވެ. ދުނިޔޭގައި ލެއްވި އެންމެހައި ތަކެތި ރައްކައުތެރިކަމާއެކު ބަލަހައްޓައި ، އޭގެބޭނުން ، އެންމެފުރިހަމަގޮތުގައި އަދި ޙައްޤުގޮތުގައި ބޭނުންހިފުމަކީ އިންސާނާގެ މައްޗަށް ވާޖިބުވެގެންވާ ކަމެކެވެ. ދުނިޔޭގައި ލެއްވި އެންމެހައި ތަކެތީގެ ބޭނުންހިފާނެގޮތް ، ﷲ ގެ ޙަޟުރަތުން އާދަމުގެފާނަށް ދަސްފުޅުކޮށްދެއްވިއެވެ.
ދުނިޔޭގައި ލެއްވިހައި ތަކެއްޗެއްގެ ނަންތައް އާދަމުގެފާނަށް ދަސްކޮށްދެއްވިއެވެ. އެކަލޭގެފާނުގެ މައްޗަށް ވާޖިބުވެގެންވާ ކަންކަން ފުރިހަމަކުރައްވާނެގޮތް ދަސްކޮށްދެއްވިއެވެ. ވާހަކަފުޅު ދައްކަވާނެ ބަހާއި މުޢާމަލާތު ކުރައްވާނެގޮތް ދަސްކޮށްދެއްވިއެވެ. ލޯތްބާއި އަޅައިލުމާ އަދި އިންސާނިއްޔަވަންތަކަން ދަސްކޮށްދެއްވިއެވެ.
އާދަމުގެފާނު ، މަލާއިކަތްބޭކަލުންނާ ވާހަކަދެއްކެވުމަށް މަސައްކަތް ކުރެއްވިއެވެ. އެހެނަސް މަލާއިކަތްބޭކަލުން ، އަވަދިނެތި އުޅުއްވަނީ ﷲ އަށް އަޅުކަން ކުރެއްވުމުގައެވެ. އަމިއްލަފުޅު ގޮތްތައް ނިންމެވުމުގެ އިޚުތިޔާރު ، މަލާއިކަތް ބޭކަލުންނަށް ލިބިވަޑައިގެންފައެއް ނުވެއެވެ. އެބޭކަލުންނަކީ ، ﷲ އަށް ޙަމްދުކޮށް އަޅުކަންކޮށް ، އަދި ﷲ އެންގެވިކަމެއް އެންގެވިގޮތަކަށް ކުރެއްވުމަށް އުފައްދަވައިފައިވާ ރޫޙާނީ ބަޔެކެވެ. އެހެނަސް ، ސަބަބުގައި ހިފައި ، އަމިއްލަފުޅު ގޮތްނިންމަވައި ، އިޚުތިޔާރުތަކެއް ދެއްވައި ރަނގަޅާއި ނުބައި ވަކިކުރެއްވުމުގެ ކުޅަދާނަކަން އާދަމުގެފާނަށް ދެއްވިއެވެ. އެއީ ، ބިމުގައި ދިރިއުޅުއްވުމަށްޓަކައި ، ބިމުގެ ޚަލީފާއެއްގެގޮތުގައި ދެމިހުންނެވުމަށް ފިލާވަޅުތަކެއް ލިބިވަޑައިގެންނެވި ކަމެކެވެ.
ސުވަރުގޭގައި ، ހުރިހައި އެއްޗެއްގެ ނަން އާދަމްގެފާނަށް އެނގިވަޑައިގަންނަވައެވެ. އެހެންނަމަވެސް ، އެކަލޭގެފާނު ، ސުވަރުގޭގައި ދިރިއުޅުއްވަމުން ގެންދެވީ ގިނިކަންޏާއެވެ. އެއްދުވަހެއްގެ ހެނދުނު ، އަވަހާރަފުޅުން ތެދުވެވަޑައިގެންނެވިއިރު ، އެކަލޭގެފާނާދިމާއަށް ބަލަހައްޓައިގެން އަންހެނަކު އިންތަން ފެނިވަޑައިގަތެވެ.
އާދަމް ޢަލައިހިއްސަލާމްގެ ދެކަނބަލުންނަށް ކުރެއްވުނު ކުށުގެ ސަބަބުން ، ހުރިހައި އިންސާނުންނަކީވެސް ، އުފެދުމުގައި ކުށްހިމެނޭ ބަޔަކުކަމުގައި ، ޔަހޫދީން ޤަބޫލުކުރާ ކުރުމަކީ ، އިސްލާމްދީން ޤަބޫލުކުރާކަމެއްނޫނެވެ. ކީރިތި ޤުރުއާނުގެ ފާޠިރު ސޫރަތުގެ 18 ވަނައާޔަތުގައި ﷲ ސުބްޙާނަހޫ ވަތަޢާލާ ވަޙީކުރައްވައި އަންގަވައިފައި ވެއެވެ.
" އަދި ، ފާފަވެރި އެއްވެސް ނަފްސެއް ، އެހެން ނަފުސެއްގެ ފާފައެއް ނުއުފުލާނެތެވެ. އަދި ، ފާފައިން ބަރުވެފައިވާ ނަފުސެއް ، އެއުފުލުމަށް ( އެހެން ފަރާތަކަށް ) ގޮވިޔަސް ، އެއީ ގާތްތިމާގެކަމުގެ އަހުލުވެރިއެއްކަމުގައިވިޔަސް ، އެއިންހަމަ އެކައްޗެއްވެސް ނުއުފުލޭނެތެވެ. ކަލޭގެފާނު އިންޒާރުކުރައްވާކަން ކަށަވަރީ ، ނުފެންނަ ތާނގައި އެއުރެންގެވެރި ރަސްކަލާނގެޔަށް ބިރުވެތިވެ ، ނަމާދު ޤާއިމްކޮށްއުޅޭ މީހުންނަށެވެ. އަދި ( ކާފަރުކަމުން ) ޠާހިރުވެގަންނަމީހާ ، ފަހެ ، އެމީހާ ޠާހިރުވެގަންނަކަން ކަށަވަރީ ، އޭނާގެ އަމިއްލަ ނަފުސަޢްޓަކައެވެ. އަދި ، އެނބުރިދިއުންވަނީ ، ﷲ ގެ ޙަޟުރަތަށެވެ. "
އާދަމު ޢަލައިހިއްސަލާމުގެ ދެކަނބަލުންނަށް ކުރެއްވުނު ކުށަށް ، އެދެކަނބަލުންވަނީ ތައުބާވެވަޑައިގެންފައެވެ.
(ނުނިމޭ)
