ރައްޔިތުންގެ މަޖިލީހުގެ ރައީސެއް އަވަހާރަކޮށްލުމަށް ދެވުނު ޙަމަލާއެއް ، މީސްމީޑިއާއިން އާދައިގެ ގޮތަކަށް ނެގުމަކީ ، ތަނުގައި ކޮންމެވެސް ކަމެއް ގޯސްކޮށް ހިނގަމުންދާކަމުގެ ހެއްކެކެވެ. އެމެރިކާއަކީ ، ދުނިޔޭގެ ދެވަނަޔަށް އެންމެ ބޮޑު ޑިމޮކްރަސީއެވެ. 2016 ވަނަ އަހަރާހަމަޔަށް ، އެމެރިކާއަކީ ފުރިހަމަ ޑިމޮކްރަސީއެކެވެ. އެހެންނަމަވެސް ، އޭގެފަހުން އެއީ އެންމެ ފުރިހަމަ ޑިމޮކްރަސީއެއްކަމަކަށް ނުބެލެވެއެވެ. ޞައްޙަކަމަށް ޝައްކުވާ އިންތިޚާބުތައް ބޭއްވި ، އިޖްތިމާޢީ ޢަދާލަތަށް އިނގިލި ދިއްކުރެވޭ މުޖުތަމަޢުތަކަކީ ، ފުރިހަމަ ޑިމޮކްރަސީއެއް އޮންނަ ތަންތަނެއް ނޫނެވެ. އެމެރިކާގެ ރައީސްކަމަށް ، ޑޮނަލްޑް ޓްރަމްޕް ވަޑައިގަތުމާއެކު ، އެމެރިކާގެ ޑިމޮކްރަސީ އައީ ގަޑުބަޑު ވަމުންނެވެ. އިދިކޮޅު ޕާޓީއާއި އިދިކޮޅު ވިސްނުމުގެ މީހުންގެ ފަރާތުން ޑިމޮކްރަސީއަށް އިނގިލި ދިއްކުރެވޭ ކަންކަން ހިނގުމާއި ، ސަރުކާރު ހިންގުމުގެ ނިޒާމުގައި ރައްޔިތުންނަށް ކަނޑައެޅިގެން ގެއްލުންވާ ކަންކަން ހިނގައިދާ ތަންތަން އެއީ ، ފުރިހަމަ ޑިމޮކްރަސީއެއްގެ ގޮތުގައި ދަރަޖަ ކުރެވެމުންދާނެ ތަންތަނެއް ނޫނެވެ. އެމެރިކާގައި 325 މިލިއަން މީހުން ދިރިއުޅެއެވެ. އެއީ ، ދުނިޔޭގައި 3 ވަނަޔަށް އެންމެ އާބާދީ ބޮޑު ޤައުމެވެ. ދުނިޔޭގެ އެންމެ ބާރުގަދަ ޤައުމުގެގޮތުގައި ބެލެވޭ ތަނެވެ. އެހެންނަމަވެސް ، އެމެރިކާގެ ޑިމޮކްރަސީގެ ނިޒާމު އަންނަނީ ގަޑުބަޑުވަމުން ، އެނިޒާމުން ބޭރުވަމުންނެވެ. އިންސާނީ ޙައްޤުތަކާއި ދުނިޔޭގެ މަޞްލަޙަތަށް އަމާޒުކޮށް ، އަމިއްލަ މަޞްލަޙަތު އިސްކޮށްގެން އަޅާ ފިޔަވަޅުތަކުގެ ނަތީޖާއިން ، އެމެރިކާދަނީ އަމިއްލަޔަށް ފަޟީޙަތް ވަމުންނެވެ. ދުނިޔޭގައި އެކިކަންކަމަށް މިނާ މިންގަނޑުތަކުން ބޭރުވަމުންނެވެ. އޭގެ ތެރޭގައި ޑިމޮކްރަސީވެސް ހިމެނެއެވެ.
