(15 އޭޕްރީލް 2023 ގައި ޝާއިއުކުރި ބަޔާ ގުޅޭ)
ރާއްޖޭގެ ދެވަނަ ޖުމްހޫރިއްޔާގެ 6 ވަނަ ރައީސަކީ ، އަލްފާޟިލް އިބްރާހީމް މުޙައްމަދު ޞާލިޙެވެ. ރައީސް ޞާލިޙުގެ އަރިސްބޭފުޅުންގެ ނަމުންނަމަ އިބޫ އެވެ. ހަތަރުމަތިފުށް މާލޭ ބޭފުޅެއްފިޔަވައި ، ރާއްޖޭގެ އަތޮޅުތަކަށް ނިސްބަތްވާ ބޭފުޅަކު ، ރާއްޖޭގެ ރައީސުލްޖުމްހޫރިއްޔާގެ މަޤާމަށް އިންތިޚާބުވެ ވަޑައިގެންނެވި ، ތާރީޚު ބަދަލުކޮށްލެއްވި ބޭފުޅަކީ ، ފާދިއްޕޮޅު ހިންނަވަރު ނޫރާނިއާގޭ އަލްފާޟިލް އިބްރާހީމް މުޙައްމަދު ޞާލިޙެވެ.
2018 ވަނައަހަރުގެ ރިޔާސީ އިންތިޚާބުގައި ، އެމްޑީޕީގެ ފަރާތުން ވާދަކުރައްވާ ކެންޑިޑޭޓެއްގެ ގޮތުގައި ، ރައީސް ޞާލިޙް ހަމަޖެހިގެން ދިޔައީ ، ކުރީގެ ރައީސް ، ރައީސް ނަޝީދަށް އެއަހަރުގެ އިންޔިޚާބުގައިވާދަނުކުރެއްވޭގޮތަށް ޤާނޫނު އަސާސީ އިޞްލާހުކުރެވިފައިވާތީއެވެ. ރައީސް ޞާލިޙް ސިޔާސީ ޙަރަކާތްތަކުގެ ތެރެޔަށް ވެދެވަޑައިގަތީ ، ރައްޔިތުންގެ މަޖިލިސްގެ ފާދިއްޕޮޅުގެ ، ގޮނޑިއަށް 1994 ގައި ހޮވިވަޑައިގަތުމާއެކުގައެވެ. އެމަނިކުފާނު ރައްޔިތުންގެ މަޖިލީހަށް ހޮވިވަޑައިގަތީ ޢުމުރުފުޅުން 30 އަހަރުފުޅުގައެވެ. އެޢުމުރުގެ ޒުވާނުންނަކީ އެދުވަސްވަރު ، ރާއްޖޭގެ ސިޔާސީ މައިދާނުން ޖާގަލިބެން އެހައި ފަސޭހަބައެއްނޫނެވެ. އޭގެ މިސާލަކީ ، ރައީސް ޞާލިޙުގެ ގާތް އެކުވެރިއެއްކަމުގައިވާ ރައީސް ނަޝީދެވެ. ރައީސް ނަޝީދުވެސް ، ރައްޔިތުންގެ މަޖިލީހުގެ މާލޭގެ ގޮނޑިޔަށް ކުރިމަތިލައްވައި 1999 ގައި މަޖިލީހަށް ހޮވިވަޑައިގަތެވެ. އެހެންނަމަވެސް ، ވަށްކަމުގެ ތުހުމަތެއްކުރެވި ، ޝަރީޢަތް ހިންގި ، ރައީސް ނަޝީދު އަރުވައިލެވުނެވެ. ރައީސް ނަޝީދާއި ރައީސް ޞާލިޙުގެ ތަފާތަކީ ، ރައީސް ނަޝީދަކީ އެކްޓިވިސްޓެއްކަމެވެ. އަދި ރައީސް ޞާލިޙަކީ ، ސިޔާސީ ޙަރަކާތްތެރިއެއްކަމެވެ.
ރައީސް ނަޝީދަށް ވެރިކަން ލިބިވަޑައިގެން ، ތިންއަހަރެއްހާ ދުވަހަށްވެސް އެވެރިކަން ދެމެހެޓުމަށް ދަތިފުޅުވިއެވެ. ޚުދު އެމަނިކުފާނުގެ ކޮމާންޑަރ އިންޗީފްކަމުގައި ، އަތްޕުޅުގައި އޮތް ސާލާމަތީ ބާރުތަކުގެ ކޮންޓްރޯލް ގެއްލި ، ވެރިކަމުން އިސްތިޢުފާ ދެއްވުމަށް މަޖުބޫރުވިއެވެ. ކޯލިޝަނާއެކު މަސައްކަތެއް ނުކުރެއްވުނެވެ. 2023 ގެ ރިޔާސީ އިންތިޚާބުގައި އެމްޑީޕީގެ ފަރާތުން ވާދަކުރާނެ ކެންޑިޑޭޓަކު ކަނޑައެޅުމަށް ، ނެގުނު ޕްރައިމަރީގައި ، ރައީސް ޞާލިހާއި ރައީސް ނަޝީދު ވާދަކޮށް ، ރައީސް ނަޝީދުގެ މައްޗަށް ، ރައީސް ޞާލިޙު ކުރި ހޯއްދެވިއެވެ.
