ﷲ ސުބްޙާނަހޫ ވަތަޢާލާ ، ހަތްއުޑުމަތިން ބާވައިލެއްވި ، ކީރިތި ޤުރުއާނަކީ ، އެކަލާނގެ ކަލާމްފުޅެވެ. ﷲ ގެ ވަޙީ ބަސްފުޅެވެ. އިޖްތިމާޢީ ޢަދާލަތުގެ ބިންގަލެވެ. ޝަރުޢީ ޙުކުމްތަކުގެ އަސާސެވެ. އިސްލާމީ ޤާނޫނުތަކުގެ އަސްލެވެ.
ކީރިތި ޤުރުއާނުގެ މޫރިތި އާޔަތްތަކުން ، މުސްލިމުންގެ ހިތްތަކަށް ދިރުން ލިބެއެވެ. ރޫޙަށް ތާޒާކަން ލިއްބައެވެ. އަޑުއަހާ ފޫހިނުވެއެވެ. އެއީ ދިރިހުރި މުޢުޖިޒާތެކެވެ. ރާއްޖޭގައި މިވަގުތު ކުރިޔަށްދާ ، ރަންތާޖު ޤުރުއާން މުބާރާތަކީ ، ތަޖުވީދުމަގުން ، ކީރިތި ޤުރުއާން ކިޔެވުމާއި ، ޤުރުއާނުގެ ޢިލްމުން ، އަގުހުރި ފިލާވަޅުތަކެއް ލިބިދޭ މުބާރާތެކެވެ. ވަރަށް ރީތިކޮށް ކިޔަވާކުދިން މުބާރާތުން ފެނެއެވެ. އަޑުއަހާލުމުން ، ހިތަށް ފިނިކަމާއި އަރާމު ލިބެއެވެ. ނިމެނީ ، އަޑުއަހާހިތުން އިންދައެވެ. ތަޖުވީދުގެ ހަމަތައް އެއީ ، ތަޖުވީދު ޢިލްމުގެ ޤާރީންނަށް ޚާއްޞަވެގެންވާ ފަންނެކެވެ. އެހާ ރީތިކޮށް ، އެހާމެ ފުރިހަމަކޮށް ކިޔަވާ ކުދިން ، ކިޔަވާ ނިމުމުން ، ކިޔެވުމުގައިހުރި ، މަޚުރަޖަ އަދި ތަޖްވީދުގެ ކުށްތައް ، މުބާރާތަށް އިންސާފުކުރައްވާ ފަނޑިޔާރުން ފާހަގަ ކުރައްވައި ، ސާފުކޮށް ދެއްވައެވެ. ތަޖުވީދު ޢިލްމަށް ބީރަށްޓެހި މީހަކަށް ، ކީރިތި ޤުރުއާން ކިޔަވަން ވާނީ ވަކިގޮތަކަށް ، ވަކި ހަމަތަކަކުންކަން އެނގެނީ އެހިސާބުންނެވެ. ކީރިތި ޤުރުއާން ކިޔަވާ އަޑު އިވުމުން ހިތަށް ފިނިކަން ލިބޭނީ ، އަޑާއި މަޚުރަޖަ އަދި ބަލާޣާތްތެރިކަމާއި ތަޖުވީދުގެ ހަމަތައް ހިމެނިގެންކަން އެހިސާބުން ކަށަވަރު ވެއެވެ. އެއިން ބައެއް އުނިވެއްޖެނަމަ ، ހިތަށް އުނދަގޫ ވެއެވެ. އެ މޫރިތި އާޔަތްތަކުގެ މަތިވެރިކަމާއި ޢިއްޒަތާއި ޝަރަފުން އަދި އިޙްތިރާމާއި ޤަދަރުން ބައެއް އުނިވެގެންދާކަމުގެ ހިތްދަތި އިޙްސާސުން ހިތަށް ތަދުވެއެވެ. އެފަދައިން ކިޔަވާމީހާގެ މައްޗަށް އޮންނަންޖެހޭ އިޙްތިރާމާއި ޤަދަރު އުނިވެ ދެއެވެ.
މިއީ ބަރަކާތްތެރި ރަމަޟާން މަހެވެ. ރަމަޟާންމަހަކީ ، ކީރިތި ޤުރުއާން ބާވައިލައްވަން ފެށްޓެވި މާތް މައްސަރެވެ. މިމައްސަރު ، އިސްލާމީ އުއްމަތުގައި ، ކީރިތި ޤުރުއާނަށް ޚާއްޞަ މަތިވެރިކަމެއް ދެވި ، ގިނަގިނައިން ކީރިތި ޤުރުއާން ކިޔެވުމުގައި ، މުސްލިމުން ، އެބައިމީހުންގެ ވަގުތު ހޭދަ ކުރެއެވެ. އޭގެ ތެރެއިން ، ޖަމާޢަތުގައި ކީރިތި ޤުރުއާން ކިޔެވުމަށް ޚާއްޞަކުރެވޭ އެއްކަމަކީ ، ތަރާވީޙު ނަމާދުގައި ކޮންމެ ރެޔަކުވެސް ފޮތެއްކިޔަވައި ރަމަޟާންމަސް ނިމޭއިރު ، ޚަތިމް ކުރުމެވެ. މިއީ ، ރާއްޖޭގައި ވަރަށްކުރީއްސުރެ ހިނގަމުންދާ އާދައެކެވެ. މިފަހަކަށްއައިސް ، ތަރާވީސް ކުރުމަށް ގިނައިން ގެނެވެނީ ، މިޞްރުގެ ޙާފިޛުންނެވެ. މިއަހަރުވެސް ، މިޞްރުގެ ޙާފިޛުން ގެނެވި ، މާލޭގެ މިސްކިތްތަކުގައި ތަރާވީސް ކުރަމުން އެބަގެންދެއެވެ.
