މަޖިލީހަށް ފޮނުވާ ބައެއް ބިލު މަޑުޖެހިފައިވާތީ ރައީސް މުހައްމަދު ނަޝީދުގެ ފާޑުކިޔުން ސަރުކާރަށް އަމާޒުކުރައްވައިފިއެވެ.
ރައީސް ނަޝީދު ވަނީ މަޖިލީހުގެ ކޮމިޓީތަކަށް ދިއުމުގެ މަގުމަތީގައި ގިނަ ބިލުތަކެއް ހުރިއިރު، ނުނިމި ކޮމެޓީތަކުގައި އެތައް ބިލުތަކެއް ހުރިކަން ފާހަގަކުރައްވާފައެވެ.
މަޖިލިސް ރައީސް ވިދާޅުވީ ބައެއް ބިލުތަކުގެ މަސައްކަތް ލަސްވަނީ ސަރުކާރުން ވަކި ގޮތަކަށް އެ ބިލުގެ މަސައްކަތް ކުރިއަށް ގެންދާން ބޭނުންވެގެން ކަމަށެވެ.
"މަޖިލީހުގެ ކޮމިޓީތަކުގައި ބިލުތައް އެބަހުރި، ބައެއް ފަހަރަށް ބައެއް ބިލު މަޑުޖެހިފައި މިހުންނަނީ، ސަރުކާރުން ވަކި ގޮތަކަށް އެ ބިލު ގެންދާން ބޭނުންވެގެން، ދެން އެއަށްފަހު ސަރުކާރުގެ ފޮލޯއަޕް ނުލިބި ލަސްވެގެންދަނީ،" ރައީސް ނަޝީދު ވިދާޅުވިއެވެ.
ގާނޫނުތަކަށް އިސްލާހު ގެންނަން ހުށަހަޅާފައިވާ ކުދިކުދި ބިލުތައް ވެސް ގިނަ އަދަދަކަށް މަޖިލީހުގައި އެބަހުރިކަން ފާހަގަކުރައްވާ ރައީސް ނަޝީދު ވަނީ އެ ބިލުތަކުގެ މަސައްކަތް ނިންމާނެ ސުންގަޑިއެއް ދެއްވުމަށް މެންބަރުންގެ އަރިހުން އެދިވަޑައިގެންފައެވެ.
ރައީސް ނަޝީދު އިތުރަށް ވިދާޅުވީ ތަޅުމުގައި ބަހުސްކޮށް ނިމި، ކޮމެޓީތަކަށް ފޮނުވުމަށްޓަކައި މަޖިލީހަށް ބަލައިގަތުމުގެ މަރުހަލާގައި ނުވަ ބިލެއް އެބަ އޮތް ކަމަށެވެ.