ރައީސް ޞާލިޙުގެ ރިޔާސީ ދައުރު ފުރިހަމަ ކުރެއްވުމަށް އެއްވެސް ދައްޗެއް ކުރިމަތިވެވަޑައެއް ނުގަންނަވައެވެ. ކިރިޔާވެސް ، ދައްޗެއް ކުރިމަތިވަންޏާ އެދައްޗަކީ ، ރައީސް ނަޝީދު ރައީސްކަންކުރައްވާ ރައްޔިތުންގެ މަޖިލީހުން ، ރައީސް ނަޝީދަށް ތާއީދު ކުރައްވާ މަދު މެންބަރުންކޮޅެއްގެ ފަރާތުން ސަރުކާރަށް ކުރިމަތިވާ ދަތިކަމަށް ، ރައީސް ޞާލިޙަށް ތާއީދު ކުރައްވާ މެންބަރުން ވިދާޅުވެއެވެ. ރައީސް ނަޝީދުގެ ކޯލިޝަން ރޫޅުނުނަމަވެސް ، ރައީސް ޞާލިޙު ، ދައުރު ފުރިހަމަ ކުރައްވަމުން އެނިންމަވައިލައްވަނީ ކޯލިޝަންގެ ބައިވެރިންނާއެކުގައެވެ.
މިއަހަރު ބޭއްވޭ ރިޔާސީ އިންތިޚާބުގައި އެމްޑީޕީގެ ފަރާތުން ވާދަކުރައްވާ ކެންޑިޑޭޓަކީ ، ރައީސް ޞާލިޙްކަމުގައި އެމްޑީޕީގެ މެންބަރުންވަނީ ނިންމާފައެވެ. ރައީސް ނަޝީދު ، އެމަނިކުފާނާ ބައިވެރިވެ ވަޑައިގަތުމަށް ، ރައީސް ޞާލިޙުވަނީ ދަޢުވަތު ދެއްވާފައެވެ. އެހެނަސް ، ރައީސް ޞާލިޙުގެ ފަހަތްޕުޅަށް އެރުމަށް ރައީސް ނަޝީދު ބޭނުމެއް ނުވެއެވެ. ރައީސް ނަޝީދުގެ ބޭނުންފުޅަކީ ، ކޮންމެ ޙާލެއްގައިވިޔަސް ، ރައީސް ޞާލިޙުގެ ސިޔާސީ ޙަޔާތް ބަރުބާދުކޮށްލުމެވެ.
ރައީސް ޞާލިޙު ހުންނެވީ ، އެމަނިކުފާނުގެ ވެރިކަމަށް އިތުބާރުކުރައްވާ ކޯލިޝަންގެ ބައިވެރިންނާއި ، އެމަނިކުފާނުގެ ސަރުކާރުގެ އިސްވެރިންގެ ޚިދުމަތުން ، ރިޔާސީ ދެވަނަ ދައުރެއް ކަށަވަރުކުރައްވައިގެންނެވެ. ފިކުރެއްގެ ދިރުމުގެ ނަމުގައި ވަކި ސިޔާސީ ފިކުރެއް އުފަންކޮށް ، ރައީސް ޞާލިޙާ ދެކޮޅަށް ، ކުރީގެ ރައީސް ، ރައްޔިތުންގެ މަޖިލީހުގެ ރައީސް ، އެމްޑީޕީގެ ރައީސް ނަޝީދު ކިތަންމެ މަސައްކަތެއް ކުރެއްވިޔަސް ، ނަޝީދުގެ މައްޗަށް ޞާލިޙު ކުރިހޯއްދަވާނެކަމަށް ގިނަބަޔަކު ދެކެއެވެ. އެފަދަ ލަދެއްގައި ނުބެދިވާނެގޮތެއް ހޯދުމަށްޓަކައި ، ރައީސް ޞާލިޙާ ދެކޮޅަށް އިންތިޚާބުގައި ވާދަކުރުމަށް ނިކުންނަ އެހެންޕާޓީތަކާއެކު ، ރައީސް ނަޝީދު އެގެންދަވަނީ ، ޕާޓީގެ ރައީސަކަށްވެހުރެ ، ޕާޓީގެ އަސާސީ ޤަވާޢިދާ ޚިލާފުވަމުންނެވެ. މާލެއަތޮޅު ގުރައިދޫގެ މަޖިލިސް އިންތިޚާބު ، އެމްޑީޕީގެ ރައީސް ޞާލިޙަށް ތާއީދުކުރައްވާ މެންބަރަކު ކާމިޔާބު ކުރެއްވުން ، އެއީ 2023 ގެ ރިޔާސީ އިންތިޚާބުގައި ރައީސް ޞާލިޙު ކާމިޔާބު ހޯއްދަވާނެކަމުގެ ހެއްކެއްގެ ގޮތުގައި ، ގިނަބަޔަކު ދެކެއެވެ. އެއީ ރައީސް ޞާލިޙަށް ޙައްޤު ދަރަޖަކަމަށް ވެދާނެއެވެ. (ނިމުނީ)
