ތަނަވަސްކަމާއި މުއްސަނދިކަމަކީ ، އިންސާނާއަށް ﷲ މިންވަރު ކުރައްވާ ނިޢުމަތެކެވެ. އިންސާނާ އޭނާގެ ދިރިއުޅުން ބައްޓަންކުރަނީ އެ ނިޢުމަތުގެ މަތީގައެވެ. ފައިސާގެ ތަނަވަސްކަމުގައެވެ. އަނބިންނާއި ދަރިންގެ ނިޢުމަތެވެ. ހާއުހާވެރިކަމުގައި ދުނިޔޭގައި ދިރިއުޅުމަށް ލިބޭ ނިޢުމަތެވެ. އެހެންމީހުންނަށްވުރެ ޤަދަރު އުފުލުމަށް ލިބޭ ފުރުޞަތެވެ. އަބުރުވެރި ދިރިއުޅުމަކަށް ލިބިގެންދާ ފަހިކަމެވެ. ވެރިކަމާއި ބާރުން އެހެންމީހުންގެ މައްޗަށް އިސްވުމަށް ލިބޭ ޖާގައެވެ.
މުއްސަންޖެއް ފެނުނީމާ ، އެއީ މުއްސަންޖެއްކަން އެންމެންނަށްވެސް އެނގޭނެއެވެ. އެމީހުން ދަތުރުކުރާނީ އަގުބޮޑު އަދި ޒަމާނީ ވެހިކަލުގައެވެ. އެމީހުންގެ ވިޔަފާރި އުޑުގެ ވިލާތަކާ ހަމަޔަށް އޮންނާނީ އުފުލިފައެވެ. މެދުއުޑުގައި ގުގުމަމުންދާނީ އެމީހުންގެ ނަމެވެ. ނުވަތަ އެމީހުންގެ ވިޔަފާރި މާރކްތަކުގެ އަޑެވެ. ލައިގެން ތިބޭނީ އަގުބޮޑު އަދި އެންމެފަހުގެ ފެޝަންތަކުގެ ހެދުމެވެ. ކައިރީގައި ދެތިން ހަށިފާރަވެރިން ތިބޭނެއެވެ. ހަށިގަނޑަށް އަންނަ ބަދަލުތައް ފޮރުވުމަށްޓަކައި ، މޭކަޕްކޮށް ކުލަޖައްސާނެއެވެ. ނޭނގޭމިންވަރުން އެނގޭކަމަށް ހެދޭނެއެވެ. އެމީހުން ކޮންމެ އެއްޗެކޭ ބުންޏަސް އެއީ ހަމަގޮތް ކަމުގައި ބަލައިގަންނަ ބަޔަކު ތިބޭނެއެވެ. ޤާނޫނާއި ޤަވާޢިދާ އަދި ދުނިޔޭގެ ހަމަތައް އެއީ އެމީހުންގެ ތަނަވަސްކަމުގައި ފުށްގަނޑެއްހެން މޮޑެލެވޭ އެއްޗެކެވެ. އެމީހުންގެ އަތުގައި ނެތް އެއްޗެއް ނުހުންނާނެއެވެ. އެކަމަކު ، އެމީހުންގެ އަތުގައި އޮތް އެއްޗެއް އޮންނާނީ ރަހުނަށް ވެފައެވެ. ކައިބޮއެ މީހުންނަށް ދިއްކޮށްލާ އެއްޗަކީ ، އަމިއްލަ އެއްޗަކަށް ނުވެ ، އެމީހުން ދިރިއުޅޭނީ އެމީހުންގެ އަތުގައި ނެތް ، ދުނިޔޭގެ މާއްދިއްޔަތު ވިއްކައިގެންނެވެ.
