މަގުމަތީގައި އުޅޭއިރު ކުޑަކުދިންނާއި ދުވަސްވީ މީހުންނާއި ނުކުޅެދުންތެރިކަން ހުންނަ މީހުންނަށް ޚާއްސަ ސަމާލުކަމެއް ދިނުމަށް ޖެންޑަރ މިނިސްޓްރީން އިލްތިމާސް ކުރައްވައިފިއެވެ.
އެމިނިސްޓްރީން މިކަމަށް އިލްތިމާސް ކުރެއްވީ މާލެއަށް ބޯކޮށް ވާރޭވެހި ފެންބޮޑުވެފައިވާތީ މަގުމަތީގައި އުޅޭއިރު ރައްކާތެރިވުމަށް އެދި ކުރައްވާފައިވާ ޓްވީޓެއްގައެވެ. "ބޯކޮށް ވާރޭވެހި މާލޭގެ އެކި ސަރަޙައްދު ތަކުގައި ފެންބޮޑުވެފައިވާތީ މަގުމަތީގައި އުޅޭއުޅުމުގައި ރައްކާތެރިވުމަށް ދަންނަވަން. ވަކިން ޚާއްސަކޮށް ކުޑަކުދިންނާއި ނުކުޅެދުންތެރިކަން ހުންނަ ފަރާތްތަކާއި ޢުމުރުން ދުވަސްވީ މީހުންނަށް ޚާއްސަ ސަމާލު ކަމެއް ދެއްވުމަށް ދަންނަނަވަން،" ޖެންޑަރ މިނިސްޓްރީގެ ޓްވިޓަރގައި ވިދާޅުވެފައިވެއެވެ.
ރޭދަންވަރު މާލެއަށްކުރި ވިއްސާރާގައި ބައެއް ސަރަޙައްދުތަކުގައި ވަނީ ފެންބޮޑުވެ ބައެއް ގޭގެއަށް ފެންވަދެފައެވެ. ފެންވަނަ ނުދިނުމަށްޓަކައި ސިފައިންވަނީ ފެންކުމުގެ މަސައްކަތް ފަށައި ބައެއް ހިސާބުތަކުގައި ވެލި ބަސްތާތައް ވެސް ޖަހައިފައެވެ.
މެޓު އޮފީހުން ވަނީ މާލޭ ސަރަޙައްދަށް ބޯކޮށް ވާރޭވެހޭނެ ކަމަށް ބުނެފައެވެ.
