(1 އޭޕްރީލް 2023 ގައި ޝާއިއުކުރި ބަޔާ ގުޅޭ)
ނޫޙުގެފާނުގެ ޤައުމުގެ މީސްތަކުންކުރެ ، ބުދަށް އަޅުކަންކުރަމުން އައި މީސްތަކުން ކަންބޮޑުވިއެވެ. ނޫޙޫގެފާނުގެ ޚުތުބާތަކުންނާއި ދީނަށްގޮވައިލެއްވުމުން މީސްތަކުންގެ މެދުގައި ، ޚާއްޞަކޮށް ޤައުމުގެ މުއްސަނދިންގެ މެދުގައި އުފެދިފައިވާ ދެބަސްވުންތައް ދެމިއޮންނަތާ އެތައް ދުވަހެއް ވެއްޖެއެވެ. އެންމެފަހުން ، ނުކިޔަމަންތެރިވިމީހުން ނޫޙުގެފާނަށް ގޮންޖަހައި ދެންނެވިއެވެ.
" އޭ ! ނޫޙުގެފާނެވެ ! ކަލޭގެފާނު ތިމަންމެންނާ ދެބަސްވެވަޑައިގެންފީމުއެވެ. އަދި އެދެބަސްވުން ދިގުދަންމަވައިފީމުއެވެ. ކަލޭގެފާނަކީ ތެދުވެރިޔެއްކަމުގައިވާނަމަ ، ތިމަންމެންނަށް ތިޔަދެއްވާ އިންޒާރުން ސަބަބެއް ދައްކަވާށެވެ. "
ނޫޙުގެފާނު ، އެބައިމީހުންނަށް ޖަވާބުދެއްވިއެވެ. އެކަލާނގެ އިރާދަކުރައްވާ ގޮތެއްގެމަތިން ، ތިޔަބައިމީހުންނަށް ޢަޒާބު ދެއްވާނީ ، މާތް ﷲ އެވެ. ތިޔަބައިމީހުންނަށް އިތުރަށް ވިސްނައިދެއްވަން ތިމަންކަލޭގެފާނު ތައްޔާރަށް ހުންނެވިނަމަވެސް ، ތިމަންކަލޭގެފާނުގެ ބަސްތަކުން ތިޔަބައިމީހުންނަށް ފައިދާއެއް ނުކުރިނަމަ ، ﷲ އެދިވޮޑީގެންވާ ގޮތެއްގެމަތިން ، ތިޔަބައިމީހުންނަށް ޢަޒާބު ދެއްވާނެއެވެ. އެކަލާނގެއީ ތިޔަބައިމީހުންގެ ވެރި ރަސްކަލާނގެއެވެ. ތިޔަބައިމީހުން އެނބުރިދާހުށީ އެކަލާނގެ ހަޟުރަތަށެވެ.
ނޫޙުގެފާނުގެ ޤައުމުގެ މީހުންކުރެ ، އެކަލޭގެފާނަށް ނުކިޔަމަންތެރިވި މީސްތަކުންގެ ކެތްތެރިކަން ކޮޅުންލިއެވެ. އިސްލާމްދީން ފެތުރުއްވުމަށް ، އެކަލޭގެފާނު ކުރައްވަމުންގެންދެވި މަސައްކަތްޕުޅަށް ހުރަސްއެޅުމަށް އެބައިމީހުން ނިންމިއެވެ. އަދި ، އެކަލޭގެފާނުވަނީ ގެއްލުމެއްގެ ތެރޭގައިކަމުގައި އެބައިމީހުން ބުންޏެވެ. އެކަލޭގެފާނު އެބައިމީހުންނަށް ވިދާޅުވިއެވެ. އޭ ! ޤައުމުގެ މީސްތަކުންނޭވެ ! ތިމަންކަލޭގެފާނު ވަނީ ގެއްލުމެއްގެ ތެރެޔަކުނޫނެވެ. ތިމަންކަލޭގެފާނަކީ ، ޢާލަމްތައް ހައްދަވާ އުފަންކުރެއްވި މާތް ﷲ ފޮނުއްވި ރަސޫލަކީމެވެ. ތިމަންކަލޭގެފާނުގެ މަސްއޫލިއްޔަތަކީ ، ﷲ ގެ ޙައްޤު ބަސްފުޅު ، ތިމަންކަލޭގެފާނުގެ ޤައުމުގެ މީހުންނަށް ރައްދުކުރައްވައި ، އެބައިމީހުންނަށް ނަސޭޙަތްތެރިވެ ވަޑައިގެން މަގު ދެއްކެވުމެވެ. އެބައިމީހުންނަށް އެނގިގެންނުވާ އެތައްކަމެއް ، ﷲ ގެ ޙަޟުރަތުން ތިމަންކަލޭގެފާނަށް އެނގިވަޑައިގެން ވެއެވެ.
