ޖުމްހޫރީ ޕާޓީ (ޖޭޕީ) ޢިން މިވަގުތު އެންމެބޮޑު އިސްކަމެއްދޭނީ ގައުމަށް މިހާރު ދިމާވެފައިވާ ހާލަތުން ސަލާމަތް ކުރުމަށް ކަމަށް އެޕާޓީން ވިދާޅުވެއްޖެއެވެ.
އެޕާޓީގެ ލީޑަރުގެ މަސްއޫލިޔަތުތަކާ ވަގުތީ ގޮތުން ހަވާލުވެ ހުންނެވި ޑެޕިޔުޓީ ލީޑަރު ޑރ. ހުސައިން ރަޝީދު ހަސަން ވިދާޅުވީ އޭނާ އެމަސްއޫލިއްޔަތާ ހަވާލުވެ ހުންނެވި ޔަސް ޕާޓީހިންގައި ކަންކަން ނިންމާނީ މަޝްވަރާގެ އުސޫލުން މުޅިޕާޓީން ކަމަށެވެ.
އެގޮތުން އެޕާޓީން މިވަގުތު އެންމެ ބޮޑު އިސްކަމެއް ދެއްވާނީ ގުޅިފައިވާ ޕާޓީތަކާއެކު ރާއްޖޭގައި އެއްބައިވަންތަކަމުގެ ސަރުކާރެއް ގާއިމް ކުރެއްވުމަށް ކަމަށެވެ. އަދި ރާއްޖެއަށް މިހާރު ދިމާވެފައިވާ ހާލަތުން ގައުމު ސަލާމަތް ކުރުން ކަމަށް ވެސް ވިދާޅުވިއެވެ. "މިދަނޑިވަޅުގައި އެންމެ މުހިންމު ކަމަކީ ގައުމަށް ކުރިމަތިވެފައިއޮތް ހާލަތުން ރާއްޖެ ސަލާމަތް ކުރުން. ރާއްޖޭގެ ވަރަށްގިނަ މީހުން ގަބޫލްކުރޭ ރާއްޖޭގައި އެންމެ މުހިންމުކަމަކީ އިންސާފު ގާއިމްކުރުމާއި އަނިޔާވެރިކަން ފިލުވުންކަން. ދެން ރައްޔިތުންގެ އަސާސީ ހައްގުތަކާއި މިނިވަންކަން ކަށަވަރު ކޮށްދިނުން،" ޑރ. ހުސައިން ވިދާޅުވިއެވެ.
އޭނާ ވިދާޅުވީ މިކަންކަމަކީ ކޮންމެހެންވެސް މިހާރު ހާސިލް ކުރަންޖެހޭ ކަންކަން ކަމަށެވެ. އެހެންނަމަވެސް އެކަންކަން ހާސިލް ކުރަން މަސައްކަތްކުރަން ބަލާއިރު ސިޔާސީ ޕާޓީތަކުގެ ހުރިހާ ލީޑަރުން މިވަގުތު ތިބީ އަރުވާލެވިފައި ނުވަތަ ބަންދުވެފައި (ޖަލުގައި) ކަމަށް ވެސް އޭނާ ވިދާޅުވިއެވެ. އެފަދަ ބޭފުޅުންގެ ވާޖިބާއި މަސްއޫލިއްޔަތު އަދާ ނުކުރެވޭ ގޮތުގައި ބަންދު ކުރެވިފައި ވުމުން އޭގެ ނޭދެވޭ އަސަރު އިސްލާހީ މަސައްކަތަށް ވެސް ކުރަމުންދާ ކަމަށް އޭނާ ވިދާޅުވިއެވެ. "އެހެންވީމާ ސިޔާސީ އިސް ހަރަކާތްތެރިންގެ މަސްއޫލިއްޔަތަކަށްވާންވާނީ މިކަމުން ސަލާމަތްވުން. ރާއްޖެއަށް މިހާރު ކުރިމަތިވެފައިވާ ޚާއްސަ ހާލަތުން ސަލާމަތް ކޮށްދިނުން،" އޭނާ ވިދާޅުވިއެވެ.
ޕާޓީގެ ކުރިމަގާމެދު އޭނާ ވިދާޅުވީ އެއްބައިވަންތަކަމުގެ ސަރުކާރެއް އެކުލަވާލުމުގައި ޖޭޕީގެ ދައުރު ވެސް ވަރަށް ބޮޑުވާނެ ކަމަށެވެ. އެފަދަ ސަރުކާރެއް ގާއިމްކުރެވުމުން އޭގެ ތެރެއިން ޖޭޕީއަށް ވެސް ވަރަށް މުހިންމު ދައުރެއް ލިބިގެންދާނެ ކަމަށްވެސް ވިދާޅުވިއެވެ. "އެހެންވީމާ ޕާޓީގެ ކުރިމަގު ވަރަށް އުޖާލާކޮށް އަޅުގަނޑު ދެކެނީ. އެ އުޖާލާ ކުރެވޭނީ އަޅުގަނޑުމެން އެންމެން އެއްބައިވެގެން. ގައުމު މިހާލަތުން ސަލާމަތް ކުރުމަށް ކުރެވެމުންދާ މަސައްކަތުގެ ނަތީޖާއެއްގެ ގޮތުން. އެނގިވަޑައިގަންނަވާނެ އެއްބަޔަކު އެކަނި ކުރެވޭވަރުގެ ކަންކަން އެމީހުންކުރާނެ. އެކަން ކާމިޔާބުވެސް ކުރާނެ. އެކަމަކު މިރާއްޖެ މިހާރު މިއޮތް ހާލަތަކީ ރާއްޖޭގެ ރައްޔިތުންނަށްޓަކައި އެހާލުން ސަލާމަތްކޮށް އެކުވެރިކަމާއި އެއްބައިވަންތަކަން އުފައްދަން މަސައްކަތްކުރަޖންޖެހޭ ހާލަތެއް. އެމަސައްކަތް ކުރަމުން މިދަނީ. މިކަމުގެ ތެރޭގައި އަޅުގަނޑުމެން ކަށަވަރުކުރަނީ ﷲ ގެ އިރާދަފުޅުން ރާއްޖޭގައި އެއްބައިވަންތަކުމުގެ ސަރުކާރެއް ގާއިމްކުރެވޭނެ ކަމަށް،" ޑރ. ހުސައިން ވިދާޅުވިއެވެ.
