ސްރީލަންކާގައި މި މާރިޗު މަހުގެ 6 ވަނަ ދުވަހު އިއުލާންކުރި ކުއްލި ނުރައްކަލުގެ ހާލަތު މިއަދު އުވާލައިފިއެވެ. މިކަން އެމަނިކުފާނުގެ ރަސްމީ ޓްވިޓާ އެކައުންޓު މެދުވެރިކުރައްވައި މިއަދު ހެނދު އިއްލާންކުރައްވަމުން ރައީސު މައިތުރިޕާލާ ސިރިސޭނާ ވިދާޅުވީ "އާއްމު ރައްޔިތުންގެ ސަލާމަތީ ކަންކަން މިހާރު ހުރި ގޮތް ބަލައި ދިރާސާކުރުމަށް ފަހު، ރޭ މެންދަމުން ފެށިގެން ކުއްލި ނުރައްކަލުގެ ހާލަތު އުވާލަން އަހަރެން ވަނީ އަންގާފައި."
ރައީސު ސިރިސޭނާ އެގައުމުގައި ކުއްލި ނުރައްކަލުގެ ހާލަތު އިއުލާންކުރެއްވީ މި މާރިޗު މަހުގެ ކުރީކޮޅު ސެންޓްރަލް ޕްރޕޮވިންސްގެ ކެންޑީގައި މުސްލިމުންނާ ބުޑިސްޓުންނާ ދެމެދު ފެށުނު ހަމަނުޖެހުންތައް ކޮންޓްރޯލް ކުރެއްވުމަށެވެ. ކުއްލިނުރައްކަލުގެ ހާލަތުގެ ދަށުން ކެންޑީގައި ކާފިއު ހިންގައި ފުލުންނާއި ސިފައިންނަށް އިތުރު ބާރުތައް ދީފައި ވެއެވެ. އަދި ސްރީލަންކާގައި ސޯޝަލް މީޑިއާގެ ވަސަލަތްތައް ބޭނުންކުރުން މަނާކޮށްފައި އޮތެވެ.
ކެންޑީއާއި އެރަށުގެ ވަށައިގެންވާ އަވަށްތަކުގައި ހިނގި ހަމަނުޖެހުންތަކުގައި މުސްލިމުންގެ އެތައް ސަތޭކަ ގެއެއްގައި ރޯކޮށްލައި 20 މިސްކިތަށް ގެއްލުންދީފައި ވިޔަސް، މީހުން މަރުވެފައި ވަނީ ވަރަށް މަދު އަދަދަކަށެވެ. ހަމަނުޖެހުންތަކާ ގުޅިގެން މަރުވިކަން އެނގިފައި ވަނީ އެންމެ 2 މީހުންނެވެ.
ފާއިތުވި އަހަރުއްސުރު އެ ސަރަހައްދުގައި މުސްލިމުންނާ ބުޑިސްޓުންނާ ދެމެދު ނުތަނަވަސްކަން އައީ އިތުރުވަމުންނެވެ. އެއީ، ގަދަކަމުން ބުޑިސްޓުން އިސްލާމްދީނަށް ވައްދަން މަސައްކަތްކުރާ ކަމަށާއި، ބުޑިސްޓުންގެ އާސާރީ ތަންތަނަށް މުސްލިމުން ގެއްލުންދޭކަމަށް ހަރުކަށި ވިސްނުމުގެ ބުޑިސްޓުން ތުހުމަތުކުރަން ފެށުމުންނެވެ.
އަދި ރޮހިންޔާ މުސްލިމުން ރެފިއުޖީންގެ ގޮތުގައި ސްރީލަންކާއަށް އެތެރެވާތީވެސް ހަރުކަށި ބުޑިސްޓު ޖަމާއަތްތަކުން ވަނީ ކަންބޮޑުވުން ފާޅުކޮށްފައެވެ.
ޚަބަރު: ރޮއިޓަރސް
