އެމްއެންޕީ އަކީ ރައްޔިތުންނަށް އޮތް އާ އުންމީދެއް، އާ ފުރިހަމަ ވިސްނުމެއް ކަމަށް އެޕާޓީގެ ރައީސް ކާނަލް ރިޓެއަރޑް މުހައްމަދު ނާޒިމް ވިދާޅުވެއްޖެއެވެ.
އޭނާ މިހެން ވިދާޅުވީ އެ ޕާޓީގެ ރިޔާސީ ޕްރައިމަރީގައި ވާދަ ކުރެއްވުމަށް ފޯމު ހުށަހެޅުއްވުމަށްފަހު ކުރެއްވި ޓްވީޓެއްގަ އެވެ.
އެމްއެންޕީ ގެ ރިޔާސީ އިންތިޚާބުގެ ޕްރައިމަރީއަށް ކުރިމަތިލުމުގެ ފުރުސަތު ހުޅުވާލާފައިވަނީ މި ޑިސެމްބަރ މަހުގެ 3 ވަނަ ދުވަހު އެވެ.
އެމްއެންޕީގެ ރިޔާސީ ޕްރައިމަރީގައި ބައިވެރިވުމަށް މިއަދު އަޅުގަނޑު ފޯމު ލައިފިން. އެމްއެންޕީ އަކީ ރައްޔިތުންނަށް އޮތް އާ އުންމީދެއް، އާ ފުރިހަމަ ވިސްނުމެއް! pic.twitter.com/5Qune9Ca8Z
— Mohamed Nazim MP (@nazim7878) December 13, 2022
އެ ޕާޓީން ބުނީ ޕްރައިމަރީއަށް ކުރިމަތިލާ މީހުން މޯލްޑިވްސް ނެޝަނަލް ޕާޓީގެ ރިޔާސީ އިންތިޚާބުގެ ޕްރައިމަރީއަށް ކުރިމަތިލުމަށް އެދޭ ފޯމާއި، ފޯމުގައި ބަޔާންކޮށްފައިވާ ލިޔެކިޔުންތައް މި މަހުގެ 14 ވަނަ ދުވަހުގެ މެންދުރު 2:00 ގެ ކުރިން އެ ޕާޓީގެ އޮފީސް، މއ. ކެލާވީ ފަސްޓް ފްލޯއަށް ވަޑައިގެން ފޯމް ހުށަހަޅަން ޖެހޭނެ ކަމަށެވެ.
މީގެ އިތުރުން އީމެއިލް މެދުވެރިކޮށް ވެސް ހުށަހެޅޭނެ ކަމަށް ބުންޏެވެ.
އެމްއެންޕީގެ ރިޔާސީ ޕްރައިމަރީއަށް ކުރިމަތިލާ ފަރާތްތަކުގެ ކިބައިގައި ހުންނަން ޖެހޭ ޝަރުތުތަކުގެ ތެރޭގައި އެމްއެންޕީގެ މެންބަރެއް ކަމުގައި ވުމާއި އިސްލާމްދީނުގައި ޙައްދެއް ކަނޑައެޅިފައިވާ ކުށެއް ކުރިކަމަށް ޝަރީޢަތަށް ސާބިތުވެފައިވާ މީހެއް ކަމުގައިނުވުން ހިމެނެ އެވެ. އަދި އުމުރުން 18 އަހަރު ފުރިފައިވާ މީހެއް ކަމުގައިވުމާއި އިންސާނީ ހައްގަކަށް އަރައިގަނެފައިވާ ކަމަށް ޝަރީއަތަށް ސާބިތުވެފައިވާ މީހެއް ކަމުގައިނުވުން ވސް ހިމެނެ އެވެ.
މީގެ އިތުރުން ކުޑަކުއްޖަކާ މެދު ބަދުއަހްލާގީ އަމަލެއް ހިނގި ކަމަށް ޝަރީއަތަށް ސާބިތުވެފައިވާ މީހެއް ކަމުގައިނުވުމާއި ޕާޓީގެ ސުލޫކީ ގަވާއިދާ ހިލާފްވުމުގެ ސަބަބުން ސުލޫކީ ކޮމިޓީން ނުވަތަ އިސްތިއުނާފް ކޮމިޓީން އެއްވެސް ފިޔަވަޅެއް އަޅާފައިވާ ނަމަ، އެފިޔަވަޅެއް ތަންފީޒުކޮށް ނިމުނުތާ އެއް އަހަރު ވެފައިވުން ވެސް ވަނީ ޝަރުތުތަކުގެ ތެރޭގައި ހިމަނާފަ އެވެ.
މި ކަމާ ގުޅޭ އިތުރު މައުލޫމާތު ސާފުކުރަން ބޭނުންވާ ނަމަ އެމްއެންޕީގެ ނަންބަރު 9708080 އާއި ގުޅައިގެން ކުރިއަށް ގެންދިއުމަށް އެ ޕާޓީން ބުންޏެވެ.
