ރައްޔިތުންގެ މަޖިލީހުގެ 12 މެމްބަރެއްގެ ގޮނޑި ގެއްލުވައިލުމަކީ އިލެކްޝަންސް ކޮމިޝަނަރު ރައްޔިތުންނަށްދިން އަނިޔާއެއް ކަމަށް ކާށިދޫ ދާއިރާގެ މަޖިލިސް މެމްބަރު ފައިސަލް ނަސީމް ވިދާޅުވެއްޖެއެވެ.
ވީޓީވީގެ ޕްރޮގްރާމެއްގައި ވާހަކަ ދައްކަވަމުން އޭނާ ވިދާޅުވީ މެންބަރުންގެ ގޮނޑި ގެއްލިއްޖެ ކަމަށް ކަނޑައެޅުމަކީ އިލެކްޝަންސް ކޮމިޝަނަރުގެ ޒިންމާއެއް ނޫން ކަމަށެވެ. އެކަން ނިންމާނީ ގާނޫނުއަސާސީގައިވާ ގޮތުގެ މަތިން ކަމަށެވެ. މެންބަރުން ތަކެއްގެ ގޮނޑި ގެއްލުވާލައިފައިވާތީ އެކަންކަމާމެދުވެސް ދައުވާ ކުރެވޭނެ ދުވަހެއް އަންނާނެ ކަމަށް އޭނާ ވިދާޅުވިއެވެ.
ފައިސަލް ނަސީމް ވިދާޅުވީ ރައްޔިތުންގެ މަޖިލީސްގެ މެންބަރުނަކީ ރައްޔިތުން ކަމަށެވެ. އެހެންކަމުން 12 މެންބަރުންގެ ގޮނޑި ގެއްލުވައިލުމަކީ ފަސްދޮޅަހަކަށް ހާސް ރައްޔިތުންނަށް ޖެއްސުން ކުރެއްވުން ކަމަށެވެ. "ރައްޔިތުންގެ މަޖިލީހުގެ މެންބަރެއްގެ ގޮނޑިއާމެދު ޝައްކު އުފެދި ސުވާލު އުފެދިއްޖެނަމަ އެކަން ނިންމާނެގޮތް ގާނޫނުއަސާސީގައި އެބައޮތޭ. އެނޫން ގޮތަކަށް އެކަމެއް ނުކުރެވޭނެ،" ފައިސަލް ވިދާޅުވިއެވެ.
"އެހެންވީމާ އެއީ ރައްޔިތުންނަށްދިން އަނިޔާއެއް. ރައްޔިތުންތަކެއްގެ ހައްގެއް ނިގުޅައިގަތީ. މެންބަރުންގެ ޒިންމާ ތަކުން ދުރުކޮށް ދިން އަނިޔާއެއް އެއީ. އެކަމަށްވެސް ދައުވާ ކުރެވޭނެ ދުވަހެއް އަންނާނެ. އެހެންވީމާ އަޅުގަނޑު ދަންނަވަން ހެޔޮމަގަށް ރުޖޫއަށްވާން. އެހެންނޫނީ ރައްޔިތުންނަށް ލިބިފައިވާ ހައްގުގެ ބޭނުންކޮށްގެން ރައްޔިތުން ނުކުންނާނެ،" ފައިސަލް ވިދާޅުވިއެވެ.
