(11 ޖޫން 2023 ގައި ޝާއިއުކުރި ބަޔާ ގުޅޭ)
އަންޖަލީ ރޮއެގެންފައި ، އޭނާގެ ބައްޕަގެ ގައިގާ ބައްދައިގަތެވެ. އަދި އޭނާއަށް މަޢާފުކުރާށޭ ބުނެ ބައްޕަގެ މޭގައި ބޯ އަޅަލިއެވެ. އޭނާ ، އެފަދަ މިނިވަންކަމެއް ބޭނުމެއްނޫނެވެ. ބައްޕަގެ ހިތްދަތިކޮށްފައި އޭނާއަށް ލިބޭނެ އުފަލެއް ނޯންނާނެއެވެ. ރޮމުންރޮމުން އަންޖަލީ ވާހަކަ ދެއްކިއެވެ. އޭނާގެ އަޑުގައިވަނީ ކެކުޅުމާއި ވޭނެވެ.
" ބައްޕާއެވެ ! އަހަރެން ބައްޕަދެކެ ، ލޯބި ވެއެވެ. ބައްޕަދެކެ ، އިންތިހާއަށް ލޯބި ވެއެވެ. ބައްޕަ ނޭދޭކަމެއް އަހަރެންނެއް ނުކުރާނަމެވެ. އަހަރެން ކައިވެނި ކުރާނީ ބައްޕަ ދައްކާ މީހަކާއެވެ. ބައްޕާއެވެ ! އެހެންނަމަވެސް ، މިވަގުތު އަހަރެން ނުހުއްޓުވާށެވެ. އަހަރެންނަށް އިންތިޒާރުގައި މީހަކު އެބަހުއްޓެވެ. އަހަރެން އޭނާއާ ބައްދަލުކުރަން ދާނެކަމަށް އޭނާއަށް އަހަރެންވަނީ ވަޢުދުވެފައެވެ. އަހަރެންނަށް ، އެންމެ ވަޢުދެއް ފުއްދުމަށް ފުރުޞަތު ދޭށެވެ ! ހަމަ ، އެންމެ ވަޢުދެކެވެ. " އަންޖަލީ ރޮމުން ރޮމުން އޭނާގެ ބައްޕަޔަށް އާދޭސް ކުރުމަށް ދެއަތް އުފުލައިލިއެވެ.
ޗާނދަނީ އޭނާގެ ފިރިމީހާއާ ދިމާއަށް ބަލައިލިއެވެ. އަދި ، ބުންޏެވެ.
" އޭނާ ދިޔަދޭށެވެ ! އަހަރެންގެ ދަރިފުޅަށް ، އަހަރެންގެ ފުރިހަމަ އިތުބާރު އެބައޮތެވެ. އަހަރެމެން ދެރަވެ އިސްދަށަށް ޖަހާލަންޖެހޭނެ އެއްވެސްކަމެއް އޭނާއެއް ނުކުރާނެއެވެ. އޭނާ ދިޔަދޭށެވެ ! " އަންޖަލީ މިފަހަރު ފޮނުވައިލުމަށް ، ޗާނދަނީ ، އޭނާގެ ފިރިމީހާގާތުން އެދުނެވެ.
އެންމެ ރަނގަޅެވެ ! ޖޯހާން ވަރަށް ވިސްނުމަށްފަހު ، އަންޖަލީ ވެފައިވާ ވަޢުދަށް އޭނާ އިޙްތިރާމް ކުރާނެ ކަމަށް ބުންޏެވެ. އަދި ދޭވްއަށް ވެފައިވާ ވަޢުދު ފުއްދުމަށް ދިއުމުގެ އިޒުނަ ދިނެވެ. މަޔަކު ދަރިޔަކަށް ކުރާ އިތުބާރުގެ ޔަޤީންކަމުގައި ޗާނދަނީގެ އެދުމަށް ، އެކަމުގެ އިޒުނަ އަންޖަލީއަށް ލިބުނެވެ. އަންޖަލީ ދާން ބޭނުންވާ ތާކަށް އޭނާ ގެންގޮސްދޭނީ ބައްޕައެވެ.
