ރާއްޖޭގެ އަމިއްލަ ކުންފުންޏެއް ކަމަށްވާ އެންސިސްގެ ފުރަތަމަ މަސްކާރުޚާނާ ހުޅުމާލޭގައި މިއަދު ޅުވައިފިއެވެ. މިތަން ހުޅުއްވައިދެއްވީ ރައީސްހުލ އިބްރާހީމް މުޙައްމަދު ޞާލިޙެވެ.
މަސްކާރުޚާނާގެ އިތުރަށް އައިސް ޕްލާންޓެއް ވެސް މިއަދުވަނީ ހުޅުވައިފައެވެ. މިއީ އެކުންފުނިން ކޮށްފައިވާ 25 މިލިއަންޑޮލަރުގެ އިންވެސްޓްމެންޓެކެވެ. މަސްކާރުޚާނާ ހުޅުއްވައި ދެއްވި ރަސްމިއްޔާތުގައި ވާހަކަފުޅު ދައްކަވަމުން ރައީސް އިބްރާހީމް މުޙައްމަދު ޞާލިޙު ވިދާޅުވީ މިއަދަކީ އެންސިސްގެ ތާރީޚުގައި ވަރަށް މަތިވެރި ކާމިޔާބީއެއް ޙާޞިލުކުރި އުފާވެރި ދުވަހެއްކަމަށެވެ.
އެކުންފުނިން ހުޅުވި 100 ޓަނުގެ އައިސްޕްލާންޓަކީ މަސްވެރިންނަށް އިތުރު ފަސޭހަތަކެއް ލިއްބައިދިނުމުގެ ގޮތުން ގާއިމްކުރި ޕްލާންޓެވެ.
އެންސިސްގެ މަސްކާރުޚާނާއާއި އައިސްޕްލާންޓާ ބެހޭ ގޮތުން ރައީސް ވިދާޅުވީ އެއީ ރާއްޖޭގެ ކުރިއެރުމުގައި ރައްޔިތުންގެ ބައިވެރިވުމާއި، ރައްޔިތުންގެ އިސްނެގުމުގެ ވަރަށް ރީތި މިސާލެއްކަމަށެވެ. ރާއްޖޭގެ މަސްވެރިކަމުގެ ޞިނާޢަތުގައި މިހާރު އެންމެ ބާރު ދުވެލީގައި ކުރިއަރަމުން އަންނަ އަމިއްލަ ކުންފުންޏަކީ، އެންސިސް ކަމާމެދު އެއްވެސް ޝައްކެއް ނެތް ކަމަށް ވެސް ރައީސް ވިދާޅުވިއެވެ.
"އެންސިސްއަކީ، ރާއްޖޭގެ މަސްވެރިކަމުގެ ޞިނާޢަތުގައި، ކިހާ މުހިންމު ދައުރެއް އަދާކުރާ، ކިހާ ޤާބިލް ކުންފުންޏެއްކަން، އެންމެ ރަނގަޅަށް އެނގޭ ބަޔަކީ ހަމަގައިމުވެސް ދިވެހި މަސްވެރިން. ދިވެހި މަސްވެރިންނަށް މި ކުންފުނިން ފަހިކޮށްދީފައިވާ ވަސީލަތްތަކާއި ލުއިފަސޭހަތަކަކީ، ރާއްޖޭގެ އިޤްތިޞާދީ ތަރައްޤީއަށްޓަކައި ވަރަށް މުހިންމު ކަންތައްތަކެއް." ރައީސް ވިދާޅުވިއެވެ.
އެންސިސް ކުންފުނިން ބުނެފައިވަނީ މި ކާރުޚާނާއާ ގުޅިފައިވާ އެހެން ވަސީލަތްތަކާއެކު، 400 އަށްވުރެ ގިނަ ދިވެހިންނަށް ވަޒީފާގެ ފުރުސަތު ހުޅުވިގެންދާނެ ކަމަށެވެ. އޭގެ ތެރެއިން 175 ވަޒީފާއަކީ އަންހެނުންނަށް ޚާއްސަ ވަޒީފާ ނުވަތަ ފުރުސަތުތަކެވެ.
