(8 އޭޕްރީލް 2023 ގައި ޝާއިއުކުރި ބަޔާ ގުޅޭ)
އަލް ޢަޒީޒަކީ ، ޙިކުމަތްތެރި އަދި އިންސާފަށް ލޯބިކުރާ މީހެކެވެ. އިތުބާރު ކުރަންވީ ، އޭނާގެ އަނބިކަނބުލޭގެއަށް ކަމެއް ނުވަތަ ޔޫސުފަށް ކަމެއް އޭނާއަކަށް ނޭނގުނެވެ. އެކަމުގައި ވަކިގޮތެއް ނިންމުމަށް ، އަލް ޢަޒީޒުގެ އަނބިކަނބުލޭގެގެ ތިމާގެ މީހެއްގެ ލަފާ ހޯދިއެވެ. އޭނާ ލަފާދިންގޮތުގައި ، ޔޫސުފުގެ ގަމީސް ، ފަހަތުން އިރައިގެންގޮސް ހުރިއްޔާ ޔޫސުފު އެހަދަނީ ތެދެވެ. އަނބިކަނބުލޭގެ އެހަދަނީ ދޮގެވެ. ކުރިމަތިން ގަމީސް އިރައިގެންގޮސް ހުރިއްޔާ ، ޔޫސުފް އެ ހަދަނީ ދޮގެވެ. އަނބިކަނބުލޭގެ އެހަދަނީ ތެދެވެ.
އަލް ޢަޒީޒުގެ އަންހެނުންގެ ތިމާގެމީހާ ދިންލަފަޔަށް ބަލައި ، އެމައްސަލަ ނިންމުނީ ، ޔޫސުފު އެ ހައްދަވަނީ ތެދުކަމުގައެވެ. އަދި ޒުލޭޚާ އެހަދަނީ ދޮގެއްކަމުގައެވެ. މި ހާދިސާއިން ، ޔޫސުފްގެފާނު ސަލާމަތްވެ ވަޑައިގަތެވެ. އެކަމަށްޓަކައި ، ޔޫސުފްގެފާނު އަރިހުން އަލް ޢަޒީޒު މަޢާފަށް އެދުނެވެ. އަދި އެކަން ސިއްރުކޮށްފައި ބޭއްވުމަށް އެދުނެވެ.
އެހެންނަމަވެސް ، ޒުލޭޚާގެ އެ ބަދުއަޚުލާޤީ ޢަމަލުގެ ވާހަކަ ، މީސްތަކުންގެ މެދުގައި ފެތުރިގެން ދިޔައެވެ. އަދި އެކަނބުލޭގެ އެކުރި އަޚުލާޤީގޮތުން ދަށްފެންވަރުގެ ޢަމަލުގެ ވާހަކައިން ، އެކަނބުލޭގެ ލަދުގަންނުވައިލިއެވެ. އެވާހަކަ ނުދައްކާ އަންހެނަކު އެހިސާބުގައި ނެތެވެ. ލަދުވެތިކަމާ ކުރިމަތިވެ ، ވީ ބޭޒާރުގައި އަބުރު ގެއްލިފައިވާ ، ޒުލޭޚާއަށް އެޢަމަލު ހިންގަން މެދުވެރިވީ ، ޔޫސުފްގެ ރީތިކަމާއި ޝާއްބަ ކަމެވެ. އެކަނބުލޭގެ ޔޫސުފްގެފާނުގެ މައްޗަށް ހިތްކީފަދައިން ، އެހެން އަންހެނުންވެސް އެފަދައިންވާނެކަން ، ސާބިތުކޮށްދިނުމަށް ޒުލޭޚާ ނިންމިއެވެ.
