(10 އޭޕްރީލް 2023 ގައި ޝާއިއުކުރި ބަޔާ ގުޅޭ)
ރާއްޖޭގެ ދެވަނަ ޖުމްހޫރިއްޔާގެ ދެވަނަ ރައީސަކަށް ވެވަޑައިގަތީ ، އަލްއުސްތާޛު މައުމޫނު ޢަބްދުލްޤައްޔޫމެވެ. 1978 ވަނަ އަހަރުންފެށިގެން ، މެދުނުކެނޑި 5 އަހަރުގެ 6 ދައުރު ފުރިހަމަކޮށް 30 އަހަރުވަންދެން ، އެމަނިކުފާނު ރާއްޖޭގެ ވެރިކަން ކުރެއްވިއެވެ. އަދި 7 ވަނަ ދައުރަކަށްވެސް ކުރިމަތި ލެއްވިއެވެ. ނަމަވެސް އެފަހަރު ، އެމަނިކުފާނަށް ލިބިވަޑައިގަތީ ނާކާމިޔާބީއެވެ. ދުނިޔެ ޤަބޫލުކުރާ ހަމަތަކަށް ބަލާއިރު ، އެހާގިނަދުވަސްވަންދެން އެކަކު ވެރިކަމުގައި ހުރުން ވެފައި އޮންނަނީ ޚުދުމުޚުތާރު ވެރިކަމެއްގެ ގޮތުގައެވެ. ރައީސް މައުމޫނުގެ ވެރިކަމުގައި ، ރާއްޖޭގެ އޭރުގެ ޤުދްރަތީ ވަޞީލަތްތައް ތަންދިން މިނުން ތަރައްޤީގެ ވަރަށް ގިނަކަންތައްތަކެއް ފަށްޓަވާފައި ވެއެވެ. އަންހެނުން ސިޔާސީ މައިދާނުގައި ބާރުވެރިކުރުވުމަށް ސަމާލުކަން ދެއްވިއެވެ. ދީނީ އެއްބައެއްވަންތަކަން ދެމެހެއްޓެވިއެވެ. ދުނިޔޭގެ ޤައުމުތަކަށް ޚާއްޞަކޮށް ޢަރަބި ދުނިޔެއަށް ރާއްޖެ ތަޢާރުފްވެގެން ދިޔައެވެ. އެމަނިކުފާނުގެ ވެރިކަމުގައިވެސް ، ވެގެންނުވާނެ ކަންތައްތަކެއް ހިނގައިދިޔައެވެ. މުލީއާގޭ ބަޖެޓަކީ ހުޅުވާލެވިފައިވާ ބަޖެޓަކަށް ވިއެވެ. ސިޔާސީ ބާރުތައް މުށުތެރެޔަށް ލައްވައި ، އެމަނިކުފާނުގެ ވެރިކަމަށް ނުރައްކަލަކަށްވި ކޮންމެ ކަމެއް ނައްތައިލެއްވިއެވެ. ކޮންމެ މީހަކު ބަލިކުރެއްވިއެވެ.
އޮޔާދާ ކާށި ގޮނޑުދޮށަށް ލައްގައި ގޮނޑުދޮށުގައި އޮވެ ނިރުފަޅައި ހެދި ބޮޑުވާނެއެވެ. އެބީދައިން ، ރައީސް މައުމޫނުގެ ވެރިކަމުގައި ، އަމިއްލަ ފަރާތްތަކާއި ސަރުކާރުގެ އެހީތެރިކަމުގައި ރާއްޖެޔަށް ތަރައްޤީތަކެއް ލިބުނެވެ. އެހެންނަމަވެސް ، ރާއްޖޭގެ ޤުދުރަތީ ވަޞީލަތްތަކާއި ، މުއްސަނދިކަން ހައެއްކަ ވިޔަފާރިވެރިންގެ މުށުތެރޭގައި އޮތް އޮތުން ، އެމަނިކުފާނަކަށްވެސް ބަދަލެއް ނުކުރެއްވުނެވެ.
ނޮވެމްބަރ 3 ، 1988 ގެ ޢުދުވާނީ ޙަމަލާއަކީ ، އެމަނިކުފާނުގެ ވެރިކަމާ ކުރިމަތިވި އެންމެ ނުރައްކާތެރި ޙާދިސާއެވެ. އޭގެކުރިންވެސް ، ރައީސް މައުމޫނުގެ ވެރިކަން ބަދަލުކުރުމަށް ބަޣާވާތެއް ރޭވުނެވެ. އެ ބަޣާވާތް ނާކާމިޔާބު ވިއެވެ.
ރައީސް މައުމޫނުގެ ވެރިކަމުގެ ފަހުދުވަސްކޮޅު ، އިޞްލާޙީ މަސައްކަތްތަކެއް ފެށްޓެވިއެވެ. އެހެންނަމަވެސް ، އެމަސައްކަތްތައް ދާންވީ ބާރުމިނުގައި ކުރިޔަށް ގޮއްސައެއް ނެތެވެ. ނަތީޖާއަކަށްވީ ، އިޞްލާޙަށް ފެންބޮވައިގެންފައިތިބި ބަޔެއްގެ މަސައްކަތުން އެމަނިކުފާނުގެ ވެރިކަމަށް ހުރަސްއެޅި ، އެމީހުންގެ ކޮޅު ގަދަވެ ، ވެރިކަމާ ދުރަށް ވަޑައިގަތުމަށް މަޖުބޫރު ވުމެވެ.
މިއަދުވެސް ، ރައީސް މައުމޫނަކީ އިޞްލާޙަށް މަސައްކަތްކުރާ ސިޔާސީ ޕާޓީއެއްގެ ޒަޢީމެކެވެ. އެމް އާރ އެމްގެ ޒަޢީމެވެ. އެމަނިކުފާނުގެ ފަހަތްޕުޅުގައި މިއަދުވެސް ބަޔަކު އެބަތިއްބެވެ. ވެރިކަމުގެ ބާރުތަކުން ކޮންމެވެސް މިންވަރެއް މިއަދުވެސް އެމަނިކުފާނު އެބަ ޙިއްޞާ ކުރައްވައެވެ. އެހެންނަމަވެސް ، އެމަނިކުފާނު އެދިވަޑައިގަންނަވާފަދަ ސިޔާސީ ބާރުތަކެއް ، މިއަދަކު އެމަނިކުފާނުގެ އަތްޕުޅަކު ނެތެވެ. އެއީ މިވަގުތަށް އެމަނިކުފާނަށް މިންވަރުކުރައްވާފައިވާ ޙައްޤު ދަރަޖައެވެ.
