( 24 ފެބްރުއަރީ 2026 ގައި ޝާއިޢުކުރި ބަޔާގުޅޭ )
ސައިމްގެ ކާފަ ބަލިވެގެންނޭ ކިޔާފައި ކާފަގާތަށްސައިމް ފޮނުވައިލަން ، ފާއިޤާއާއި އިބްރާހީމާ ދެމަފިރިން ރޭވި ރޭވުން ކާމިޔާބު ވިއެވެ. ދާންނުދާން ހުރެފައި ، ކާފަވީމަ ސައިމްއަކަށް މާގިނަ ބަހަނާއެއް ނުދެއްކުނެވެ. ދިއުމުގެ ކުރިން އެންމެ ފަހަރަކު ނަމަވެސް ޒުބާއަށް ފޯނުކޮށްލަން އެދުނީމަވެސް ، ފާއިޤާ އެކަމަށް ހުއްދައެއް ނުދިނެވެ. އެކަން އެނގިއްޖިއްޔާ އަނެއްކާވެސް ޒުބާއަށް ލިބޭނީ އިތުރު ތަކުލީފެއްކަމަށް ބުނެ ، ފާއިޤާއަށް ސައިމް ހައްލައި ލެވުނެވެ.
ކާފަމެންގެޔަށް ދާންވެގެން ސައިމް ކާރަށް އަރައަރާ އޮއްވައި ، ޒުބާމެންގެޔާ ދިމާލަށް ބަލައިލިތަނުން ޒުބާއަށްވެސް ޓެރަސްއަށް އެރުނު ވަގުތެއްވީމަ ، ދެމީހުން ދިމާވިއެވެ. ސައިމް އެދާތާކަށްގޮސް ފޯނުކޮށްލާނެކަމަށް ޢިޝާރާތުން ބުނެލިއެވެ. ޒުބާއަށް ފެނުނު ވަގުތު ސައިމްހުރީ އުފަލުން ހެވިދިލިފައެވެ. ސައިމް އެދަނީ ކޮންތާކަށްކަމެއް ޒުބާގާތު ބުނެފައެއް ނެތެވެ. އެހާ އަވަސް އަރުވައިލާފައި ތަނަކަށްދާއިރު ، ޒުބާގާތުވެސް ބުނެލަންވާނެ ނޫން ހެއްޔެވެ ؟
އެކަމާ ކަންބޮޑުވެފައި ހުއްޓާ ، ރޮޝްނާއަށްވެސް އެތަނަށް އާދެވުނެވެ. ސައިމްދާތަނެއް ނޭނގި ، ޒުބާ ކަންބޮޑުވެފައިހުރިކަން ރޮޝްނާއަށްވެސް އެނގެއެވެ. ސައިމްއަށް ގުޅައިލުމަށް ފޯނުދިނުމަށް ރޮޝްނާގާތު ޒުބާ އެދުނެވެ. އެވަގުތު އޭނާގެ ފޯނުއޮތީ ދާނިޔަލް އަތުލާފައެވެ. ޒުބާގެ ޓެބްވެސް އޮތީ ދާނިޔަލް ހޫރައިލުމުން ވެއްޓި ހަލާކުވެފައެވެ. ރޮޝްނާގެ އަތުގައި ފޯނު ނެތިމަ އެވަގުތު ޒައިމްއަށް ގުޅޭގޮތެއް ނުވިއެވެ. އެހެންނަމަވެސް ، ކޮންމެގޮތެއް ހަދާފައިވެސް ވީ އެންމެ އަވަހަކަށް ސައިމްއާ ގުޅައިލަން ޒުބާ ބޭނުންވިއެވެ. ޒުބާއަށް އެކަމަށް ވަގުތެއްލިބުނީ އެރޭ އެންމެން ކާން ، ކާމޭޒުދޮށަށް އެއްވިތަނާއެވެ. ދާނިޔަލްއާއި ރޮޝްނާ ވެސް ތިބީ ކާށެވެ. އެއީ ރޮޝްނާގެ ފޯނުން ސައިމްއަށް ފޯނުކޮށްލަން