އަނދިރި މާޙައުލެކެވެ. ތަނަށް ފެތުރިފައިވާ ހަމަހިމޭންކަމުގެ ތެރެއިން އިތުރު އަޑެއް ނުލައްވާ ، އަންޖަލީ ، މަޑު ހިނގުމެއްގައި ވަދެގެން އައެވެ. ދޭވް ހުރީ އަންޖަލީ އަންނާނެކަމުގެ ޔަޤީންކަމުގައި ކެތް މަދުވެފައެވެ. އަންޖަލީ ފެނުމާއެކު ، ދޭވް އުފަލުން ފޮޅުނެވެ. ދުވެގޮސް ، އަންޖަލީގެ ދެކޮނޑުގައި ހިފާލައި ، އަންޖަލީގެ ވަޢުދު ފުއްދާނެކަން އެނާއަށް އެނގޭކަމުގައި ބުންޏެވެ. އަންޖަލީގެ ބައްޕަގެ ގެ ދޫކޮށްލާފައި އޭނާއަށްޓަކައި އަންޖަލީ އަންނާނެކަން އޭނާއަށް އެނގޭ ކަމުގައި ދޭވް ބުނަމުން ގެންދިޔައެވެ. އެދެލޯބިވެރިން ވަކިވެގެން ހިނގައިދާނެ އެއްވެސްކަމެއް އަންޖަލީ ނުކުރާނެކަމުގެ ޔަޤީންކަން ދޭވްއަށް އޮވެއެވެ. ދޭވް އެހީކުރީ ގޯސްކޮށްކަމަށް އަންޖަލީ ބުންޏެވެ. އަންޖަލީ އެއައީ ބައްޕަގެ ދޫކޮށްލާފައިނޫން ކަމަށާއި ، އެދެމީހުންގެ ލޯބި ޤުރުބާންކޮށް ، ދޭވްއާ ވަކިވާ ވާހަކަ ބުނަން ކަމުގައި އަންޖަލީ ބުންޏެވެ.
އަނެއްކާވެސް ސަމާސާ ކުރަނީއެވެ. އަންޖަލީގެ މޫނުގައި ނުހަނު ލޯބިން ފިރުމާލަމުން ދޭވް ބުންޏެވެ. އަންޖަލީ ދޭވްއާ ދުރަށް ޖެހިލިއެވެ. އަންޖަލީ އެކުރަނީ ސަމާސާ ނޫންކަމަށާއި އޭނާ ، އޭނާގެ ބައްޕަގެ ބަސް ޤަބޫލުކޮށްފި ކަމުގައި ބުންޏެވެ.
" އަހަރެން ކައިވެނިކުރާނީ ، ބައްޕަބުނާ މީހަކާއެވެ. " އަންޖަލީ ބުންޏެވެ.
ދޭވް މަޑުމަޑުން އަންޖަލީއާ ގާތަށް ޖެހިލިއެވެ. ފަހަތުން އައިސް އަންޖަލީގެ ކަނދުރާމަތީ ލޯބިކޮށްލިއެވެ. އޭނާއަށް އަންޖަލީވެފައިވާ ވަޢުދުގެ މަތިން ހަނދާން ކޮށްދިނެވެ. އެ ވަޢުދަށް ވާނީ ކިހިނެއްތޯ ސުއާލު ކުރިއެވެ.
