(7 އޭޕްރީލް 2023 ގައި ޝާއިއުކުރި ބަޔާ ގުޅޭ)
ޔަޢުޤޫބުގެފާނަކަށް ، އެކަލޭގެފާނުންގެ ބޭފުޅުން ދެންނެވި ވާހަކަ ޤަބޫލުފުޅެއް ނުކުރެއްވުނެވެ. އެކަލޭގެފާނަށް ޤަބޫލުފުޅު ކުރެއްވުނުގޮތުގައި ، ޔޫސުފުގެފާނު ދުނިޔޭގައި އެބަހުންނެވިއެވެ. އެކަލޭގެފާނުގެ އެހެން ފިރިހެނބޭފުޅުންގެ ހިތްތަކަށް ޝައިޠާނާ ވަސްވާސްދީގެން ، ހުރިހާކުދިންވެގެން ޔޫސުފުގެފާނަށް ގެއްލުމެއްދިނީއެވެ. ވަލުޖަނަވާރު ، ޔޫސުފުގެފާނު ކައިލިއިރު ، އެކަލޭގެފާނު ތުރުކުރައްވައިގެން ހުންނެވި ގަމީސްކޮޅަށް އެއްވެސް ގެއްލުމެއް ދީފައެއް ނުވެއެވެ. ޔަޢުޤޫބުގެފާނު އެކަން ފާހަގަ ކުރައްވައި ، ވަލުޖަނަވާރުގެ އޯގާތެރިކަން ފާހަގަ ކުރެއްވިއެވެ. އަދި އެކަމަށް ކެތްތެރިވެވަޑައިގަތުމާއެކު ، ޔޫސުފުގެފާނު ގަދަވެ ހެޔޮޙާލުކޮޅުގައި އެކަލޭގެފާނު އަރިހަށް ރުޖޫޢަކޮށްދެއްވުން އެދި ﷲ އަށް ދުޢާ ދެންނެވިއެވެ.
ޔޫސުފުގެފާނު ، ވަޅުތެރެއަށް ވެއްޓިވަޑައިގަތުމާއެކު ، ސަލާމަތް ހޯއްދެވުމަށްޓަކައި ، ހިލައެއްގެ ކަނުން ޙިމާޔަތް ހޯއްދެވިއެވެ. އަދި އެ ނުރައްކަލުން ، އެކަލޭގެފާނު ސަލާމަތްކޮށްދެއްވުންއެދި ، ދުޢާދެންނެވުމުގައި ދެމިހުންނެވިއެވެ. ލަސްތަކެއްނުވެ ، މިޞްރަށް ދަތރުރކުރަމުންދިޔަ ގާފިލާއެއް ، ފެންބަރުކުރުމަށްޓަކައި ވަޅުކައިރީގައި ފޭލިގެ ޖެހިއެވެ. އަދި ފެން ނެގުމަށްޓަކައި ، ވަޅަށް ބާލިދީއެއްލިއެވެ. ފެންނެގިމީހުންނަށް ބާލިދީގެ ބަރުކަން އިޙްސާސް ކުރެވުނެވެ. ބާލިދީ ވަޅުން ނެގިއިރު އެބަމީހުންނަށް ފެނުނީ ، ޅަބާޅަ ޒުވާން ރީތި ފިރިހެންކުއްޖަކު ބާލިދީއާއެކު ވަޅުތެރެއިން އެރިތަނެވެ. އެކުއްޖާހުރީ ބާލިދީ އައްސާފައިހުރި ވަލުގައި ހިފަހައްޓާލައިގެންނެވެ. މިމަންޒަރު ފެނިފައި ގާފިލާގެ މީސްތަކުން ޢަޖައިބުވިއެވެ.