ރަނގަޅު ވަގުތެއްކަމުގައި ، ޒުބާއަށް ފެނުނެވެ. އަވަސް އަރުވައިލައިފާ ، ރަނގަޅަށް ނުވެސްކައި ، ކާމޭޒުދޮށުން ތެދުވެގެން ޒުބާދިޔައީ ރޮޝްނާމެންގެ ކޮޓަރިޔަށެވެ. އެތަން މިތަން ހާވައި އެންމެފަހުން ، ރޮޝްނާގެ ފޯނު ހޯދައި ސައިމްއާ ޒުބާ ގުޅިއެވެ. ޒުބާއަށް އަންގައި ނުލާ ސައިމް އަންނަން ޖެހުނީތީ ސައިމްވެސް ހުރީ ކަންބޮޑުވެފައެވެ. އެކަމަކު ، ސައިމްއަށް ކާފަގާތަށް އަންނަން މަޖްބޫރުވީގޮތް ސައިމް ކިޔައި ދިނެވެ. ސައިމްއަށް އެހެންގޮތެއް ނެތުނީއެވެ. އެކަމަކު އެވާހަކަ ޒުބާއަށް ޤަބޫލު ކުރެވޭނީ ކިހިނެއް ހެއްޔެވެ ؟
ސައިމްގާތު ޒުބާ ބުނަން ބޭނުންވެފައި އޮތް މުހިންމު ވާހަކަވެސް ސައިމްގާތު ބުނާކަށް ޒުބާ ބޭނުމެއް ނުވިއެވެ. އެއީ އެދެމީހުންގެ ޙަޔާތުގެ ވަރަށް މުހިންމު ވާހަކަ އެކެވެ. އެހެންކަމުން އެވާހަކަ ނުބުނެ ، ޒުބާއަކަށް ނުހުރެވުނެވެ. ރޮޝްނާ އޮތީ އެއީ ދޮގެއްކަމަށް ޒުބާގާތު ބުނެފައެވެ. ހުކުރު ދުވަހު ، އެ ގޭގައި ބޭއްވޭ އެންގޭޖްމަންޓްގެ ރަސްމިއްޔާތު އެ ބޭއްވެނީ ޒުބާއާ ނޫންކަން ރޮޝްނާ އޮތީ ބުނެފައެވެ. އެހެނަސް ، ޒުބާގެ މަންމަ ، ބައްޕަޔާ ދެއްކި ވާހަކައެއްގައި ، އެހެންމީހަކާ ޒުބާގެ އެންގޭޖްމަންޓް ކުރެވިއްޖެނަމަ ، އެއީ ރަނގަޅު ނިންމުމެއް ނޫންކަން ސަމީނާ ވަނީ އޭނާގެ ފިރިމީހާގާތު ބުނެފައެވެ. މަންމަގެ ވިސްނުން ހުރީ ، ޒުބާއާއި ސައިމްއާ ދެމީހުންގެ އެންގޭޖްމަންޓް ބާއްވަންކަން ޒުބާއަށް އެނގެއެވެ. މަންމަ އެގޮތަށް ނިންމައިފިއްޔާ ބައްޕަޔަށް ކުރެވޭނެ މާބޮޑުކަމެއް ނުއޮންނާނެއެވެ. އެކަމެއް ނިމޭނީ ، މަންމަ ބޭނުންވާ ގޮތަކަށެވެ.
ސައިމްގާތު އެވާހަކަ ބުނުމަށް ޒުބާ ބޭނުންވިއެވެ. ވީ އެންމެ އަވަހަކަށެވެ. އެހެނަސް ، އެވާހަކަ ސައިމްގާތު ނުބުނެވެނިސް ، ސައިމް އެ ނައްޓައިލީއެވެ. އެކަމާ ޒުބާހުރީ ނައްޓާފައެވެ. ނުނައްޓާނެކަމެއްވެސް ނެތެވެ. ބުނަން ނުބުނަން ހުރެފައި ، ޒުބާ ގާތު ސައިމް އެވާހަކަ ބުނަން ނިންމިއެވެ.