މީސްމީޑިއާއަކީ އޭގެ ވާޖިބު އަދާކުރުމަށް ހަނދާންނެތޭ ނިޒާމަކަށް ވެއްޖެނަމަ ، ޑިމޮކްރަސީގެ ވާހަކަ ރަނގަޅުވާނީ ނުދެއްކިއްޔާއެވެ. ރައްޔިތުންގެ މަޖިލީގު ރައީސް އަވަހާރަކޮށްލުމަށް ޙަމަލާއެއް ދެވުނެވެ. އޭގެ ކުރީރޭ ، އެކަމަނާގެ ފިރިކަލުންނަށް މަރުތޭލަޔަކުން ޙަމަލާދީ އަނިޔާވެ ، ސިކުނޑީގެ ބޮޑު އޮޕަރޭޝަނެއް ކުރަން ޖެހުނެވެ. އެމެރިކާގެ ޑިމޮކްރަޓިކް ނިޒާމުގެ އެއްބާރު ކަމުގައިވާ މީސްމީޑިއާއިން ، އެޚަބަރު އެންމެ ފުރިހަމަޔަށް ގެނެހެއް ނުދެއެވެ. ވޮޝިންގޓަން ޕޯސްޓާއި ނިއުޔޯރކް ޓައިމްސް ހުޅުވައިލާއިރު ، އެޚަބަރުތައް އަޅައެއް ނުގަނެއެވެ. އަދި އެފަދަ ނުރައްކައުތެރި ޙާދިސާއެއް ހިނގިކަންވެސް ފާހަގައެއް ނުކުރެވެއެވެ. ފަލަ ޝުރުޚީތަކުން އެޚަބަރެއް ނުފެނެއެވެ. އެއީ މުހިންމު ޙާދިސާއަކަށް ނުވެއެވެ. ސަބަބުތަކުގައި ހިފައިގެން ވިސްނައިލާއިރު ، އެހުންނަނީ ފެއިލްވަމުންދާ ޑިމޮކްރަސީތަކުން ފެންނަ މިސާލުތަކެވެ. އަދި އަމްދުން އިންތިޚާބެއް ބޯމަތިވެފައި އޮންނައިރު ، އެއީ ޤައުމީ ވިސްނުމަކުން ، ވަޠަނީ މީހުންގެ ވިސްނުމާއި ފިކުރާ ޚިޔާލާތަށް އަސަރުކުރާފަދަ މުހިންމު ޙާދިސާއެކެވެ. އެމެރިކާގެ މީސްމީޑިއާއަށް އެއީ އެއްވެސް ކަމަކަށް ނުވިއެވެ.
" މަޖިލީހުގެ ރައީސް އަވަހާރަކޮށްލުމަށް ޙަމަލާ ދީފި " މި ޝުރުޚީ ، އެމެރިކާގެ މީސްމީޑިއާގެ ވަޞީލަތްތަކުގައި ވަގުތުން ނުގެނެވެނީ ކީއްވެބާވައެވެ ؟ އެއީ އެއްވެސް ކަމަކަށް ނުވީ ކީއްވެބާވައެވެ ؟ އެވާހަކަ ކޮންމެވެސް ވަރަކަށް ގެނެސްދެވިފައި އޮތިއްޔާ އެއީ ފަލަ ޝުރުޚީއަކަށް ނުވީ ކީއްވެ ބާވައެވެ ؟ އެކަމަކު " ޕެލޯސީގެ އަންހެނުންނަށް ޙަމަލާ ދެވިއްޖެ " ފަދަ ޚަބަރުތައް އެ ލިޔެވެނީ ކީއްވެ ބާވައެވެ ؟ ނެންސީ ޕެލޯސީ އަށް ޚާއްޞަކަމެއް ނުދެވުނީ ކީއްވެބާވައެވެ ؟
އެއީ ތެދެއް ނޫނެވެ. ތެދަކީ ، ޕެލޯސީގެ ފިރިމީހާއަށް " ޙަމަލާ " ދެވުމެއް ނޫނެވެ. މިއީކީ ، މަގުމަތީގައި ދެމީހެއްގެ ނުވަތަ ދެ ގްރޫޕެއްގެ ދެމެދުގައި ހިނގި މާރާމާރީއެއް ނޫނެވެ. ނުވަތަ މީހެއްގެ ފައިވާނުން އެހެންމީހެއްގެ މޫނުމަތީ އެތިފަހަރެއް އަޅުވައިލީއެއް ނޫނެވެ. އެއީ ސިޔާސީ ގޮތުން ދެވުނު ޙަމަލާ އެކެވެ. ފޮރުވިފައިވާ ، ސިޔާސީ މަޤްޞަދެއް ޙާޞިލްކުރުމަށް ރޭވިގެން ދެވުނު ޙަމަލާ އެކެވެ. ރިޕަބްލިކަން ޕާޓީން ރާވައިގެން ހަދާފައިވާ ބޮޑު ދޮގެކެވެ. އެއީ ، މީހަކު މަރައިލުމަށް ދެވުނު ޢުދުވާނީ ޙަމަލާ އެކެވެ. އާދައިގެ ޙަމަލާއެއް ނޫނެވެ. އެ ޚަބަރު ، މީސްމީޑިއާގައި ގެނެސްދެވިފައިވަނީ ކަނޑައެޅިގެން މަންޒަރު ބަދަލުކުރާ މަޤްޞަދުގައެވެ. އެކަމުން އެނގޭ އެއްޗަކީ ، އެމެރިކާގެ ޑިމޮކްރަސީ ނުބައި ފައްތަރެއްގައި އޮތްއިރު ، ޚުދުމުޚުތާރުކަމާއި އަނިޔާވެރިކަމުގެ ޢަމަލުތަކަށް އެއްބަޔަކު އަނެއްބަޔަކަށް ތަރުޙީބު ދެވޭ މިންވަރެވެ.