ފައިސާއަށް ނުގަނެވޭނެ އެއްޗެއް ނުއޮންނާނެކަމަށް އެމީހުން ބަލާނެއެވެ. އެންމެ ބޮޑަށް އެމީހުން ހިތްކިޔާނީ ބާރަށެވެ. ދެން އަމިއްލަ އެދުމަށެވެ. އެމީހުންގެ މުށުތެރޭގައި ބާރު އޮންނަން ބޭނުންވާނެއެވެ. ބާރު ނެތްނަމަ ، އެމީހުންގެ މުއްސަނދިކަމުގެ ބޭނުމެއް ނުހިފޭނެއެވެ. ވެރިކަމާ ތޮޅުން އެއީ ކުޅިބަލަން ދުރުގައި ތިބެގެން އެމީހުންކުރާނެ އެންމެ މޮޔަ އެއްކަންތަކެވެ. އެމީހުން ބޭނުންވާގޮތަށް ވެރިކަންކުރާ މީހަކު ނުފެންނާނެއެވެ. އެމީހުން ބޭނުންވާކަމެއް ވެރިކަމުގެ ފަރާތުން ނުފުދިއްޖެނަމަ ، އެވެރިކަމާ ދެކޮޅަށް ތެދުވާނެއެވެ.
އެމީހުންގެ އަނގައިން ބުނާބަހުގައި އިތުބާރެއް ނުހުންނާނެއެވެ. އެހެނީ ، އެމީހުންނަށް ފައިދާވާ ކަންކަމުގައި ބަސް ބަދަލުކުރާނެއެވެ. ކުރިން ބުނިބަސް ކެންސަލް ކުރާނެއެވެ. އެއީ ، އެމީހުންނަށް ކުރެވޭ ގޯސްކަމެއްކަމަކަށް ނުބަލާނެއެވެ. އެހެނީ ، އެމީހުންނަށް ކުރެވޭ ކޮންމެ ކަމަކަށް އަތްޖަހާ ތަޢުރީފުކުރާ ބަޔަކު އުޅޭނެތީއެވެ. އެއީ އެމީހުންގެ ނުފޫޒުގެ ތެރެއިން ގަނެވިފައިތިބޭ ބަޔެކެވެ. އެންގަނޑަކަށް މަސް އަރާހެން ، އެމީހުންގެ މުއްސަނދިކަމުގެ ފައިދާއިން ކަމެއް ޙާޞިލް ކުރަން ބޭނުންވާ އެތައްބަޔަކު ފަހަތުގައި ތިބޭނެއެވެ.
އެއީ ކުޅަދާނަ ބަޔެކެވެ. ހިންޏަށް ހަކުރު އޮޅުވައިލާހެން ، ތެދަކީ ދޮގުކަމުގައި ، އަދި ދޮގަކީ ތެދުކަމުގައި ، އެމީހުން ދުނިޔެއަށް ދައްކާނެއެވެ. އެމީހުންކުރާ ހަމަ ކޮންމެ ކަމެއް އެއީ ރަނގަޅުކަންކަމުގެ ގޮތުގައި ދެކޭބަޔަކު ތިބޭނެއެވެ. އެއީ އެމީހުންނަށް ހިތްހަމަ ޖެހުމާއި އުފާލިބޭ ކަމެކެވެ. ހަމައެއާއެކު މަގުއޮޅޭކަމެއްވެސް މެއެވެ.
އެމީހުންގެ ފަރާތުން ދުނިޔެއަށް ލިބެނީ ކޮން ފައިދާއެއް ހެއްޔެވެ ؟ އެފަދަ އަމިއްލަ އެދުންބޮޑު ބަޔެއްގެ ފަރާތުން ދުނިޔެއަށް ފައިދާއެއް ލިބޭނެ ހެއްޔެވެ ؟ އެއީ ހަކުރާ ޖަހައިގެން ދުނިޔެ ކާ ބަޔެކެވެ. ދުނިޔެއިން ފެންނަ ހަމަ ކޮންމެ ފުރުޞަތެއް އެމީހުންގެ ފައިދާއަށް ބޭނުންކުރާނެއެވެ. އެއީ ، އެހެންމީހުންގެ މިލްކާއި އެހެންމީހުންނަށް ޙައްޤު ވަޞީލަތްތައް އަމިއްލަ ކޮށްގެން ދުނިޔެ ހޯދާ ބަޔެކެވެ. ވެންމަސް ވެނަށް ކާންދެވޭއިރު ، ވެނަށް އެކަން ނޭނގުމަކީ އެހެން ކަމެކެވެ.