" އެނގޭ ހެއްޔެވެ ؟ ސައިމްއާއި އަހަރެންގެ އެންގޭޖްމަންޓް ބާއްވަން ، މަންމަމެން އެއްބަސް ވެއްޖެއެވެ. އެވާހަކަ މަންމައާއި ބައްޕާ ދައްކާ އަޑު އަހަރެން އެހީމެވެ. އެ ރަސްމިއްޔާތު ބާއްވަނީ އަންނަ ހުކުރު ދުވަހުއެވެ. އެކަމަކު ، ސައިމް ތިދިޔައީ ކާފަގާތަށެވެ. ދެންވާނީ ކިހިނެއްކަމެއް އަހަރެންނަކަށް ނޭނގެއެވެ. " ޒުބާ ބުންޏެވެ.
ކޮޓަރިޔަށް މީހަކު ނުވަންނަނިސް ، ސައިމްއަށް ހުރިހާ ވާހަކައެއް ކިޔައިދެވޭތޯ ، ޒުބާ ވަރަށް މަސައްކަތް ކުރިއެވެ. އެހެންނަމަވެސް އެކަން ކާމިޔާބުވާގޮތެއް ނުވިއެވެ. ހުރިހާ ވާހަކައެއް ކިޔައިދޭން ނުހަދާ ކުއްލިޔަކަށް ފޯނުބާއްވަން ޖެހުނެވެ. އެއީ ، މީހަކު އަންނަ އަޑަށެވެ. އެއީ ރޮޝްނާއާއި ދާނިޔަލްގެ ކޮޓަރިއެވެ. އެތަނަށް ވަންނާނީ އެދެމީހުންކުރެ މީހެކެވެ. އެއީ ، ރޮޝްނާކަމަށް ވެއްޖިއްޔާ ، ކޮންމެވެސް ބަހަނާއެއް ދައްކައިގެން ޒުބާއަށް ސަލާމަތް ވެވިދާނެއެވެ. ދާނިޔަލް ބޭބެ ކަމަށް ވަންޏާ ޒުބާގެ ދުވަސް އެ ދިޔައީއެވެ.
ފޯނު ބާއްވާފައި ކޮޓަރީގެ ދޮރާދިމާލަށް އެނބުރިލިއިރު ، ކަމަކުދާކަށް ނެތެވެ. ޒުބާގެ ކުރިމަތީ އެހުރީ ދާނިޔަލް ބޭބެއެވެ. ޒުބާގެ ދެލޯ ބޮޑުވިގޮތަށް ކުޑައެއް ނުކުރެވުނެވެ. އެތެރެޔަށް ނޭވާ ދަމައިލިގޮތަށް ބޭރަށް ނެރެއެއް ނުލެވުނެވެ. އެކޮޓަރީގައި ޒުބާ އެކުރަނީ ކީއްތޯ ދާނިޔަލް ސުއާލު ކުރިއެވެ.
" އަހަރެން މިއުޅެނީ ރޮޝްނާ ހޯދާށެވެ ! އެކަމަކު ރޮޝްނާއެއް ނުފެނުނެވެ. އަހަރެން އައީ މިކޮޓަރީގައި ރޮޝްނާ އުޅޭތޯ ބަލާށެވެ ! މިތާކުވެސް ރޮޝްނައެއް ނެތެވެ. އެދިޔައީ ކޮންތާކަށް ހެއްޔެވެ ؟ ހޯދަން އުޅެއިރަކު ރޮޝްނާއެއް ނުފެންނާނެއެވެ. މިދަނީ ބަދިގެތެރެ ބަލައިލާށެވެ ! އިނގޭއެވެ. "
ޒުބާ ދާނިޔަލްއަށް ޖަވާބުދޭން ދެއްކި ވާހަކަތަކުންވެސް ، ޒުބާ އެކޮޓަރިޔަށް އެއައީ ކީއްކުރަންކަން ދާނިޔާލް ދެނެގަތެވެ. އަދި ، ޒުބާ ނުކުތަނުދީ ހުއްޓުވިއެވެ. ދަނޑިވަޅު ބަލާފައި ޒުބާ ދެމިގެންފައި ކޮޓަރިން ނުކުތެވެ.