ގާފިލާގެ މީސްތަކުން ، ޔޫސުފު ވަޅުންނަގައި ، ފޭލިގެޔަށް ގެންގޮސް ފަރީއްކޮޅު އެރުވިއެވެ. އަދި އެބައިމީހުންނާއެކު އެކަލޭގެފާނު މިޞްރަށް ގެންދެވުނެވެ. ޔޫސުގެފާނު މިޞްރަށް ގެންދެވި ނީލަމުގައި އަޅުންގެ ބާޒާރުގައި ވިއްކައި ލެވުނެވެ. ޒުވާން ރީތި ކުއްޖަކަށްވާތީ ، އެކަލޭގެފާނު ވިއްކައިލެވުނީ ހެޔޮކޮށް ބޮޑު އަގެއްގައެވެ. އެކަލޭގެފާނު ބައްލަވައިގަތީ ، އަލްޢަޒީޒް އެވެ ކިއުނު ސާދާގަރެކެވެ. ޔޫސުފްގެފާނުގެ ސާހިބުމީހާއަށް ދަރިޔަކު ނުލިބެއެވެ. އެހެންކަމުން ، ޔޫސުފު ރަނގަޅަށް ބަލައި ބޮޑުކުރުމަށް އަލް ޢަޒީޒުގެ އަނބިމީހާގާތު ، ބުންޏެވެ. އެދެމަފިރިން ނިންމައިގެންތިބީ ، އެމީހުންގެ އަޅެއްގެ ގޮތުގައި ، އެހެންޏާ ދަރިއެއްގެ ގޮތުގައި ، ޔޫސުފު ބަލައިގަތުމަށެވެ.
އަލްޢަޒީޒުގެ ގަނޑުވަރުގައި ޔޫސުފްގެފާނު ބޮޑުފުޅުވަމުން ވަޑައިގަތީ ، ރީތި ތޫނުފިލި ޒުވާނެއްގެ ގޮތުގައެވެ. މާތް ﷲ ގެ ޙަޟުރަތުން އެކަލޭގެފާނަށް ، ޚާއްޞަ ޢިލްމެއް ލިބިވަޑައިގެން ވެއެވެ. މަޢުލޫމާތުގެ ގޮތުންވެސް އެކަލޭގެފާނުންގެ ސިކުނޑިފުޅު ވަރަށް ތަނަވަހެވެ. އެހެންމީހުންނަށް ވިސްނައިގަންނަން ނޭނގޭ އެތައް ކަމެއް އެކަލޭގެފާނަށް އެނގިވަޑައިގަންނަވައެވެ.
ޔޫސުފުގެފާނު ވެގެންދިޔައީ ވަރަށް ތެދުވެރި ، އިޚުލާޞްތެރި އަމާނާތްތެރި ބޭފުޅަކަށެވެ. އެކަން އަލް ޢަޒީޒުގެ ދެމަފިރިންވެސް ފާހަގަ ކުރެއެވެ. އެދެކަނބަލުންގެ ހިތްޕުޅުގައި ޔޫސުފްގެފާނުގެ މައްޗަށް ޚާއްޞަ ލޯތްބެއް އުފެދި ، ގަނޑުވަރުގެ ހުރިހާކަމެއް ޔޫސުފްގެފާނުގެ އަތްޕުޅުމައްޗަށް ދޫކޮށްލިއެވެ.
ހަމަ އެދުވަސްވަރު ، ޔޫސުފުގެފާނަށް އެހެން އިމްތިޙާނަކާ ކުރިމަތިލައްވަން ޖެހިވަޑައިގަތެވެ. އެއީ ، އަލްޢަޒީޒްގެ އަންހެނުން ، ޒުލައިޚާ އެވެ. ޒުލައިޚާއަކީ ، ފުރަތަމަ ދުވަހުއްސުރެ ، ޔޫސުފުގެފާނާ އަޅައިގަނެ ، އެކަނބުލޭގެމައްޗަށް ، އެކަލޭގެފާނު ލެންބުމަށް ހިތުއަޅައިގެންހުރި އަންހެނެކެވެ. ޒުލައިޚާގެ ނުބައި މަޤްޞަދު ، ޔޫސުފްގެފާނަކަށް އެނގިވަޑައެއް ނުގަންނަވައެވެ. އެކަނބުލޭގެ ދަނޑިވަޅު ބަލާފައި ޔޫސުފްގެފާނާ ކުރިމަތިލިއެވެ. އެކަނބުލޭގެ ހިތުގެ މުހުތާދު ފުއްދުމަށް ޔޫސުފްގެފާނަށް މަޖުބޫރު ކުރުވިއެވެ.
