ނަފްސާނީ ބަލީގެ މީހުން ތަހައްމަލު ކުރަމުންދާ އުނދަގޫތައް އެނގިވަޑައިގަންނަވާ ކަމަށާއި އެ ބުރަ އެކަނި ނުއުފުލުމަށް ރައީސް އިބްރާހީމް މުޙައްމަދް ޞާލިޙް އިލްތިމާސް ކުރައްވައިފިއެވެ. ރައީސް މިކަމަށް އިލްތިމާސް ކުރެއްވީ މިއަދު އައިޖީއެމްއެޗުގައި ސެންޓަރ ފޮރ މެންޓަލް ހެލްތު ހުޅުވުމުގެ ރަސްމިއްޔާތުގައި ވާހަކަފުޅު ދައްކަވަމުންނެވެ. ނަފްސާނީ ބަލީގެ އުނދަގޫތައް ތަހައްމަލު ކުރަމުންދާ މީހުން ނަފްސާނީ ބަލީގެ ތަޖުރިބާކާރެއްގެ އެހީ ހޯއްދެވުމަށް އެމަނިކުފާނު އެދިވަޑައިގެންނެވިއެވެ.
ރައީސް ވިދާޅުވީ ނަފްސާނީ ބަލި ތަހައްމަލު ކުރާ ގިނަ މީހުންނަށް އެ މީހުންގެ ހާލަތު ބުނެދޭން ނޭނގޭ ކަމަށެވެ. އަދި މުޖުތަމައުން އެކަމާ މެދު ދެކޭނެ ގޮތް ހިތަށް އަރާފައި އެކަަމަށް ފަރުވާ ހޯދަން ޖެހިލުންވާ ކަން ވެސް އެމަނިކުފާނު ފާހަގަކުރެއްވިއެވެ.
"މިއަދު މި ހުޅުވާ މަރުކަޒުގެ އެންމެބޮޑު ބޭނުމަކީ ވަށައި ޖެހޭ ިޒާމެއްގެ ތެރެއިން، ގައުމީ ފެންވަރުގައި ނަފްސާނީ ބަލީގެ މީހުންނަށް އޯގާތެރިކަމާ އެކު ފަރުވާ ކުރެވޭނެ އިންތިޒާމު ހަމަޖެއްސުން". ރައީސް ވިދާޅުވިއެވެ. އެބަލީގެ ތަޖުރިބާކާރުންނަށް ދެއްކުމަށް ނަން ނޯޓުކޮށްފައިވާ ލިސްޓު ދިގު ކަން ފާހަގަކުރައްވަމުން އެމަނިކުފާނު ވިދާޅުވީ މިއަދު ހުޅުވުނު މަރުކަޒުން ބަލި ތަހައްމަލު ކުރަމުންދާ މީހުންނަށް ކުރިމަތިވާ އުނދަގޫތަކަށް ކޮންމެވެސް ވަރެއްގެ ލުޔެއް ލިބިގެންދާނެ ކަމަށެވެ.
މިއަދު ހުޅުވުނު މަރުކަޒުގެ ޚިދުމަތް އިތުރަށް ފުޅާ ކުރުމަށްޓަކައި ތަޖުރިބާ ލިބިފައިވާ ޑަކްޓަރުންނާއި އެހެނިހެން ފަންނީ މީހުން ތަމްރީނު ކުރުމަށް ސަރުކާރުން ވަރަށް ބޮޑު އިސްކަމެއް ދެއްވާނެ ކަމަށް ރައީސް ވިދާާޅުވިއެވެ. އެގޮތުން މިދިޔަ ހަފްތާގައި ސަރުކާރުން އިއުލާން ކުރެއްވި މަތީ ތައުލީމު ލޯނު ސްކީމުގައި ވެސް ނަފްސާނީ ބަލީގެ ސްޕެޝަލިސްޓުން ތަމްރީނު ކުރުމަށް ބޮޑު އަދަދެއް ކަނޑައަޅާފައިވާނެ ކަމަށްވެސް ވިދާޅުވިއެވެ.
ނަފްސާނީ ބައްޔަކީ އެހެން ބަލިތައްޖެހޭ ފަދައިން ޖެހޭ ބައްޔެއްކަން ފާހަގަކުރައްވަމުން ރައީސް ވިދާޅުވިއެވެ. "ނަފްސާނީ ބައްޔެއްގެ އަސަރުކޮށްފައިވާ މީހާ ވެސް އެކަށީގެންވާ ފަރުވާ ހޯދުމުން ލުޔެއް ލިބޭނެ. މިކަމުގައި އަޅުގަނޑު އެންމެ ދެރަވަނީ ބަލި ތަހައްމަލު ކުރާ މީހުން ފަރުވާ ހޯދުމަށް އުޅޭ ހިތްދަތި ހާލާ މެދު."
ކޮންމެ މީހަކަށް ވެސް ނަފްސާނީ ބަލީގެ އަސަރުކޮށްފާނެ ކަމަށާއި އެ ބަލި ޖެހުމަކީ މީޙާ ދެރަވުން ނުވަތަ އުނިކަމެއް އައުން ނޫންކަމަށް ވެސް އެމަނިކުފާނު ވިދާޅުވިއެވެ.
އައި.ޖީ.އެމް.އެޗްގައި ޤާއިމުކޮށްފައިވާ މެންޓަލް ހެލްތު ސެންޓަރުން ފޯރުކޮށްދޭ ޚިދުމަތްތަކު ތެރޭގައި އޯޕީޑީގައި ބަލިމީހުން ބެލުމާއި، އެނދުމަތިކޮށްގެން ދެވޭ ފަރުވާ ދިނުން ހިމެނެއެވެ. އަދި އަވަސް ފަރުވާއަށް ބޭނުންވާ ބަލި މީހުންނަށް ފަރުވާދިނުމުގެ އިތުރުން ނަފްސާނީ ބަލިތައް ވަޒަންކުރުމާއި، ބަލި ދެނެގަތުމާއި، ބޭހުގެ އެހީގައި ފަރުވާދިނުމާއި، ސައިކޮލޮޖިކަލް ޚިދުމަތްތަކާއެކު ފަރުވާ ދިނުމާއި، ރީހެބިލިޓޭޝަން އަދި އޮކިއުޕޭޝަނަލް ތެރަޕީ ދިނުން ފަދަ ތާފާތު އެކި ޚިދުމަތްތައް ހިމެނެއެވެ.
މީގެ އިތުރުން ސަރަޙައްދީ ހޮސްޕިޓަލްތަކާ ގުޅިގެން، އައުޓްރީޗް ސްޕެޝަލިސްޓް ޚިދުމަތްވެސް މި ސެންޓަރުން ފޯރުކޮށްދޭނެއެވެ. އަތޮޅު އަދި ރަށު ފެންވަރުގައި މި ސެންޓަރުގެ ޚިދުމަތް ލިބޭނެ ގޮތަށް، ކޮންމެ އަތޮޅެއްގައި މެންޓަލް ހެލްތްކެއަރ ކޯޑިނޭޓަރުން ބޭތިއްބުމަށް ވެސް ސަރުކާރުން މިހާރު ވަނީ ނިންމަވާފައެވެ.