ޒުބާގެ ކަންތައް މިހާރު އެދަނީ ތަންފުކެއް ބޮޑުވަރު ވެގެންނެވެ. މީހުން މީހުންނާވެސް ހިތާވާން ވާނެއެވެ. އެކަމަކު ޒުބާމެންނަކަށް އެއްވެސް ޙައްދެއް އެކަމުގައިވެސް ނުއޮވެއެވެ.
ދާނިޔަލްގެ ނަޒަރު ކޮޓަރިތެރެޔަށް ހިންގައިލިއެވެ. އެތާއޮތް ފޯނަކަށް އޭނާގެ ސަމާލުކަން ހުއްޓުނެވެ. އެއީ ، ރޮޝްނާގެ ފޯނެވެ. ފޯނުނަގައި ، ޗެކްކޮށްލިއެވެ. އެންމެފަހުން އެފޯނުން ފޯނެއްކޮށްފައި އޮތީ ސައިމް އަށެވެ. ރޮޝްނާއަށްވެސް ހުރިހާކަމެއް އެނގިހުރެ ސައިމްއާ ވާހަކަ ދައްކަނީތާއެވެ. އެންމެ ފަހު ފޯނަކީ ޒުބާކުރި ފޯނަކަށް ވެދާނެއެވެ. އެކަމަކު ސައިމްގެ ނަންބަރު ރޮޝްނާގެ ފޯނަށް ސޭވްކޮށްފައި އޮންނާނީ ، ރޮޝްނާވެސް ސައިމްއަށް ފޯނު ކުރާތީއެވެ. ދާނިޔަލްގެ ހިތުގައި ރޮޝްނާގެ މައްޗަށްވެސް ހިތްހަމަ ނުޖެހުން އިތުރު ވިއެވެ.
ދާނިޔަލްއަށް ފިލައިގެން ޒުބާއައީ ތިރިޔަށެވެ. އައިތަނުން ޒުބާގެ ބޮޑުދައިތަ ، ސާޖިދާ ، ޒުބާއަށް ގޮވައިގެން ގެނައެވެ. ސާޖިދާއަކީ ، ގޭގެ އެންމެ އިސްކޮށް ހުންނަ އަންހެނާއެވެ. ގޭގެ ހުރިހާކަމެއް ބަލަހައްޓަނީ ސާޖިދާއެވެ.
" ދަރިފުޅާއެވެ ! ދަރިފުޅު ތިކުރިކަމަކުން ، އަހަރެމެން މިތިބެނީ މީހަކާ ދިމާލަށް އިސްއުފުލައިލަންވެސް ނުކެރި ލަދުންނެވެ. ދަރިފުޅުގެ ބޮޑުބޭބެއާއި ބައްޕަވެސް އެތިބެނީ ހިތްހަމަ ނުޖެހި ރުޅި އައިއްސައެވެ. ބައްޕަވެސް ދަރިފުޅާ ވާހަކައެއްވެސް ނުދައްކާ ނޫން ހެއްޔެވެ ؟ އެކަމަކުވެސް ، ދަރިފުޅުގެ ކައިވެނި ކޮށްދޭގޮތަށް އަހަރެމެން މިތިބީ ނިންމައިގެންނެވެ. މިގެއިން ނުކުމެގެން ދަރިފުޅު ދާނީ ، ފިރިމީހާގެ ގެޔަށެވެ. އިޙްތިރާމް ލިބިގެންވާ ގޮތުގައެވެ. މިހުރީ ، ދަރިފުޅު ކައިވެނިވާ ފިރިހެންކުއްޖާގެ މައިންބަފައިން ފޮނުވި ތަކެއްޗެވެ. އެތަކެތި ގެންގޮސް ކޮޓަރިޔަށް ލާށެވެ ! " ސާޖިދާ ބުންޏެވެ.
