(12 އޭޕްރީލް 2023 ގައި ޝާއިއުކުރި ބަޔާ ގުޅޭ)
ރާއްޖޭގެ ދެވަނަ ޖުމްހޫރިއްޔާގެ 3 ވަނަ ރައީސަކަށްވެވަޑައިގަތީ ، ގ. ކެނެރީގޭ އަލްފާޟިލް މުޙައްމަދު ނަޝީދެވެ. އެމަނިކުފާނު ވަރިކަމަށް ވަޑައިގަތީ ، ޑިމޮކްރެޓިކް ހަމަތަކުން ރާއްޖޭގައި ފުރަތަމަފަހަރަށް ބޭއްވުނު ، ގިނަޕާޓީބައިވެރިވި ފުރަތަމަ އިންތިޚާބުގައި ، ރައީސް މައުމޫނު ބަލިކުރައްވާފައެވެ. އެއީ 2008 ވަނައަހަރުގެ ރިޔާސީ އިންތިޚާބެވެ. އެއިންތިޚާބު ދެބުރަކަށް ބޭއްވުނެވެ. ފުރަތަމަ ބުރުގައި އެންމެ ގިނަވޯޓު ލިބިވަޑައިގަތީ ރައީސް މައުމޫނަށެވެ. ދެވަނަ ބުރުގައި ކުރިހޯއްދަވައި އިންތިޚާބު ކާމިޔާބު ކުރެއްވީ ރައީސް ނަޝީދާއި ރައީސް ވަޙީދެވެ. ރައީސް ވަޙީދު ވެވަޑައިގަތީ ރައީސް ނަޝީދުގެ މައިބު ރައީސަށެވެ. މިއިންތިޚާބު ވެގެންދިޔައީ ، ރައީސް މައުމޫނުގެ 30 އަހަރުވީ ވެރިކަމުގެ ނިމުމަށެވެ.
ރައީސް ނަޝީދު ވެރިކަމަށް ވަޑައިގެން ، ޒަމާނާ އެކަށޭނަ ބަދަލުތައް ވެރިކަމަށް ގެންނެވިއެވެ. މިނިވަންކަން ޤާނޫނު ހުއްދަކުރާ މިންވަރަކަށް ބޭނުން ކުރުމަށް ދޫކޮށްލެއްވިއެވެ. އޭގެ ތެރޭގައި ރައީސް މައުމޫނު ދެމެހެއްޓެވި ދީނީ އެއްބައެއްވަންތަކަން ނެތި ދިޔަ ، ދީނީ މިނިވަންކަންވެސް ދޫކޮށްލެއްވިއެވެ. ރިސޯޓަކުން އަހަރަކަށް ލިބޭ އާމްދަނީން ޤައުމު ހިންގޭނެކަމަށް ވަކާލާތު ކުރައްވައި ވެރިކަމަށް ވަޑައިގެންނެވި ، ރައީސް ނަޝީދުގެ ވެރިކަމުގައި ހިނގައިގެން ނުވާނެ އެތައްކަމެއް ހިނގާފައި ވެއެވެ. ކޯލިޝަނަކާއެކު ވެރިކަމަށް ވަޑައިގެންނެވިނަމަވެސް ، ވެރިކަން ހިންގެވުމަށް ދަތިފުޅުވެ ، ކޯލިޝަންގެ ބައިވެރިން ބާކީވިއެވެ. ޚުދު އެމަނިކުފާނުގެ ނައިބު ރައީސް ޑރ. ވަޙީދާ ޚިޔާލުތަފާތުވެ ، ދެބޭފުޅުންގެ ގުޅުން ގޯސްވިއެވެ.
ރައީސް ނަޝީދުގެ ވެރިކަމާ ޚިޔާލުތަފާތުވެ ވެރިކަމާ ފެޔަށްޖެހުނު ޕާޓީތައް ގުޅުނެވެ. ނަތީޖާއަކަށްވީ ، އިދިކޮޅު ޙަރަކާތްތައް އިތުރުވެ ، ވެރިކަން ހިންގެވުމަށް ދަތިފުޅުވެ ، ރައީސް ނަޝީދު ، ވެރިކަމުން އިސްތިޢުފާ ދެއްވަން މަޖުބޫރު ވުމެވެ. ރައީސް ނަޝީދަށް ވެރިކަމުގައި ހުންނެވުނީ 3 އަހަރާއި 2 މަހާއި 24 ދުވަހުއެވެ. ސިފައިންގެ އެންމެ މަތީ މަޤާމުގައި ހުންނެވިނަމަވެސް ، ސަލާމަތީ ބާރުތަކުގެ ކޮންޓްރޯލް އެމަނިކުފާނުގެ އަތްޕުޅުން ބީވިއެވެ. ވެރިކަމުން ވަކިވެވަޑައިގެން ، ރައީސް ނަޝީދު ވިދާޅުވެފައިވާ ގޮތުގައި ، އެމަނިކުފާނު ވެރިކަމުން ދުރުކުރެވުނީ ބަޣާވާތަކުންނެވެ. ރައީސް ނަޝީދު އިސްތިޢުފާދެއްވުމާއެކު ، ރާއްޖޭގެ ވެރިކަމަށް ދެންވަޑައިގަތީ ، އެމަނިކުފާނުގެ ނައިބު ރައީސް ޑރ. ވަޙީދެވެ.
