ސައޫދީ އަރަބިއްޔާގެ ރަސްގެފާނު ސަލްމާން ބިން ޢަބްދުލްޢަޒީޒް އާލްސުޢޫދު އީރާނަށް ރަސްމީ ދަތުރުފުޅެއް ކުރެއްވުމަށް އީރާނުގެ ރައީސު އިބްރާހީމް ރައީސީ ދަޢުވަތު އަރުވާފައިވާކަމުގައި އީރާނުން ބުނެފިއެވެ.
ދެ ގައުމުގެ ގުޅުން ކެނޑިފައި އޮންނަތާ 7 އަހަރު ފަހުން ފާއިތު މާރިޗު މަހު ދެ ގައުމުން ވަނީ ގުޅުންތައް އަލުން ގާއިމުކުރުމާ ބެހޭ އެއްބަސްވުމެއްގައި ސޮއިކޮށްފައެވެ.
މި އެއްބަސްވުމަށް ފަހު ދެ ގައުމުން ވަނީ ގުޅުން ބަދަހިކުރުމާ ގުޅޭ ތަފާތު ބައްދަލުވުންތައް ކުރިއަށް ގެންގޮސްފައެވެ. އެގޮތުން ދެ ގައުމުގެ ޚާރިޖި ވަޒީރުން ބައްދަލުކުރެއްވުމަށް ފަހު، އެންބަސީތައް ހުޅުވައި، ދަތުރުފަތުރުގެ ޚިދުމަތް ފެށުމަށްވެސް ވަނީ ނިންމަވާފައެވެ.
ސައޫދީ އަރަބިއްޔާއިން 2016 ވަނަ އަހަރު އީރާނާ ގުޅުން ކަނޑާލީ، ސައޫދީ އަރަބިއްޔާގެ ޝީޢީ ޝައިޚް އައްނިމްރްގެ މައްޗަށް މަރުގެ ހުކުމް ތަންފީޒުކުރުމާ ގުޅިންގެން ސައޫދީ ސަރުކާރާ ދެކޮޅަށް އީރާނުގައި ކުރިއަށް ދިޔަ އިހުތިޖާޖުތަކުގައި ތެހެރާނުގައި ހުންނަ ސައޫދީ އެންބަސީއާއި، މަޝްހަދުގައި ހުންނަ ސައޫދީ ކޮންސިއުލޭޓުގައި ހުޅުޖެހުމާ ގުޅިގެންނެވެ.
އީރާނުގެ ފޮރިން މިނިސްޓްރީގެ ތަރުޖަމާނު ނާސިރު ކަނާނީ އިއްޔެ (ހޯމަ ދުވަހު) ހާމަކުރެއްވި ގޮތުގައި ރައީސު އިބްރާހީމް ރައީސީ ދައުވަތު ސަލްމާން ރަސްގެފާނަށް ފޮނިވިއިރު، ރައީސު ރައީސީ ސައޫދީ އަރަބިއްޔާއަށް ދަތުރުފުޅެއް ކުރެއްވުމަށް ސައޫދީ ރަސްގެފާނު ވަނީ ދައުވަތު ދެއްވާފައެވެ.
ބެއިޖިންގެ އެއްބަސްވުމުގައި އެއްބަސްވެފައިވާ ގޮތަށް މޭ މަހުގެ 9 ވަނަ ދުވަހު އެއް ގައުމުން އަނެއް ގައުމުގައި އެންބަސީ ހުޅުވާނެކަމަށް އުއްމީދުކުރެވޭ ކަމުގައިވެސް ތަރުޖަމާނު ކަނާނީ ވަނީ ވިދާޅުވެފައެވެ.
"އަހަރުމެންނާ ސައޫދީން ގަދައަޅައި މަސައްކަތް މިކުރަނީ ކަނޑައެޅިފައިވާ ވަގުތުގައި އެންބަސީތައް ހުޅުވުމަށް. އެންބަސީގެ ޚިދުމަތް ހޯދައިގެން އީރާނުގެ ހައްޖުވެރިންނަށް ހަމަޖެހިލައިގެން ހައްޖުގެ އަޅުކަން އަދާކުރުމުގެ މަގުފަހިވެގެން ދާނީ އޭރުން." ކަނާނީ އިތުރަށް ވިދާޅުވިއެވެ.
ސައޫދީ ޚާރިޖީ ވަޒީރު ފައިސްލް ބިން ފަރްޙާންއާއި އީރާނުގެ ޚާރިޖީ ވަޒީރު ޙުސައިން އަމީރް ޢަބްދުއްލަހިޔާން މި އެޕްރީލް މަހުގެ 9 ވަނަ ދުވަހު ބައްދަލުކުރައްވާފައި ވާއިރު، އެންބަސީތައް ހުޅުވުމުގެ ކުރިން ދެ ބޭފުޅުން ބައްދަލުކުރައްވާނެ ކަންވެސް ކަނާނީ ހާމަކުރެއްވިއެވެ.