" ދޭވް އެވެ ! ދޭވް އަހަރެންގެ ދިރިއުޅުމަށް އައުމުގެކުރިން ، އަހަރެންގެ ދިރިއުޅުމަށް އައީ އަހަރެންގެ ބައްޕައާއި މަންމައެވެ. ދޭވްއަށް ވީ ވަޢުދުވުމުގެ ކުރިން ، އޭގެވެސް މާކުރިން ، އަހަރެން ، އަހަރެންގެ މައިންބަފައިންނަށް ވަޢުދެއްވީމެވެ. އެއީ ، އަންހެންކުއްޖަކު ދުނިޔެއަށް އުފަންވުމާއެކު ވާ ވަޢުދެވެ. އެ ވަޢުދު ، އަހަރެން ފުރިހަމަކުރާނަމެވެ. އަހަރެން ހަދާނީ ބައްޕަ ބުނާ ގޮތެކެވެ. " ދޭވްގެ ލޮލަށް ބަލަހައްޓައިގެން ހުރެ ، އަންޖަލީ ބުނަމުން ގެންދިޔައެވެ.
" އެހެންވިއްޔާ އަހަރެންދެކެ ލޯބިވީ އަންޖަލީގެ މައިންބަފައިންގާތު އަހާފައި ހެއްޔެވެ ؟ " ދޭވް ، އަންޖަލީއާ ދިމާއަށް ހަޅޭއްލަވައިގަތެވެ. ދޭވްގެ އަޞްލު ސިފަޔަށް ރުޖޫޢަވުމަށް ، ގިނަވަގުތެއް ނުނަގައެވެ. ރުޅިއިސްކޮށް ހަމައިން ނެއްޓިއެވެ.
ދޭވްއަކަށް އޭނާގެ ހިތުގެ އުދާސްގަނޑު ކޮންޓްރޯލެއް ނުކުރެވުނެވެ. އަންޖަލީއަކީ ހާދަ އަމިއްލަ އެދުން ބޮޑުމީހެއްކަމުގައި ދޭވް ބުންޏެވެ. ދޭވް އޭނާއާ ދިމާއަށް ކިޔާނެ އެއްޗެއް ކިޔަންވީކަމުގައި އަންޖަލީ ބުންޏެވެ. އެހެންނަމަވެސް އޭނާ ހިނގާނީ ، އޭނާގެ މައިންބަފައިން ދައްކާމަގުންކަމުގައި ބުންޏެވެ. އެމީހުން އެދައްކާ މަގުން ހިނގުމުގައި ހިތް ހަލާކުވެ ، ކަށިހެރި ، ޒަޚަމްވެ ، ފައިބިނދި ، ވެއްޓެމުންދިޔަނަމަވެސް ، އޭނާ ހިނގާނީ އެމަގުންނެވެ.
މަރުވަންޏާ ހަމަހޭހާ ހުރެގެން މަރުނުވީ ކީއްވެތޯއާއި ތިގޮތަށް ބޭވަފާތެރި ނުވެ މަރުވިނަމަ ރަނގަޅުވީހޭ ދޭވް ބުންޏެވެ. މައިންބަފައިންގެ އިޙްސާންތެރިކަން ހިތުގައި ނެތްނަމަ އޭނާ އެކަންވެސް ކުރާނެކަމަށް އަންޖަލީ ބުންޏެވެ. އެހެނަސް ، އަންޖަލީ ދިރިހުންނަން ބޭނުމެވެ. ލަގޮޑި ފަޅައިގެންދާފަދަ ހިތްދަތިކަމުގައި ، ފުރާނަނެތް މަސްގަނޑެއް ފަދައިންނަމަވެސް އޭނާ ދިރިހުންނަން ބޭނުމެވެ.
" އަންޖަލީ ދިރިހުންނާށެވެ ! އަހަރެން މަރުވެދާނަމެވެ ! އަންޖަލީއެވެ ! އަހަރެންނަކަށް އަންޖަލީއާ ނުލައި ދިރިއެއް ނުހުރެވޭނެއެވެ. ނިކަން ވިސްނައިލަބަލާށެވެ ! އަންޖަލީ ނެތިއްޔާ އަހަރެންނަށް ވާނީ ކިހިނެއް ހެއްޔެވެ ؟ އަންޖަލީ އެހެންނެއް ނުހަދާނެއެވެ. " އަންޖަލީގާތަށް ޖެހިލައި ލޯބިކޮށްލަމުން ދޭވް ބުންޏެވެ.