އެތަކެތި އެގެޔަށް ގެނައީ ކާކުތޯ ޒުބާ ސުއާލު ކުރިއެވެ. ޒުބާއަށް ހީވެފައި އޮތީ ، އެތަކެތި ގެންނާނީ ސައިމްގެ މަންމަ ، ފާއިޤާކަމަށެވެ. އެހެނަސް ، އެކަހަލަ ކަންކަމާ ، އަންހެންކުދިން ސުއާލު ނުކުރާނެކަމަށް ބުނެ ، ޒުބާގެ ސުއާލަކަށް ސާޖިދާވެސް އަދި ސަމީނާވެސް ޖަވާބެއް ނުދެއެވެ. މިފަހަރު ، ޒުބާގެ ފަރާތުން އެއްވެސްކަހަލަ ނޭއްގާނީކަމެއް ހިނގައިފިއްޔާ އެކަމަށް އަދަބުދޭނީ އޭނާކަމަށް ސަމީނާ ބުންޏެވެ. ވާނެގޮތެއް ނޭނގޭނެއެވެ. މިޒަމާނުގެ އަންހެންކުދިންގެ ކިޔަމަންތެރިކަމަކީ ، ކުރީ ޒަމާނުގައި ސާޖިދާމެން ސަމީނާމެންގެ ދުވަސްވަރާ ތަފާތު ކަމެކެވެ.
" ކުދިން ތަރުބިއްޔަތު ކުރުމަކީ ގޭގައިތިބޭ އަންހެންވެރިންގެ ކަމެއްކަމުގައި ، ތިރިޔަށް ފައިބައިގެން އަންނަމުން އަމްޖަދު ބުންޏެވެ. ޒުބާގެ ތަރުބިއްޔަތުގައި މައްސަލައެއް އެބަ އުޅޭކަމަށް އަމްޖަދަށް ފެނުނެވެ. އެހެނަސް ، ސާޖިދާއަށް ފެނުނުގޮތުގައި ޒުބާގެ ތަރުބިއްޔަތުގައި އެއްވެސް މައްސަލައެއް ނެތެވެ. މައްސަލަ އުޅެނީ ޒަމާނާއި ޙާލަތުގައެވެ. ރޮޝްނާއާއި ޒުބާއަކީ ސަމީނާގެ ތަރުބިއްޔަތުގެ ދަށުން ބޮޑުވެގެން އައި ދެކުދިންނެވެ. އެދެކުދިންގެ އުޅުމާއި އަޚުލާޤުވެސް އަދި ، ޠަބީޢަތުވެސް އެހާ ތަފާތެވެ. އެއީ ، ޒަމާނަށް އައި ބަދަލެވެ. ދެވުނު ތަރުބިއްޔަތުގެ މައްސަލައެއް ނޫނެވެ. އެދެކުދިންގެ މެދުގައި ދިހައަހަރުގެ ތަފާތު އެބަ ހުއްޓެވެ. އެއީ ޙާލަތާއި ޒަމާން ބަދަލުކޮށްލި ޙަޤީޤަތެވެ.
ކައިވެނިވާ ކުއްޖާގެ ފަރާތުން ފޮނުވި އެއްޗެތިތައް ހިފައިގެން ގޮސް ކޮޓަރިޔަށްވަދެ ، އެ ތަކެތި ކަނޑައި ބަލަމުން ޒުބާ އަމިއްލަޔަށް ވާހަކަ ދައްކަމުން ގެންދިޔައެވެ. ސައިމްގެ ލޯބި އެންމެފަހުން ކާމިޔާބު ހޯދީއެވެ. އެހުރިހާ އެއްޗެއް ނުފޮނުވިޔަސް ، ސައިމް ލިބެނިކޮށް ޒުބާއަށް އެންމެ ރަނގަޅެވެ. ސައިމްގެ މައިންބަފައިންގެ ފަރާތުން އެހެން އެއްވެސް އެއްޗެއް ، ޒުބާ ބޭނުމެއްނޫނެވެ.
