ޔަމަނުގައި ހިނގަމުންދާ ދާޚިލީ ހަނގުރާމަ ހުއްޓުވާ ގުޅޭ އެއްބަސްވުމެއް އެކުލަވައިލުމަށްޓަކައި ޝީޢާ ހަނގުރާމަވެރި ޖަމާއަތް ޙޫޘީންނާ ސައޫދީ އަރަބިއްޔާއާއި، މި މަޝްވަރާތަކުގައި މެދުވެރިއެއްގެ ގޮތުން ބައިވެރިވާ އޮމާންގެ ބޭފުޅުންގެ މައްޗަށް އެކުލެވޭ ވަފުދެއް ޔަމަނަށް ހިނގައްޖެއެވެ.
ޔަމަނުގެ ނިއުސް އެޖެންސީ، ސަބާއިން ބުނި ގޮތުގައި އެ ވަފުދު ވަނީ ޙޫޘީންގެ ކޮންޓުރޯގެ ދަށުގައި އޮތް ޔަމުނުގެ ވެރިރަށް ސަންއާއަށް އިއްޔެ ގޮސް ޙޫޘީން ސިޔާސީ ލީޑަރު މަހްދީ އަލްމަޝާޠުއާ ބައްދަލުކޮށްފައެވެ. ޙޫޘީން މިހާރު ހިންގާ ސަބާ ނިއުސް އެޖެންސީން ވަނީ ސައޫދީ ވަފުދުގެ ވެރިޔާ، ޔަމަނަށް ކަނޑައަޅާފައި ހުންނަވާ ސައޫދީ ސަފީރު މުޙައްމަދު އާލްޖާބިރު ޙޫޘީ ލީޑަރާ ސަލާންކުރައްވާ މަންޒަރު ފެންނަ ފޮޓޯއެއް އާއްމުކޮށްފައެވެ.
ސައޫދީ ބައެއް ނޫސްތަކުން ބުނެފައިވާ ގޮތުގައި ސައޫދީ ވަފުދު މިފަހަރު ޔަމަނަށް ދިޔައީ ސުލްހައިގެ "އެންމެ ފަހުގެ އެއްބަސްވުން" ކަމަށް ވެދާނެ އެއްބަސްވުމެއް އެކުލަވާލުމަށެވެ.
އީރާނާ ސައޫދީ އަރަބިއްޔާއާ ދެމެދު ގުޅުން އާދައިގެ ހާލަތަށް އެނބުރި އައުމުން، އީރާނުގެ ތާއީދާއެކު ޔަމަނުގައި ހަނގުރާމަކުރަމުންދާ ޙޫޘީންނާ ސައޫދީންނާ ދެމެދު ގުޅުން ރަނގަޅުވާނެ ކަމަށް އޮތީ ބެލެވިފައެވެ. އެހެންކަމުން، ޔަމަނުގެ ހަނގުރާމައަށް ފަހު ސައޫދީން ޔަމަނުގެ ސަންއާއަށް ފޮނުވި އެންމެ މަތީ ފެންވަރުގެ ވަފުދުގެ ބޭފުޅުންނަށް ސަންއާގެ ރިޔާސީ ގަނޑުވަރުގައި ޙޫޘީ ވެރިން މަރުހަބާކިއުމަކީ މަސްރަހު ބަދަލުވަމުންދާ މިންވަރު ދައްކައިދޭ ކަމެކެވެ.
ބައިނަލްއަގުވާމީ ގޮތުން ގަބޫލުކުރާ ޔަމުނުގެ ސަރުކާރުން ބުނި ގޮތުގައި ސައޫދީ ވަފުދު ޙޫޘީންނާއެކު ބާއްވާ މަޝްވަރާތަކުގައި އެ ސަރުކާރުން ޙޫޘީންނަށް ހުޅަހަށާފައިވާ ސުލްހައިގެ އެއްބަސްވުމުގެ ދެލިކޮޕިއާ ގުޅޭގޮތުން ވާހަކަދައްކާނެއެވެ.
ސައޫދީންގެ ބައިވެރިވުމާއެކު އެކުލަވާލާފައިވާ މި ދެލިކޮޕީގައި ވާގޮތުން އދ. މެދުވެރިވެގެން މިހާރު ގާއިމުކޮށްފައިވާ ވަގުތީ ސުލްހަ 6 މަސްދުވަހަށް އިތުރުކުރުމާއި، ދެ އަހަރު ދުވަހުގެ އިންތިގާލީ މަރުހަލާއަކާ ބެހެގޮތުން އދ.ގެ ބެލުމުގެ ދަށުން ޙޫޘިންނާ ޔަމަނު ސަރުކާރާ ދެމެދު ސީދާ މަޝްވަރާތައް ކުރިއަށް ގެންދާނެއެވެ.
މީގެ އިތުރަށް ޙޫޘީން ކޮންޓުރޯލުކުރާ ސަރަހައްދުގައި ހިމެނޭ ބަނދަރުތަކާއި، އެއާޕޯޓުތަކާ ދެކޮޅަށް އަޅާފައިވާ ފިޔަވަޅުތައް އުވާލުމާއި، އެ ސަރަހައްދުގައި މަސައްކަތްކުރާ ސަރުކާރު މުވައްޒަފުންނަށް ބަދަލުދިނުމާއި، ތަޢިޒާއި އެހެން ޕްރޮވިންސުތަކުގެ މަގުތައް ހުޅުވާލުންވެސް މި ދެލިކޮޕީގައި ހިމެނެއެވެ.
2105 ގައި ފެށުނު ދާޚިލީ ހަނގުރާމަގައި އެތައް ހާސް ބަޔަކު މަރުވެ އެތައް ލައްކަ ބައެއްގެ ގެދޮރު ގެއްލިފައިވާއިރު، ހަނގުރާމަކޮށްގެން އެއްވެސް ބަޔަކު ބޭނުންވާ އަމާޒަށް ވާސިލުނުވެވޭނެކަން މިހާރު އެނގެއެވެ. އެހެންކަމުން، ޔަމަނަށް ހަމަޖެހުން އަންނަން އޮތީ ސުލްހަވެރި ގޮތުގައި މައްސަލަތައް ހައްލުކޮށްގެންނެވެ. ސައޫދީން މިހާރު ދަނީ އެ މަސައްކަތްކުރަމުންނެވެ.