އެއްގުޅުމެއް ކެނޑުނެއްކަމަކު އެހިސާބުން ، ދިރިއުޅުން ނިމުނީކީނޫނެވެ. ކުރިޔަށް ދާށެވެ ! އާ ދުނިޔެއެއް ހޯދައި އާބާދު ކުރާށެވެ. އަންޖަލީ ދޭވް އަށް ނަޞޭޙަތްތެރިވަމުން ގެންދިޔައެވެ. އެހެންނަމަވެސް ، ދޭވް ހުރީކީ އެކަހަލަ ވާހަކައެއް ޤަބޫލުކުރެވޭފަދަ ޙާލެއްގައެއް ނޫނެވެ.
" އަންޖަލީއާ ނުލާ ހެއްޔެވެ ؟ ދޭވް ސުއާލުކުރިއެވެ. ދޭވް ގެ ސުއާލަށް ، އަންޖަލީ އާނއެކޭ ބުނެ އޭނާއަށްވުރެ ރަނގަޅު މީހަކާއެކުގައި ދިރިއުޅުމެއް އާބާދުކުރުމަށް އެދުނެވެ.
އަންޖަލީ އެތަނަށް އެއައީ އޭނާގެ ގޮތް ނިންމައިގެންކަން ، އެހިސާބުން ދޭވްއަށް އެނގުނެވެ. އަންޖަލީ ދޭވް އެ ދޫކޮށްލަނީ އޭނާ ބަރުބާދުކޮށްލާފައި ކަމަށް ބުނެ އަޑުގަދަ ކޮށްލިއެވެ. އެއީ ދޭވްގެ ގޮތެވެ. ހިތްހަމަ ނުޖެހޭ އަދި ހިތްނޭދޭ އެއްވެސްކަމަކަށް ކެތްތެރިވުމަކީ ދޭވްގެ ޠަބީޢަތުގައި ހުރި ސިފައެއްނޫނެވެ. އެހާ ފަސޭހައިން އަންޖަލީއަށް އޭނާގެ ކިބައިން ސަލާމަތް ނުވެވޭނެކަމަށް ބުންޏެވެ. ދުނިޔެ އެކޮޅުކޮޅުން ޖަހައިލާނަމެވެ.
ދޭވް އެކަހަލަ ކަމެއް ނުކުރާނެއެވެ. އެމީހުންގެ މެދުގައި އޮތް ރަޙުމަތްތެރިކަމުގެ ގުޅުމަށްޓަކައި ، އެފަދަ އަނިޔާވެރިކަމެއް ދޭވް އެއް ނުކުރާނެއެވެ. އަންޖަލީ ދޭވްއަށް ވިސްނައިދެމުން އޭނާއާ ގާތަށް ޖެހިލިއެވެ. އޭނާއާއި އޭނާގެ ބައްޕަ ލަދުގަންނަންޖެހޭފަދަ ކަމެއް ނުކުރާނެކަމަށް ވަޢުދުވުމަށް ދޭވްގެ ކިބައިން އަންޖަލީ އެދުނެވެ. އެހެންނަމަވެސް މީގެފަހުން ، ރަނގަޅުވާނީ އެކަކު އަނެކަކަށް ވަޢުދެއްނުވިއްޔާއޭ ބުނެ ދޭވް އެކަމުން މަނާވެގަތެވެ. އާނއެކެވެ. މިހިސާބުން ރަނގަޅުވާނީ އެއްވެސް ވަޢުދެއް ނުވިއްޔާއެވެ. އަންޖަލީވެސް އެކަމަށް އެއްބަސްވިއެވެ.
" އެހެންވިއްޔާ އަހަރެން ދާންވީ ހެއްޔެވެ ؟ އަހަރެން މިދަނީއެވެ. " އަންޖަލީ ، ދޭވް އާ ކުރި ސުއާލަށް ޖަވާބެއް ނުލިބުމުން ، ފަހަތަށް އެނބުރި ހިނގައިގަތެވެ.