ޒުބާއަށް ލިބުނު ހެދުންތަކާއި ގަހަނާތައް ބަލަމުން އަމިއްލަ ނަފްސާ ވާހަކަ ދައްކަމުން ގެންދަނިކޮށް ، އެތަނަށް އެވަނީ ރޮޝްނާއެވެ. ރޮޝްނާ ވަތްތަނުން ، ރޮޝްނާއަށް ގޮވާލައި ، އެއީ ، ސައިމްގެ މަންމަ ކައިވެންޏަށް ފޮނުވި ތަކެތިކަމަށް ޒުބާ ބުންޏެވެ. ރޮޝްނާއަކަށް ޒުބާ ބުނި އެއްޗެއްގެ އަޑެއް ނީވުނެވެ. ޒުބާ ބުނި ވާހަކައެއްގެ އަޑު ރޮޝްނާއަށް ނީވުނީ ، އެއަޑު އަހަން ރޮޝްނާ ބޭނުން ނުވާތީއެވެ. އެއީ ޙަޤީޤަތް ކަމަށް ނުވާތީއެވެ. ރޮޝްނާއަށް އަޑުނީވުނީމަ ، އަނެއްކާވެސް ރޮޝްނާއާ ދިމާލަށް އެނބުރިލައި ، އެއީ ސައިމްގެ މަންމަ ފޮނުވި އެއްޗެތި ކަމަށް ޒުބާ ބުންޏެވެ. އެ ތަކެތި ހިފައިގެން ފާއިޤާދައްތަ އައިއިރު ، ޒުބާއަށް ނުގޮވައިގެން ، މައްސަލަ ޖެއްސިއެވެ. ފާއިޤާދައްތަގެ މޫނުމަތީގައި ހުންނާނެ އުފާވެރިކަން ބަލައިލަން ޒުބާ ބޭނުންވީއެވެ.
އެތަކެތި ކަމުދޭތޯ ރޮޝްނާ ކުރި ސުއާލަށް އުފާވެފައި އިނދެ ، އެހުރިހާ އެއްޗެއްވެސް އެހާ ލޯބިކަމުގައި ރޮޝްނާ ބުންޏެވެ. ރޮޝްނާއާއި ޒުބާއާ ދައްކަމުންގެންދިޔަ ވާހަކަތަކުގައި ، ޒުބާ އެންގޭޖްވަނީ ސައިމްއާ ނޫންކަމަށާއި ، އެ ފިރިހެން ކުއްޖަކީ ނަސްރީނާދައްތަގެ ޢިމާދުކަމުގައި ރޮޝްނާ ބުންޏެވެ. ރޮޝްނާގެ އެ ވާހަކައިން ޒުބާ ހުރިގޮތަށް ގަނޑުވިއެވެ.