ނޫޙުގެފާނުގެ ޤައުމުގެ މީސްތަކުން އެކަލޭގެފާނަށް ދުއްތުރާކޮށް ، ނުކިޔަމަންތެރިކަން ދައްކަމުން ދިޔައެވެ. އެހެންކަމާއެކުވެސް ، އިސްލާމްދީނަށް ގޮވައިލެއްވުމުގައި ، 950 އަހަރު ، އެކަލޭގެފާނު ހޭދަކުރެއްވިއެވެ. އެހެންނަމަވެސް ، ޖީލަކަށްފަހު ޖީލެއް އައިސް ނިމިދިޔައިރުވެސް ، ކާބަފައިންނެކޭ އެއްގޮތަށް ، އެކަލޭގެފާނުގެ ޤައުމުގެ މީހުން އައީ އެކަލޭގެފާނާ ދެކޮޅުވެރިވެ ، އިދިކޮޅު ހަދަމުންނެވެ. ބާލިޣުވެ ބުއްދި ފުރިހަމަވާ ކޮންމެ ކުއްޖަކަށްވެސް ، އެކަލޭގެފާނުގެ ބަސްފުޅު ދޮގުކޮށް ، އެކަލޭގެފާނާ ދުރުހެލިވުމަށް އިންޒާރު ކުރަމުން އައެވެ. މީސްތަކުންނަށް ނަސޭޙަތް ދެއްވުމަށް ، އެކަލޭގެފާނު ވަޑައިގަންނަވާހިނދު ، އެކަލޭގެފާނު ދޫކޮށް ފިލަން ދުވައެވެ. އެކަލޭގެފާނާ ދުރުހެލިވުމަށް އެތައް ސަބަބުތަކެއް އެބައިމީހުން ދައްކަމުން ގެންދިޔައެވެ.
ދުވަސްތައް ފާއިތުވަމުންގޮސް ، އެކަލޭގެފާނާ ދެކޮޅުވެރި މީސްތަކުންގެ ޢަދަދު އިތުރުވަމުންދާތަން ، ނޫޙުގެފާނަށް ފެނިވަޑައިގަތެވެ. އެހެންނަމަވެސް ، އެކަލޭގެފާނަށް ތަބާވީމީސްތަކުން ސާބިތުކަމާއެކު ، އެކަލޭގެފާނާއެކު ތިއްބެވެ. އެބައިމީހުންގެ ޢަޤީދާއަކަށް ބަދަލެއް ނާދެއެވެ. އެކަލޭގެފާނާ ދުރުހެލިވާމީހުންގެ ޢަދަދު މަތިވަމުން ދިއުމާގުޅިގެން ، އެކަލޭގެފާނު ކަންބޮޑުވެވަޑައިގަތެވެ. ﷲ ގެ ޙަޟުރަތުން ، އެބައިމީހުންނަށް މުޞީބާތެއް ފޮނުއްވައިފާނެތީއެވެ. އެހެނަސް ، އެކަމުގައި އެކަލޭގެފާނު ކުރައްވާނެ ކަމެއްނެތެވެ. އިތުރުގޮތެއް އެކަލޭގެފާނަށް ފެނިވަޑައެއް ނުގެންނެވިއެވެ.