އެއްދުވަހަކު ، ކެއުމެއް ތައްޔާރުކޮށް ، އަންހެނުންގެ އެކިއެކި ޖަމާޢަތްތަކަށް ދަޢުވަތުދީ ، ޒުލޭޚާގެ ގަނޑުވަރަށް ގެނައެވެ. މެހެމާނުންނަށް އެންމެ ފުރަތަމަ ހުށަހެޅުނީ މޭވާއެވެ. އެމޭވާހުރީ ނުކޮށައެވެ. އެހެންކަމުން ، މޭވާ ދެވުނީ ވަޅިޔަކާ އެކުގައެވެ. ވަޅިން މޭވާ ފޮތިކަމުން ، ކަމުން އަނގަތަޅަމުން ގެންދިޔަ އަންހެނުންގެ ކުރިމައްޗަށް ޔޫސުފް ގެނެވުނެވެ. ޔޫސުފްގެފާނުގެ ރީތިކަމާއި ފުރިހަމަކަމުގެ މައްޗަށް ، ހުރިހާ އަންހެންވެރިންގެ ކަޅިގޮސް ހުއްޓުނެވެ. އެއެންމެންވެސް ޔޫސުފްގެފާނުގެ ފުރާފުރިހަމަކަމާއި ރީތިކަމުގެ މައްޗަށް އާޝޯޚުވެ ، އަނގަހުޅުވިފައި ތިއްބެވެ. އެއީ ދުނިޔެމަތީގެ ކަމެއްހެންނެއް ހިއެއް ނުވެއެވެ. އެމީހުންނަށް ލިބުނު ޙައިރާންކަމުގައި ، އެބައިމީހުން ކޮށަމުންގެންދިޔަ މޭވާއާއެކު ، އެންމެންގެ އިނގިލި ކޮށެމުންދިޔައިރުވެސް ، އެކަމެއް އެކަކަށްވެސް އިޙްސާސެއް ނުކުރެވުނެވެ. ޒުލޭޚާ ، އެފުރުޞަތުގެ ބޭނުން ހިފުމަށް ނިންމިއެވެ. އެންމެންގެ ސަމާލުކަމަށް ގޮވާލައި އެކަނބުލޭގެ ބުންޏެވެ. ކަލޭމެންގެ ކުރިމަތީގައި އެހުރީ ، އަހަރެންގެ ހިތް ލަންބުވައިލި ، ރީތި ޒުވާނާއެވެ. ކަލޭމެންނަށް ތިޔަވީ އަހަރެންނަށް ވީވަރަށްވުރެ ބޮޑުވަރެކެވެ. އެކަމާ އަހަރެން ލަދުގަންނަން ޖެހޭ ހެއްޔެވެ ؟
ޒުލޭޚާގެ ހިތުގައި ޔޫސުފްގެމައްޗަށް އޮތް ޙަސަދައާއި ، ހިތުގެ އެދުން ފިލައިގެންނެއް ނުދެއެވެ. އެކަނބުލޭގެ ބުނާގޮތެއް ނުހަދާ ކަމަށްވަންޏާ ، ޔޫސުފް ޖަލަށް ލާނެކަމަށް ޒުލޭޚާ ބުންޏެވެ. އޭގެ ޖަވާބުގައި ، ޔޫސުފްގެފާނު ވިދާޅުވިއެވެ.
" ކަމަނާ ތިޔައެދޭ ކަމަށްވުރެ ، ޖަލުގެ އަނިޔާވެސް ތިމަންކަލޭގެފާނުގެ ހިތްޕުޅަށް މާ ފަސޭހައެވެ. "
އެރޭ ނިދާގަޑީގައި ، ޒުލޭޚާ އޭނާގެ ފިރިމީހާ އަލް ޢަޒީޒުގެ ހިތާ ކުޅެލައި އޭނާގެ މުހުތާދު ފުއްދުމަށް ދިމާކުރިއެވެ. އަދި ބުންޏެވެ. " ޔޫސުފްގެ ކަންތަކާ ، ތިމަންކަނބުލޭގެ މިވަނީ ބޭޒާރުވެފައެވެ. ޔޫސުފް ޖަލަށްލައިގެން ނޫނީ ، ތިމަން ކަނބުލޭގެގެ ޢިއްފަތްތެރިކަން ރައްކާތެރިކޮށް ، އަލް ޢަޒީޒުގެ އަބުރާއި ޤަދަރު ހިފެހެއްޓޭނެ ކަމަކަށް ނުފެނެއެވެ. އެންމެފަހުން ، އަލް ޢަޒީޒަށް އެކަން ކުރަން މަޖުބޫރުވެ ، ޔޫސުފްގެފާނު ޖަލުގައި ބަންދު ކުރެވުނެވެ.
ޔޫސުފްގެފާނު ، ޖަލުގައި ހައްޔަރުކުރެވިފައި ހުންނެވި ދުވަސްވަރު ، ހުވަފެން ތަޢުބީރު ކުރެއްވުމުގެ ޢިލްމު ، އެކަލޭގެފާނަށް މާތް ﷲ ދެއްވިއެވެ. އެކަލޭގެފާނު ، ވަރަށް ފުރިހަމަޔަށް ހުވަފެން ތަޢުބީރު ކުރައްވައެވެ.
(ނުނިމޭ)