އެންވީއިރު ، ކުރިންވެސް ރޮޝްނާ އެބުނީ ރަނގަޅު ވާހަކައެއްތާއެވެ ! މަންމަޔާއި ބައްޕަ އެދެއްކި ވާހަކައިގައި ބައްޕަ ނިންމާފަ އޮތްގޮތް ކާމިޔާބު ވީއެވެ. ޒުބާއާ ސައިމްގެ ކައިވެނި ކުރެވޭކަށް ސަމީރު ބޭނުމެއް ނޫނެވެ. އޭނާގެ ދަރިފުޅު ސައިމްއާ ނުދެވާޏެކަމަށް ، އިބްރާހީމްގާތުވެސް ސަމީރު އޮތީ ބުނެފައެވެ. ދާނިޔަލްވެސް އެކަމާ ޤަބޫލެއްނޫނެވެ. ޒުބާގެކޮޅަށް ހަމައެކަނި ހުރީ ، އޭނާގެ ދައްތަ ރޮޝްނާއެވެ. އެހެން އެންމެން ، ސައިމްއާ އެހާ ޤަބޫލެއްނޫނެވެ. އެމީހުން އެބަލަނީ ކަމުގެ ޙަޤިޤަތާއި އަސްލަށެވެ. ސައިމްގެ ޢާއިލާއަކީ ކިހާވަރެއްގެ ކޮންބައެއްކަން ޒުބާގެ އެންމެންނަށްވެސް އެނގެއެވެ. އަދި ސައިމްއަކީ ޒުބާއާ އެކަށީގެންވާ ކުއްޖެއްކަމަކަށް އެމީހުންނެއް ނުދެކެއެވެ. ސައިމްގެ އުޅުންވެސް ރަނގަޅެއް ނޫނެވެ. ކިޔެވުންވެސް އެހާ ގޯހެވެ. އެއާ ޚިލާފަށް ޒުބާއަކީ ، އަބަދުވެސް ކްލާހުން އެއްވަނަ ހޯދަމުން އަންނަ ކުއްޖެކެވެ.
ރޮޝްނާ ބެލީ ، ޒުބާގެ ޙާލަށެވެ. ޒުބާއަށް އެހުރިހާކަމެއް ވެގެން އެދަނީ ސައިމްދެކެ ވާލޯބިންނެވެ. އެއީ ސަމާސާ ކަމެއްނޫނެވެ. ސައިމްއަށްޓަކައި ޒުބާގެ ހިތުގައި އެމީހުންނަށް ފޮރުވައިގެން އެ ގެންގުޅޭ ސައިމްގެ ލޯބި ، ރޮޝްނާއަށްވެސް ފެނެއެވެ. ފާއިޤާއަކީ ރޮޝްނާވެސް އެހާ ހިތްހަމަޖެހޭ މީހެއްނޫނެވެ. އެކަމަކުވެސް ޒުބާއަށްޓަކައި ރޮޝްނާވެސް ގޮތްދޫކޮށް ، ޒުބާއާ އެއްކޮޅަށް ޖެހެން މަޖްބޫރުވީއެވެ. ސައިމްއާއި ޒުބާ ގުޅުމަކީ ރޮޝްނާގެވެސް ހިތްއެދޭކަމެއް ނޫނެވެ.
ރޮޝްނާ އެބުނި ވާހަކަޔަކުން ، ޒުބާގެ ފައިދަށުން ބިންގަނޑު ދެމިގަތެވެ. ޚުދު އޭނާގެ މައިންބަފައިން އޭނާއަށް އޮޅުވައިލީއެވެ. އޭނާއަށް އޮޅުވާލައިގެން ސައިމްނޫން އެހެންމީހަކާ އޭނާގެ ކައިވެނި ކުރުވަން ރާވަނީއެވެ. އެނދުމަތީ ބަހައްޓާފައިހުރި އެއްޗެތިތައް އުކާލައި ، އެ ކައިވެންޏަށް އޭނާ ނުރުހޭކަން ޒުބާ އެންގިއެވެ. މޮޔައެއްހެން މުޅިކޮޓަރިތެރޭ ފުންމަން ފެއްޓިއެވެ. އަދި އޭނާ އެ ކައިވެނި ނުކުރާނެކަމަށް ހަރުއަޑުން ގޮވަމުން ގެންދިޔައެވެ. ރޮޝްނާއިނީ ހަދާނެގޮތް ބޮޑުވެފައެވެ. ޒުބާ މައިތިރިކުރަން އޭނާއަށް ކުރެވޭނެ އެއްވެސް ކަމެއް އޮތްކަމަކަށް ރޮޝްނާއަކަށް ނުފެނުނެވެ.
