އެއްދައުރެއްގައި އެންމެ ގިނަ މަސައްކަތް ކުރުމުގެ ރެކޯޑާއެކު 19 ވަނަ ރައްޔިތުންގެ މަޖިލީސްގެ މެމްބަރުން ޗުއްޓީއަށް ވަޑައިގެންފިއެވެ. ނަމަވެސް މިޗުއްޓީ ސަލާމަތީ ޚިދުމަތްތަކާ ބެހޭ ކޮމެޓީ ނުވަތަ (241ކޮމެޓީ)ގެ މެމްބަރުންނަކަށް ލިބިވަށޑައެއް ނުގަންނަވާނެއެވެ.
ނޫސްވެރިޔާ ރިލްވާން ޢަބްދުﷲގެ މަރާ ގުޅޭ ރިޕޯރޓްގެ މަސައްކަތްކުރުމަށް ސަލާމަތީ ޚިދުމަތްތަކާ ބެހޭ ކޮމެޓީ (241ކޮމެޓީ)ގެ މެމްބަރުން ޗުއްޓީއަށް ވަޑައިނުގެން މަސައްކަތްކޮށްދެއްވުމަށް ރައްޔިތުންގެ މަޖިލީހުގެ ރައީސް، ކުރީގެ ރައީސް މުޙައްމަދު ނަޝީދު ވަނީ އެދިވަޑައިގެންފައެވެ. އެމަސައްކަތުގައި އެކޮމެޓީގެ މެމްބަރުން އެއްބާރުލުން ވަރަށް ބޭނުންފުޅުވާ ކަމަށްވެސް މަޖިލީހުގެ ރައީސް ވިދާޅުވިއެވެ.
ރައްޔިތުންގެ މަޖިލީހުގެ މެމްބަރުން ޗުއްޓީއަށް ވަޑައިގެންނެވީ ވެސް ޗުއްޓީން އެއްހަފްތާގައި މަސައްކަތް ކުރުމަށްފަހުއެވެ. މަސައްކަތުގެ ރެކޯޑަށްބާލާއިރު 19 ރައްޔިތުންގެ މަޖިލީސް ވެގެން ގޮސްފައި ވަނީ އެއް ދައުރެއްގައި އެންމެ ގިނަ ތަފާތު މަސައްކަތް ކުރި މަޖިލީހަށެވެ. މަޖިލީހަށް ހުށަހެޅުނު ތަފާތު 161 މައްސަލަލައިގެ ތެރެއިން 70.2 އިންސައްތަ މަސައްކަތް ވަނީ ނިންމަވާ ލައްވައިފައެވެ.
ނިންމާލެއްވި މަސައްކަތްތަކުގެ ތަފާސް ހިސާބު:-
ހުށަހެޅުނު ބިލްގެ ޢަދަދު 31 ، ނިންމާލެވުނީ 14 ބިލް ، ނުނިމި ކޮމެޓީ މަރުޙަލާގައި 17 ބިލް.
ހުށަހެޅުނު ޤަރާރު އަދަދު 21 ، ނިންމާލެވުނީ 9 ޤަރާރު.
ސަރުކާރުން ހުށަހެޅ މައްސަލައިގެ ޢަދަދު 15، ނިންމާލެވުނީ 12 މައްސަލަ، ނުނިމި 3 މައްސަލަ.
ރިޔާސަތުންހުށަހެޅި މައްސަލައިގެ ޢަދަދު 22، ނިންމާލެވުނީ 17 މައްސަލަ، ނުނިމި 5 މައްސަލަ.
މެމްބަރުން ހުށަހެޅި މައްސަލައިގެ ޢަދަދު 9، ހުރިހާ މައްސަލައެއް ނިންމާ ލެވުނު.
ހުށަހެޅުނު ރިޕޯރޓްގެ ޢަދަދު 39، ނިންމާލެވުނީ 34 ރިޕޯރޓް، ނުނިމި 5 ރިޕޯރޓް
ވަޒީރުންނާ ކުރެވުމަށް ހުށަހެޅި ސުވާލުގެ ޢަދަދު 20، ވަޒީރުންނާ ކުރެވުނީ 14 ސުވާލު، ނުނިމި ވަނީ 6 ސުވާލު.
ކޮމިޓީތަކުގެ މަސައްކަތަށް ބަލާއިރު 465 ބައްދަލުވުން ބާއްވައި 500 އަށް ވުރެ ގިނަ ގަޑިއިރު ހޭދަކޮށްފައިވާ ކަމަށް މަޖިލީސް ނިންމާލައްވަމުން، ރިޔާސަތުގައި އިންނެވި ނާއިބް ރައީސް އީވާ ޢަބްދުﷲ ވިދާޅުވިއެވެ.
މިއަދު ބޭއްވި ނޫސްވެރިންގެ ބައްދަލުވުމުގައި ނޫސްވެރިއަކު ދެންނެވި ސުވާލަށް ޖަވާބު ދެއްވަމުން ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދު ވިދާޅުވީ މަޖިލީހުގެ މަސައްކަތަށް އެމަނިކުފާނު ދެއްވާނީ (ބީ ޕްލަސް) ރިޕޯރޓެއް ކަމުގައެވެ. ޢީދު ޗުއްޓީއާ ދިމާވުމުން ކަނޑައެޅިގޮތަށް މަސައްކަތްތައް ނުގެންދެވުނުކަން މަޖިލީހުގެ ރައީސް ފާހަގަ ކުރެއްވިއެވެ.