ނޫޙުގެފާނު ، ﷲ ސުބްޙާނަހޫވަތަޢާލާއަށް ދުޢާ ދެންނެވިއެވެ.
ހައްދަވާ ބޮޑުކޮށް ގެންގުޅުއްވާ މަތިވެރި އިލާހު ! ތިމަންކަލޭގެފާނުގެ ޤައުމުގެ މީސްތަކުން ތިމަންކަލޭގެފާނަށް ނުކިޔަމަންތެރިވެއްޖެއެވެ. ތިމަންކަލޭގެފާނަށް ކިޔަމަންތެރިވީމީސްތަކުންނާއި އެބައިމީހުންގެ ދަރިފަސްކޮޅާއި އެބައިމީހުންގެ މިލްކުވެރިކަން އިތުރެއް ނުވެއެވެ. ހައްތާވެސް ދަނީ މަދުވަމުންނެވެ. ތިމަންކަލޭގެފާނުގެ އަހުލުވެރިންނަށް އަނިޔާވެރިވަމުން އެބައިމީހުން ބުނަމުން ގެންދިޔައެވެ. ތިޔަބައިމީހުން ، ތިޔަބައިމީހުންގެ ކަލާނގެ ދޫކޮށެއް ނުލަމުއެވެ. އަދި ކިއެއް ހެއްޔެވެ ؟ ތިމަންމެން އަޅުކަންކުރާ ބުދުތަކެއްވެސް ދޫކޮށެއް ނުލެވޭނެއެވެ. އެބައިމީހުން އެވަނީ ހަލާކެއްގެ ތެރޭގައެވެ. ހައްދަވާ ބޮޑުކުރައްވާ އިލާހު ! ތިމަންކަލޭގެފާނަށް ނުކިޔަމަންތެރިވާމީހުން ގިނަ ނުކުރައްވާނދޭވެ !
ނޫޙުގެފާނުގެ ޤައުމުގެ މީސްތަކުންކުރެ ، އެހާތަނަށް އީމާންވީ މީހުން ފިޔަވާ އިތުރު މީހަކު އެކަލޭގެފާނަށް އީމާން ނުވާނެކަން ، ﷲ ގެ ޙަޟުރަތުން ، އެކަލޭގެފާނަށް އެންގެވިއެވެ. ﷲ ގެ ވަޙީބަސްފުޅާ ގުޅިގެން ، އެކަލޭގެފާނު ދެރަފުޅުވެވަޑައިގެން ، ﷲ އަށް އީމާންނުވާ މީހުންކުރެ އެކަކުވެސް ، ދުނިޔޭގައި މިބިންމަތީ ނުލެއްވުންއެދި ﷲ އަށް ދުޢާ ދެންނެވިއެވެ. އެބައިމީހުން ދުނިޔޭގައި އުޅުމަށް ދޫކޮށްލައްވައިފިނަމަ ، މިބިން ފަސާދަކޮށް ، ﷲ ގެ އަޅުތަކުން ކިޔަމަންތެރިކަމުން އެއްކިބާކޮށް ، ގެއްލި ހަލާކުވެފައިވާ މީހުންގެ ތެރެޔަށް ދާނެއެވެ.
ނޫޙުގެފާނު ކުރެއްވި ދުޢާ ، ﷲ ޤަބޫލުކުރެއްވިއެވެ. އަދި ނޫޙުގެފާނުގެ ނާކޮޅު ބެންނެވުމަށް އެންގެވިއެވެ. އަދި ގެއްލެނިވެގެންވާ މީހުންގެ ނަން ، ﷲ ގެ ޙަޟުރަތުގައި ނުގެންނެވުމަށް އެންގެވިއެވެ.
(ނުނިމޭ)