އަޑުއަހާށޭ ބުނެ ، ދޭވް ހަޅޭއްލަވައިގަނެ ، އަންޖަލީ ހުއްޓުވިއެވެ. އަންޖަލީ އެދަނީ ދޭވްއަށް ވީ ވަޢުދު އުވާލާފައެވެ. އަންޖަލީއާ ދިމާއަށް ހަރުއަޑުން ބުންޏެވެ. އެކަމަކު ، އަންޖަލީވަނީ ދޭވްގެ މަންމައަށް އިތުރު ވަޢުދެއްވެފައިކަން ދޭވް ހަނދާން ކޮށްދިނެވެ. ދޭވް އޭނާގެ މަންމަގާތު ބިނާނީ ކީކޭތޯ ސުއާލު ކުރިއެވެ.
" މަންމަގާތު ބުނާށެވެ ! އެއް މަންމައެއްގެ ވަޢުދެއް ފުއްދުމަށްޓަކައި އަނެއް މަންމައެއްގެ ހިތް ހަލާކު ކޮށްލެވުނީއެވެ. އެއީ މަންމައެއް ނޫންހެއްޔެވެ ؟ ވިސްނޭނެއެވެ. " ދޭވްއާ ދިމާއަށް އެނބުރިލައި އަންޖަލީ ބުންޏެވެ.
އަންޖަލީ ، ދޭވްއަށް ޖަވާބު ދިނުމަށްފަހު ކުރިޔަށް ހިނގައިގޮސް ، އަނދިރިގަނޑުގެ ތެރެޔަށް ގެއްލުނެވެ. ދޭވްގެ ދެލޯ އިހުނަށްވުރެ ބޮޑުވިއެވެ. އައިސްފައިހުރި ރުޅިވެރިކަން ދެގުނަޔަށް އިތުރު ވިއެވެ. ދޭވްގެ ހިތަށް އުފާވެރިކަން ދެމުން ގެންދިޔަ ލޯބި ދޭވްއާ ވަކިވީއެވެ. ދޭވްއަށް އޭނާ އާބާދު ކުރަމުންއައި ދުނިޔެވެސް ގެއްލުނީއެވެ. ދުނިޔޭގައި އުޅުމަށް ކުރި އުއްމީދުތައްވެސް ފެނަށްވީއެވެ. ހިތުގައި އަޅަމުންދިޔަ ވޭނަށް ކެތްކުރެވޭވަރަށްވުރެ ، އޭނާގެ ޙާލުބޮޑުވިއެވެ. އަމިއްލަ ނަފުސުގެ ކޮންޓްރޯލް ގެއްލިގެން ދިޔައެވެ.
ދޭވް އަށް ގެއްލިގެން އެދިޔައީ ، ދެމީހެއްގެ މެދުގައި އުފެދުނު ޢަހުދާއި ވަޢުދުގެ ބަރޯސާގައި ، ފާގަތި ދިރިއުޅުމެއް އާރާސްތު ކުރުމަށް ކުރެވެމުންދިޔަ ، އުއްމީދުން ފުރިގެންވާ ، ހިތްގައިމު މަސައްކަތެއްގެ ނިމުމެވެ. އިންސާނެއްގެ ހިތުގެ ވިންދު ހުއްޓި ދުނިޔެއަޅައި ދިއުންފަދަ ވޭންހުރި ކަމެކެވެ. އަދި އަމްދުން ، ދޭވްފަދަ ފަޤީރު ނިކަމެއްޗަކަށް އެއީ ބަރުދާސްތު ކުރެވޭވަރު ކަމެއްނޫނެވެ. ދޭވްގެ ވިސްނުމާއި ފިކުރާ ، ޚިޔާލާތު ، އޭނާގެ ހަފަރާތުން އައިސް ބައްދައިލިއެވެ.