ރަންތާޖު ޤުރުއާން މުބާރާތާއި ، މިޞްރުގެ ޙާފިޛުންގެ ޤުރުއާން ކިޔެވުމަށްބަލާއިރު ، އެއްޗެކޭ ނުބުނެ ހުރެވޭވަރަށްވުރެ ގިނަ ޙާފިޛުންގެ ޙާލު ދެރައެވެ. ބޮޑު ޚަރަދެއްކޮށްގެން ، ރާއްޖެގެނެސް ، ހުންނާނެތަނާއި ކެއުން އަދި އެލަވަންސް ހަމަޖައްސައިގެން ، ތަރާވީޙު ނަމާދު ކުރުވާވަރަށްވުރެ ، މިފެންނަ ގިނަ ޙާފިޛުންގެ ފެންވަރު ދަށެވެ. އިޡުހާރެއް ، އިޚުފާއެއް ، އިދްޣާމެއް އިޤްލާބެއް ވަތްކެއް ނުވެއެވެ. އަލިފާއި ޢައިނު ތަފާތެއްނޫނެވެ. ހާއާއި ޙާ ، އަދި ޚާއެއް އޮޅުމެއް ނުފިލައެވެ. ތަސްދީދެއް ، ތަންވީނެއް ވަތްކެއް ނުވެއެވެ. މިސްކިތްތަކުގައި އިމާމުވެ ނަމާދުކުރަން ތިބޭ ދިވެހި އިމާމުންނަށްވުރެ ، ޙާލު ދެރައެވެ. އެމީހުން ގެނެވިފައި އެތިބީ ، ފެންވަރު ނުބަލައެވެ. އެއީ ވެގެންވާނެ ގޮތެއްނޫނެވެ. އެއިންމީހަކު ކިޔަވާއަޑު އަހާލައިގެން ހިތަށް ފިނިކަން ލިބޭފަދަ ރާގެއް ނުއިވެއެވެ. ވެގެންވާނެގޮތެއް ނޫންކަމަށްވިޔަސް ، އަޑުއަހާލަން ހުރުމުގެ ރޫޙެއް ނުއުފެދެއެވެ. އެއަށްވުރެ ބޮޑަށް ހިތަށް ތަދުވެއެވެ.
ރާއްޖޭގައި ގިނަ ޢަދަދަކަށް ޙާފިޛުން ތިބުމަކީ އެކަށީގެންވާ ކަމެކެވެ. ބޭރުން ގެންނަ ޙާފިޛުންނަށް ކުރަންޖެހޭ ހޭދައަށްވުރެ ކުޑަ ޚަރަދެއްކޮށްގެން ، ނުވަތަ ބޭރު ޙާފިޛުންނަށް ކުރާ ހޭދަކޮށްގެންވިޔަސް ، މާރީތިކޮށް ޤުރުއާން ކިޔަވާ ، ދިވެހި ޙާފިޛުން ތަރާވީސް ކުރަން ލިބޭނެއެވެ. އޭރަށްވެސް ، ބޭރު ޙާފިޛުން ރޯނުބައިކޮށް ކިޔެވީމަ ، މިހާރު މިވާ ވަރަށް ހިތަކަށް ތަދެއް ނުވާނެއެވެ. ތަރާވީސްކުރަން ، ކީރިތި ޤުރުއާން ރީތިކޮށް ކިޔަވާ ، އަޑުރީތި ، ދިވެހިން ނުލިބެންވީ ސަބަބެއް ނެތެވެ. ދީނީ ޢިލްމުވެރިން ވިދާޅުވާގޮތުގައި ، ތަރާވީޙު ނަމާދަކީ ސުންނަތް ނަމާދެއްކަމަށް ވާތީ ، ޚަތިމު ބަލައިގެން ކިޔެވުމަކުން މައްސަލައެއް ނެތެވެ. އެހެންކަމުން ، ދިވެހި ޙާފިޛުން ނުވަތަ ރީތިކޮށް ޤުރުއާން ކިޔަވާ ދިވެހިންލައްވާ ، ރަމަޟާން މަހު ތަރާވީޙުގައި ޚަތިމު ކުރުމަކީ ނުކުރެވޭނެ ކަމެއްނޫނެވެ. ކޮންމެހެން ، ބޮޑު ޚަރަދުކޮށްފަ ، މިޞްރުން ނުވަތަ އެހެން ޤައުމަކުންވެސް ، ނަމަކަށް މީހަކުގެނެސް ، ރާއްޖޭގެ މިސްކިތްތަކުގައި ތަރާވީސް ނަމާދު ކުރުވަންޖެހޭ ސަބަބެއް ނެތެވެ.