މިހާރަކަށް އައިސް ، މުއްސަނދިން މުއްސަނދިވަނީ ކުއްލިއަކަށެވެ. ނުގޮތްގޮތަށެވެ. ކުރިން މުއްސަނދިވެފައިވާ މީހުންވެސް ޖުމްލަގޮތެއްގައި މުއްސަނދިވެފައި އޮންނަނީ ، ވަލުދޮރޯށިން ވަދެލަން ފުރުޞަތު ލިބިގެންނެވެ. ނުވަތަ ބަޔަކުމީހުން އަވަދިކޮށްލައިގެންނެވެ. ނުވަތަ ނުގޮތަކަށް އަތަށް އަރާ ފައިސާއަކުންނެވެ. މުއްސަނދިންގެ ޙާލުހުރީ މިގޮތަށްކަމަށްވާތީ ، ބައެއް މުއްސަނދިންގެ އަބުރަކީ ނޯންނަ އެއްޗެކެވެ. ފައިސާ ހުއްޓަސް ، ޤަދަރެއް އަދި އަބުރެއް ނޯވެއެވެ.
ފަޤީރުންނަކީ އަބުރުވެރި ބަޔެކެވެ. އެބައިމީހުންގެ ގެއްލޭނެ އަބުރެއް ނޯންނާނެއެވެ. އެމީހުން ތިބޭނީ އެމީހުންގެ އަމިއްލަ ޙާލުގައެވެ. އެމީހުންނަކީ މުއްސަނދިންގެ ވިސްނުމުން ވިސްނަން އެނގޭނެ ބައެއްނޫނެވެ. މުއްސަނދިން އެބައިމީހުންގެ އަމިއްލަ ބޭނުންތައް ފުއްދުމަށްޓަކައި ، ފަޤީރުންގެ ގާތަށް އަންނަން މަޖުބޫރުވާނެއެވެ. ފަޤީރުންގެ ވިސްނުމާއި ފިކުރާ އަދި ޚިޔާލާތު ބަދަލުކުރުމަށްޓަކައި އެބައިމީހުންގެ ސިކުނޑިއާ ކުޅެލުމަށްޓަކައި ދައްކާ ވާހަކަތަކަށް ، ފަޤީރުން ވަރަށް ފަސޭހައިން ހެއްލޭނެއެވެ. އެކިފަހަރު އެކިގޮތަށް މުއްސަނދިން ދައްކާ ވާހަކައާއި ކުރާ ކަންކަން ފަޤީރުންނަށް ފާހަގައެއް ނުކުރެވޭނެއެވެ. ފާހަގަ ކުރެވުނަސް އެއީ މާބޮޑު ކަމަކަށް ނުހަދާނެއެވެ. މުއްސަނދިން ދިއްކޮށްލާ ފައިސާއަކީ ، ފަޤީރުންނަށް މާމުހިންމު އެއްޗެކެވެ. އަތާ އަނގަޔާ ދިމާނުވެގެން އުޅޭއިރު ، އެހުރިހާ ކަމަކަށް ވިސްނާކަށް އެމީހުންގެ ސިކުނޑި ހުޅުވިގެންނެއް ނުވާނެއެވެ. އެއީ އަބުރެއްނެތް މުއްސަނދިންނާއި އަބުރުވެރި ފަޤީރުންގެ މެދުގައި ކުރެވޭ މުޢާމަލާތެކެވެ.