ފާއިޤާ ގޭތެރޭގައި އުޅެނިކޮށް ކުއްލިޔަކަށް އައިސް އެވަނީ ސައިމްއެވެ. ކާފަގާތަށް ސައިމް ދިޔަތާ އަދި 24 ގަޑިއިރު ނުވެއެވެ. އޭނާ ބުނަންދެން އަންނަން މަޑުނުކުރެވުނީ ކީއްވެތޯ ފާއިޤާ ސުއާލު ކުރިއެވެ.
ސައިމްގެ ކާފަގެ ޙާލު ރަނގަޅެވެ. އެހެންވެ ، ކާފަގާތު ބުނެފަ އޭނާ އެއައީ ކައިވެނީގެ ކަންކަން ފުރިހަމަ ކުރުމަށެވެ. ޒުބާއަށް ހެޔޮވަރު އަނގޮޓިއެއްވެސް ގަންނަން ޖެހޭނެއެވެ. މަންމަޔާއެކީ ބާޒާރުކުރަންވެސް ދާން ޖެހޭނެއެވެ. އެގޭތެރެވެސް ޒީނަތްތެރިކުރަން ޖެހޭނެއެވެ. މަންމަޔާއި ބައްޕަޔަށް އެކަނި އެކަން ކުރެވޭނީ ކިހިނެއް ހެއްޔެވެ ؟
ފާއިޤާ ، އޭނާގެ ފިރިމީހާ އިބްރާހީމަށް ގުޅިއެވެ. ޒުބާގެ އެންގޭޖްމަންޓްގެ ވާހަކަ ސައިމްއަށް އެނގިގެން އެނބުރި ގެޔަށް އައިވާހަކަ ބުނުމަށެވެ. ޒުބާގެ އެންގޭޖްމަންޓް އެ ބާއްވަނީ ސައިމްއާ ނޫންކަމެއް ސައިމްއަށް ނޭނގޭކަމަށް ފާއިޤާ ބުންޏެވެ. ދެން ހަދާނީ ކިހިނެއް ހެއްޔެވެ ؟ ޒުބާގެ ކައިވެނި އެކުރެވެނީ ސައިމްއާ ނޫންކަން ސައިމްގާތު ބުނެދޭނީ ކިހިނެއް ހެއްޔެވެ ؟ އެކަން އެނގޭތަނުން ، ސައިމްއަށް ވާނެގޮތެއް ނޭނގެއެވެ. ޒުބާއަށް އެކަން އެނގިގެން ، އޭނާގެ މަންމައާއި ބޮޑުދައިތަ ގާތަށް އައިސް ، ސައިމްނޫން މީހަކާ އޭނާ ކައިވެނި ނުކުރާނެކަމަށް ޒުބާއޮތީ ބުނެފައެވެ. އެހެން ނޫނީ އޭނާ މަރުވަންވެސް ފަހަކަށް ނުޖެހޭނެއެވެ. ސައިމްގެ ނިންމުމަކަށްވާނީވެސް ހަމަ އެއީއެވެ. އޭނާގެ ޙަޔާތުން ޒުބާ ގެއްލިއްޖެނަމަ ، ދުނިޔޭގައި ހުންނާކަށް ސައިމްވެސް ބޭނުމެއް ނުވާނެއެވެ. ޒުބާވެސްވަނީ ސައިމްގެ އަނގޮޓިނޫން އެހެން އަނގޮޓިއެއް އޭނާގެ އިނގިލީގައި ނާޅާނެކަމަށް ނިންމާފައެވެ. ފާއިޤާމެން ރާވައިގެން ، ކާފަގާތަށް ސައިމް ފޮނުވީ ޒުބާގެ އެންގޭޖްމަންޓް ނިމެންދެން ދުރުގައި ބަހައްޓަން ވެގެންނެވެ. އެކަމަކު ޒުބާއާއި ސައިމްއަށް އެރިއޮޅުމެއްގައި ، އަނބުރާ ސައިމް އެއައީއެވެ. ( ނުނިމޭ )