" މަޖިލީހުގެ ރައީސް އަވަހާރަކޮށްލުމަށް ޢުދުވާނީ ޙަމަލާއެއް ދީފި " ކަމަށް މީސްމީޑިއާއިން ، ފަލަޝުރުޚީ ނުނަގާނަމަ ، އެމެރިކާގެ ޑިމޮކްރަސީގެ ޙާލަތުގެ ނާޒުކުކަން ، އެކަމާމެދު ވިސްނައި ފިކުރުކުރާ ކޮންމެ މީހަކަށްވެސް ދޭހަވާނެއެވެ. ކަންމިހެން އޮތްއިރު ، ޑިމޮކްރަސީ ސަލާމަތް ކުރެވޭނެ ގޮތެއް އެއީ ނެތް ގޮތެކެވެ. މިކަހަލަ ، ޙައްދު ފަހަނަޅާފައިވާ ، ސިޔާސީ ، ވަކިމީހަކަށް އަމާޒުކުރެވޭ ، ނުރައްކާތެރި ޙަމަލާތައް މަދު ނުކުރެވިއްޖެނަމަ ، ޑިމޮކްރަސީ ސަލާމަތެއް ނުކުރެވޭނެއެވެ. މުޖުތަމަޢުގެ ހަމަޖެހުން ޤާއިމެއް ނުކުރެވޭނެއެވެ. އިންސާނީ ޙައްޤުތައް ކަށަވަރުކޮށެއް ނުދެވޭނެއެވެ. އިޖްތިމާޢީ ޢަދާލަތު ދެމެހެއްޓިގެންނެއް ނުދާނެއެވެ. ރައްޔިތުން އެދޭފަދަ ހެޔޮވެރިކަމެއް ނުކުރެވޭނެއެވެ. ސިޔާސީ ހަމަޖެހުން އެތަނަކުން ނުފެންނާނެއެވެ. މީސްމީޑިއާއަކީ ޑިމޮކްރަސީއަށް ކުރާ ދަތުރުގެ އެއްބައިވެރިޔާއެވެ. މިޞްރާބު ބަދަލުކުރުމަށް ، ރައްޔިތުންގެ ހިތްތަކާ ކުޅެލާ އެންމެ ބާރުގަދަ ހަތިޔާރެވެ.
މިއީ ހަމައެކަނި މީޑިއާގެ ދައުރާމެދު ކަންބޮޑުވުން ފާޅުކުރުމަށްވުރެ ، އެހެންކަންކަންވެސް ޙިއްޞާކޮށްގެން ވިސްނަންވީ ނުކުތާއެކެވެ. ޙަޤީޤަތާއި ސަބަބާއި ނަތީޖާއިންވެސް ސަބަބު ފެންނާނެއެވެ. އެއީ ، ފަރުދީ ޒިންމާގެ ދަށުން ، ޢާންމު މަޞްލަހަތަށް ވިސްނައިގެން އުޅޭ މުޖުތަމައެއްގެ ޢާންމު ރަޢުޔުވެސް ހިމެނޭ ކަމެކެވެ. އެކަންކަން އެމެރިކާގައި އޮތީ އެކޮޅުކޮޅުން ޖެހިފައެވެ. ޤައުމުގެ ބައިތުލްމާލުން ، ރައްޔިތުންގެ ފައިސާއިން ވަށްކަންކޮށްގެން ޤާނޫނީ ހުސްލޯވަޅަކުން ލޫދި ، ސަލާމަތްވެގެން ނުކުމެ އަޑުއުފުލާމީހުންގެ ބަސް ރައްޔިތުންގެ މައްޗަށް ވިކެން ވެއްޖެނަމަ ، ރައްޔިތުން އެތިބެނީ ބޮލުރޮދި ކެނޑިފައެވެ. ރަނގަޅީ ކޮންބަޔެއްކަމާއި ގޯހީ ކޮންބަޔެއްކަން ނޭނގޭވަރަށް ރައްޔިތުންގެ ބޯކައިލެވިއްޖެނަމަ ، ސިޔާސީ މީހުންނަށް އެއޮތީ ބަހާރު މޫސުމް އައިއްސައެވެ. އެކަމަކު ، އެތަނެއްގައި އެއޮތީ ކޮންކަހަލަ ޑިމޮކްރަސީއެއްކަން ، ފަންނީ އަދި ޢިލްމީ މާހިރުން ވަކި ކުރާނެއެވެ. އެމީހުންގެ ބަސް ރައްޔިތުންގެ މައްޗަށް ނުވިކުނަސް މެއެވެ. ފެއިލްވެފައިވާ ޑިމޮކްރަސީއެއްގައި ރައްޔިތުން ދިރިއުޅެން ލިބޭ މާޙައުލުގެ މިސާލަކީ އެއީއެވެ.