އެއީ ، އެއްދުވަހެއްގެ ހެނދުނުން މެންދުރާ ދެމެދުގެ ވަގުތެކެވެ. އަލް ޢަޒީޒް ގެޔަކު ނޫޅެއެވެ. ޒުލައިޚާ ، އައިސް ، ގޭގެ ހުރިހާ ދޮރުތަކެއް ބަންދު ކުރިއެވެ. އަދި ، ޔޫސުފްގާތު ، އޭނާގެ ހިތްހަމަޖައްސައިދިނުމަށް އެދުނެވެ. ﷲ ގެ ކޯފާއަށް ބިރުވެތިވެވަޑައިގަތުމާއެކު ޔޫސުފްގެފާނު އެކަމަނާއަށް ވިދާޅުވިއެވެ.
" ތިމަންކަލޭގެފާނު ، ﷲ ގެ ޙަޟުރަތުން ރައްކާތެރިކަމަށް އެދެމެވެ. ﷲ އީ ތިމަންކަލޭގެފާނުގެ ވެރި އިލާހެވެ. އެއީ ، ތިމަންކަލޭގެފާނަށް ބޯހިޔާވަހިކަން މިންވަރުކުރެއްވި އިލާހެވެ. ހަމަކަށަވަރުން ، ފާސިދު ނުބައި ޢަމަލުކުރާ މީހުންނަކަށް ކާމިޔާބެއް ނުލިބޭނެއެވެ. " ޔޫސުފުގެފާނު އެކަނބުލޭގެޔަށް ފުރަގަސް ދެއްވިއެވެ. އަދި ލައްޕާފައިވާ ދޮރުތަކާ ދިމާއަށް ، އެތަނުން ނުކުމެވަޑައިގަތުމަށް ، ދުވެވަޑައިގަތެވެ. ޒުލައިޚާ ، ވަޙުޝީ ފުއްލާއެއްހެން ޔޫސުފުގެފާނު ފަހަތުން ދުއްވައިގަތެވެ. އަދި އެކަނބުލޭގެ ފަހަތުން އެއްލި އަތުން ، އެކަލޭގެފަނުގެ ހެދުންކޮޅުގައި ހިފުނެވެ. އަދި ހެދުންކޮޅު އިރައިގެން ދިޔައެވެ.
އެވަގުތަކީ ، އަލް ޢަޒީޒް ބޭރުގައި އުޅެފައި ގަނޑުވަރަށް އައި ވަގުތެވެ. ދޮރު ހުޅުވާލައިފާ އަލް ޢަޒީޒް ވަތްވަގުތު އޭނާއަށް ފެނުނީ ، އޭނާގެ އަންހެނުން ދުވެފައި އޭނާއާ ދިމާއަށް އަންނަ ތަނެވެ. ދުރުގައި ވީދިފައިވާ ލިބާސްކޮޅުގައި ހިފަހައްޓާލައްވައިގެން ޔޫސުފުގެފާނު ހުންނެވިއެވެ. އެކަލޭގެފާނު ހުންނެވީ ވަރަށް ކަންބޮޑުވެ ވަޑައިގެންފައެވެ. އަލް ޢަޒީޒުގެ އަންހެނުން ޝަކުވާ ކޮށްގަތެވެ.
" ތިބާގެ އަންހެނުންގެ ޢިއްފަތްތެރިކަމަށް އަރައިގަތް މީހެއްގެ އަދަބަކީ ޖަލަށް ލުން ހެއްޔެވެ ؟ ނުވަތަ އެއަށްވުރެވެސް ބޮޑު އަދަބެއް ހެއްޔެވެ ؟ ޔޫސުފުގެފާނުގެ އިސްތަށިފުޅުގައި ، ޒުލައިޚާ އެޅުވި ދޮގު ތުހުމަތަށް އެކަލޭގެފާނު އިންކާރު ކުރައްވަމުން ގެންދެވިއެވެ. އަދި ، އެފަދަ ބަދުއަޚުލާޤީ ޢަމަލެއް ހިންގަން އުޅުނީ އެކަލޭގެފާނު ނޫންކަމާއި ، އެކަމަށް އެކަލޭގެފާނަށް ދަޢުވަތުދީ ، ގަދަކަމުން އެކަން ކުރަން މަސައްކަތްކުރީ ، ޒުލައިޚާކަމުގައި ވިދާޅުވަމުން ގެންދެވިއެވެ.
(ނިމުނީ)