އަންޖަލީގެ އެންމެ ފަހުބަހަކަށްވީ ، ދޭވްއަށް ވީވަޢުދާއި އަހުދަށް އޭނާ ޚިޔާނާތްތެރިވިކަމަށް އެއްބަސް ވުމެވެ. އަދި ދޭވްގެ މަންމަޔަށްވީ ވަޢުދާވެސް ޚިލާފުވިކަން ޤަބޫލުކުރުމެވެ. އެހެނަސް ، އަންޖަލީ ، ދޭވްގެ މަންމަޔަށްވީ ވަޢުދު އެއުވައިލީ ، އޭނާގެ މަންމަޔަށް ވެފައި އައި ވަޢުދު ފުއްދުމަށެވެ. އެއް މަންމަގެ ވަޢުދު އުވައިލީ އަނެއް މަންމަގެ ވަޢުދު ފުއްދައި ދިނުމަށެވެ. އަޔާނަކަށް އެކަމެއް ނުވިސްނޭނެއެވެ. ޤަބޫލެއްވެސް ނުކުރެވޭނެއެވެ. އަންހެނެއްކަމަށްވާތީ ، ދޭވްގެ މަންމަޔަށް އެހުރިހާކަމެއް ވިސްނޭނެއެވެ.
އަންޖަލީގެ ތެދުވެރި ހިތާއި ، ހުޅުވިފައިވާ ވިސްނުމުގެ ތެރެއިން ، އޭނާގެ ކުރިމަތީ އޮތް ދޭވްގެ ލޯތްބާއި މަންމައާއި ބައްޕަގެ ލޯބީގެ ތެރެއިން ، އިޙުސާންތެރި ދަރިއެއްގެ ވާޖިބުން ، އޭނާގެ ހިތް އިޚުތިޔާރުކުރީ މަންމައާއި ބައްޕަގެ ލޯތްބެވެ. އެއީ އޭނާ ދުނިޔެއަށް އައީއްސުރެ އެއްވެސް އުނިކަމެއްނެތި އޭގެ އިންތިހާގައި މިހާތަނަށް ލިބެމުން އައި ، އެހެން އެއްވެސް އެއްޗަކާ ނުބައްދަލު ، މަތިވެރި ލޯތްބެކެވެ.
ދޭވްގެ ހިތުގެ ވިންދު ނުކެނޑުނުނަމަވެސް ، އެވިންދުގައި ކުޑަވެސް ދިރުމެއްނެތެވެ. ދިރުންހުރި އުއްމީދެއްގެ ކަންފުޅެއްވެސް ނެތެވެ. ދޭވްގެ ހިތް އޭނާ ދެންގެންދިޔައީ އެކަނިވެރިކަމުގެ ޢާލަމަކަށެވެ. އެރޭ އެއުޅުނުތަނެއްގައި އުޅެފައި ލަސްވީފަހުން ގެޔަށް އައިސް އެވަނީ ހުސްއަތާއެވެ. ފޮތިފޮތިވެފައިވާ ހިތަކައިގެން ، އައިސް ގެޔަށް ވަންނަން ދޮރުހުޅުވާލިއިރު ، ދޭވްގެ މަންމަ ، އޭނާގެ ދަރިފުޅުގެ އިންތިޒާރުގައި ހޭލާއިނެވެ. ފެންކަޅިވެފައިހުރި ދޭވް ފެނުމާއެކު ، އެމަންމަގެ ހިތް ތެޅިގަތެވެ. ދޭވް އެހުރީ ހަމައިގާ ނޫންކަން އެމަންމަ ދެނެގަތެވެ. އެމަންމަ ، ނުނިދާ އިނދެ ، އިންތިޒާރުކުރަމުން އެދަނީ ، އަންޖަލީމެންގެއިން އައިސް ދޭވް ދޭނެ އުފާވެރި ޚަބަރަށެވެ.
(ނުނިމޭ)
varah varahves reethi shukuran