ވަކިކަމެއް އިހުމާލު ކުރެވި ތަކުރާރުވަމުން ހިނގައްޖެނަމަ ، އެހަމަހިމޭންކަން ބަދަލުވެގެންދާނީ ހޮނު ގުގުރިއަށެވެ. އަޑު ގަދަވާނެއެވެ. ގިނައިރު ވާނެއެވެ. އެމެރިކާގެ މީސްމީޑިއާގެ މިސާލަކީ އެއީއެވެ. ބައެއް ބަސްބަހާއި ޖުމްލަ އާއި ދާއިރާއާއި ތެދަކީ އެމެރިކާގެ މީސްމީޑިއާއިން ހަނދާން ނައްތައިލާ އެއްޗެކެވެ. އެކަމުގެ ސަބަބުން އުފެދިގެންދާ ހަމަނުޖެހުމާއި ދެކޮޅުވެރިކަން އިންތިހާއެވެ.
މިސާލެއް ނަގާނަމަ ، މިލިޔުމުގައި ޚާއްޞަކުރެވި ލިޔެވެމުން މިއަންނަ ޢުދްވާނީ ޙަމަލާއަކީ ، ތިންވަނަ ދުނިޔޭގެ ޤައުމުތަކުގެ މީސްމީޑިއާގެ ފަލަ ޝުރުޚީއަށް އަރާނެ ޚަބަރެކެވެ. ވައަތުފިޔައިގެ ޙައްދު ފަހަނަޅާފައިވާ މީހަކު ، ރައްޔިތުންގެ މަޖިލީހުގެ ރައީސްގެ ގެ ތަޅާލައިގެން ވަދެގަނެ ، ބަޔަކު މަރާލަން މަސައްކަތްކޮށް ، މަރުތޭލަޔަކުން ޙަމަލާދިނުން ، މިއީ ކުޑަ ކަމެއް ނޫނެވެ. އެއީ ، މީސްމީޑިއާގެ ފަލަ ޝުރުޚީން ޖާގަހޯދާނެ ޚަބަރެކެވެ. އެކަން މީސްމީޑިއާއިން ނުކޮށްފިނަމަ އެއީ ރައްޔިތުންނަށް އޮޅުވައިލުމަށް ކަނޑައެޅިގެން ކުރާ ނޭއްގާނީ ޢަމަލެކެވެ. ނޫސްވެރިކަމުގެ މިނިވަންކަމާއި މިންގަނޑުތަކާ ޚިލާފަށް ކުރާ ކަމެކެވެ. އިދިކޮޅު ނޫސްވެރިކަމެއްގައި ،ޙަޤީޤަތާޚިލާފު ވާހަކަ ފަތުރައި ، މީހުންގެ އަބުރު ކަތިލުމަކީ ، ނޫސްވެރިކަމުގެ މިންގަނޑުން ބޭރުން ޖަމާޢަތުގެ މަޞްލަޙަތު ނަގައިލުމަށް ކުރެވޭ ، ޑިމޮކްރަސީއާ ޚިލާފު ކަންކަމެވެ. މިއީ އެމެރިކާގެ ޑިމޮކްރަސީގައިވެސް ޢާންމު ކަމެކެވެ.