ރައީސް ނަޝީދުގެ ވެރިކަމުގައި ، އާސަންދަ ތަޢާރުފް ކުރައްވައި ، ފޮތްފަންސުރު ހިލޭލިބޭނެގޮތް ހަމަޖައްސަވައި ، ރައީސް ނަޝީދުގެ ބަހުންނަމަ ، ބޭސްފަރުވާއަށް ސަލާންޖެހުން ނައްތައި ލެއްވިއެވެ. ޢުމުރުން ދުވަސްވީ މީހުންނަށް އަސާސީ ޕެންޝަނެއް ތަޢާރުފް ކުރެއްވިއެވެ. އެކަނިވެރިމައިންނާއި ނުކުޅެދުންތެރިކަން ހުންނަ މީހުންނާއި ކުދިންނަށް ދާއިމީ އެލަވަންސެއް ހަމަޖެއްސެވިއެވެ.
ވެރިކަމުން ފައިބައިވަޑައިގެން މާގިނަދުވަހެއްނުވެ ، އެމްޑީޕީއާއެކު އިދިކޮޅު ޙަރަކާތަށް ، ރައީސް ނަޝީދު ނުކުމެވަޑައިގަތެވެ. އަދި 2013 ވަނައަހަރު ބޭއްވުނު ރިޔާސީ އިންތިޚާބުގައި ، ރައީސް ޔާމީނާ ވާދަކުރައްވައި ނާކާމިޔާބުވެވަޑައިގަތެވެ. 2018 ވަނައަހަރުގެ ރިޔާސީ އިންތިޚާބުގައި ރައީސް ނަޝީދަށް ވާދަކުރެއްވުމަށް ޤާނޫނީ ހުރަސްތަކެއް ހުރުމާއެކު ، އިންތިޚާބަށް ކުރިމައްޗެއް ނުލެއްވުނެވެ. އެއިންތިޚާބު ކޯލިޝަނަކާގުޅިގެން ކާމިޔާބު ކުރީ އެމްޑީޕީއެވެ.
ޖެހިގެންއައި 2019 ވަނައަހަރުގެ ރައްޔިތުންގެ މަޖިލީހުގެ އިންތިޚާބަށް މާލެއިން މައްޗަންގޮޅީ މެދުދާއިރާއަށް ކުރިމަތިލައްވައި ، އެމަނިކުފާނާ ވާދަކުރެއްވި ކެންޑިޑޭޓަށްވުރެ 202 ވޯޓު އިތުރަށް ހޯއްދަވައިގެން ، ރައީސް ނަޝީދު ، ރައްޔިތުންގެ މަޖިލީހަށް ހޮވިވަޑައިގަތެވެ. އަދި 29 މެއި 2019 ގައި ، ޖުމްހޫރީ ޕާޓީން ކުރިމަތިލެއްވި އަލްފާޟިލް ޤާސިމް އިބްރާހީމާ ވާދަކުރައްވައި ، ރައްޔިތުންގެ މަޖިލީހުގެ ރައީސްގެ މަޤާމަށް ވަޑައިގަތެވެ.
އެމްޑީޕީގެ ފަރާތުން 2023 ގެ ރިޔާސީ އިންތިޚާބަށް ކުރިމަތިލައްވާ ދެކެންޑިޑޭޓުންގެ މެދުގައި ނެގުނު ޕްރައިމަރީގައި ، ރައީސް ޞާލިޙާ ވާދަކުރައްވައި ، ރައީސް ނަޝީދަށް އެމްޑީޕީގެ ކެންޑިޑޭޓުގެ ގޮތުގައި 2023 ގެ ރިޔާސީ އިންތިޚާބަށް ކުރިމަތިލެއްވުމުގެ ދޮރު ބަންދުވިއެވެ. ޕްރައިމަރީން ނާކާމިޔާބުވެވަޑައިގަތުމާއެކު ، އެމްޑީޕީގެ ތެރެއިން " ފިކުރެއްގެ ދިރުން " ނަމުގައި ވަކި ފެކްޝަނެއް އުފެއްދެވިއެވެ. އަދި ، އެމްޑީޕީގެ ފަރާތުން 2023 ގެ ރިޔާސީ އިންތިޚާބުގައި ވާދަކުރެއްވުމަށް ޕާޓީގެ މެންބަރުން ހޮވި ، ރައީސް ޞާލިޙާ ދެކޮޅަށް މަސައްކަތް ފަށްޓަވައިގެން ކުރިޔަށް އެބަގެންދަވައެވެ. ވީގޮތެއްވާން ، އެހެން ޕާޓީއަކާއެކު ވެރިކަމުން ބައެއްނަމަވެސް ، ލިބިވަޑައިގަތުމުގެ އުއްމީދުގައެވެ. އެމްޑީޕީގެ ރައީސްގެ މަޤާމުގައި ހުންނަވައި ، އެމްޑީޕީގެ ފަރާތުން ހޮވިވަޑައިގެން ވެރިކަން ކުރައްވަމުން ގެންދަވާ ރައީސުލްޖުމްހޫރިއްޔާ ، ރައީސް ޞާލިޙާ ދެކޮޅަށް ނުކުންނަވައި ، އެމްޑީޕީއަށް އޮތް އެންމެ މޮޅުގޮތަކީ އެއީކަމަށް ވިދާޅުވަމުންނެވެ.
