ގައުމެއްގައި އަދުލުވެރިކަމާއި އިންސާފުނެތް ކަމަށްވާނަމަ ރައްޔިތުން ބޭނުންވާ އެއްވެސް ކަމެއް ހާސިލް ނުވާނެ ކަމަށް ރައްޔިތުންގެ މަޖިލީހުގެ ގަމުދާއިރާގެ އެމްޑީޕީ މެންބަރު ފައްޔާޒު އިސްމާއީލް މިރޭ ވިދާޅުވެއްޖެއެވެ.
ގުޅިފައިވާ ޕާޓީތަކުން ލ.ތުނީޑީ ބަދަރު ސަރަހައްދުގައި މިރޭ ބޭއްވި ޖަލްސާގައި ވާހަކަ ދައްކަވަމުން އޭނާ ވިދާޅުވީ އިދިކޮޅު ފަރާތްތަކުން ތެދުވެ މަސައްކަތް ކުރަން ފެށީ މިގައުމުގައި އަދުލުވެރިކަމާއި އިންސާފު ގާއިމް ކުރުމަށް ކަމަށެވެ. އެކަން ރީތިކޮށް ކުރުމަށް ލިބޭ އެންމެ ރަނގަޅު ފުރުސަތަކީ ސެޕްޓެމްބަރު 23 ގައި ނަގާ ވޯޓު ކަމަށް އޭނާ ވިދާޅުވިއެވެ.
"އަޅުގަނޑުމެން ބޭނުންވާ އެއްވެސް ކަމެއް ހާސިލެއް ނުވާނެ އެ ގައުމެއްގައި އަދުލާއި އިންސާފު ނެތިއްޔަކާ. އެހެންވެގެން އަޅުގަނޑުމެން އެކަމާ ތެދުވީ، ގުޅިފައިވާ ޕާޓީތައް އެކަމުގައި ތެދުވީ އެހެންވެގެން،" ފައްޔާޒް ވިދާޅުވިއެވެ.
އެތައް އަނިޔާއެއް ތަހައްމަލް ކުރަމުން ރައްޔިތުން އެދަނީ ގައުމުގައި އިންސާފުނެތިގެން ކަމަށް ވެސް އޭނާ ވިދާޅުވިއެވެ. "އިންސާފުނެތިއްޔާ އަޅުގަނޑުމެންނަށް އަމިއްލަކަންކަން ވެސް ފުރިހަމައަށް ނުކުރެވޭ. ފާއިތުވަމުން މިދާ ފަސް އަހަރުތެރޭގައި ގައުމުން އިންސާފު ގެއްލި އިގްތިސާދު މިއޮތީ ފުނޑުފުނޑު ވެފައި،" ފައްޔާޒު ވިދާޅުވިއެވެ. ކުދި އަދި މެދުފަންތީގެ ވިޔަފާރިތައް ދަނީ ފުނޑުފުނޑުވަމުން ކަމަށް ވެސް ވިދާޅުވިއެވެ.
ގުޅިފައިވާ ޕާޓީތަކުގެ ވެރިކަމެއްގައި އަމިއްލަ ރަށުގައި ތިބެގެން އަސާސީ ޚިދުމަތްތަކާއި ކުރިއަރަން ބޭނުންވާ މަސައްކަތްތައް ކުރެވޭނެ ޖާގައާއި ވިޔަފާރި ކުރުމުގެ ޖާގައާއި މުއްސަދިކަން އިތުރު ކުރެވޭނެ ޖާގަ އެސަރުކާރުން ލިބޭނެ ކަމަށް ވެސް ފައްޔާޒު ވިދާޅުވިއެވެ.