އެންމެ އާދައިގެ ތެދެއް ހެދުމުން ދުރުހެލިވެ ، ދޮގެއް ހަދައިފިނަމަ ވާނީ ކިހިނެއް ހެއްޔެވެ ؟ ތިންކަމެއް މެދުވެރި ވާނެއެވެ. ފުރަތަމަ ކަމަކީ ، ބޮޑުދޮގެއް ޢާންމުވެ ޖަމާޢަތުގެ މަޞްލަޙަތު ގެއްލުމެވެ. ދެކޮޅުވެރިކަމާއި ހަމަނުޖެހުމަށް ފުރުޞަތު ލިބިގެންދާނެއެވެ. ޢާންމު ފަރުދުންނާއި ދައުލަތުގެ މިލްކިއްޔާތަށް ގެއްލުންވެ އިޤްތިޞާދަށް އަސަރު ކުރާނެއެވެ. ޢާންމުންގެ ތެރެއިން ބަޔަކު ޖަލަށްލެވި ، ބަންދު ކުރެވި އަދަބު ދެވޭނެއެވެ. ޖަމާޢަތުގެ ޢާންމު އުޞޫލުތައް ނެތިގޮސް ، އިތުބާރު ގެއްލި ތަނުގައި ހިނގަމުންދާ ޤާނޫނާއި ޤަވާޢިދު ޤާއިމްކުރަން އުނދަގޫވާނެއެވެ. މިހުރިހާކަމެއް އެމެރިކާގައިވެސް ހިނގަމުން އެބަދެއެވެ. އެހެން ޤައުމުތަކުގައި ހިނގަމުންދާ މިފަދަ ކަންކަމަކީ ، އެޤައުމުތަކުގެ ޑިމޮކްރަސީ ޅަފަތުގައި އޮވެގެން ހިނގާ ކަމެކޭ ބުނެވޭނެ ފުރުޞަތެއް އޮވެދާނެއެވެ. އެހެންނަމަވެސް އެމެރިކާގައި ޑިމޮކްރަސީ ހިންގާތާ މިހާރު 246 އަހަރު ވެއްޖެއެވެ. 1776 ވަނަ އަހަރުންފެށިގެން ، އެމެރިކާގައި ޢަމަލުކުރެވެމުން އައި ޑިމޮކްރަޓިކް އުޞޫލުތައް ތަރައްޤީ ނުވެ ކުރިނުއަރައި ދިޔައީ ވެރިކަމަށް އިސްވަމުންދިޔަ ވެރިންގެ ސަބަބުންނެވެ. ރައްޔިތުންގެ އިހުމާލަކުން ނޫނެވެ.
އެމެރިކާގައި ، ޙަޤީޤަތާއި ތެދަކީ އޭގެ އަސްލު ފޮރުވިފައި އޮންނަންޖެހޭ އެއްޗެކެވެ. ހެއްކާއި ދަލީލު ހުއްޓަސް ޙުއްޖަތަކަށް ފުރުޞަތުނުދީ ބަހުސް ކޮށްގެން ނަތީޖާ ނެރެން ޖެހޭ އެއްޗެކެވެ. ކިތަންމެ ބޮޑު ވަށްކަމެއް ކުރިޔަސް ، ސާބިތުނުވެ ހިނގައިދާނެއެވެ. ކިތަންމެ ބަޔަކު މެރިޔަސް ކުށްވެރިނުވެ ހިނގައިދާނެއެވެ. ވަށްކަން ކުރިކަމާއި ވަށްކަމުން ހޯދި ފައިސާއިން ވަށްކަންކުރި މީހާގެ މިލްކިއްޔާތު ވިހި ފަންސަވީސްބުރިޔަށް އަރައިގެންދާތަން ރައްޔިތުންނަށް ފެނުނަސް އެއީ ވަގަކަށް ނުވެއެވެ. ނޭނގޭ ގޮތްގޮތަށް މީހުން މެރިޔަސް ، މީހުން މެރިމީހުން މަރައިގެންނަމަވެސް ހެކި ނައްތާލައިގެން ކުށުން ސަލާމަތް ވާނެއެވެ. ސަތޭކަ ޓަނުން ޑްރަގް އެތެރެ ކުރިޔަސް ، އޭގައި ޖެހިނުލާ މީހެއްގެ ގޮތުގައި ކޯޓުން ނުކުމެގެން ދެވިދާނެ އެވެ. މީސްމީޑިއާއިން މިކަންކަން ފޮރުވާނެއެވެ. އެއްބަޔަކު އެވާހަކަ ދައްކާއިރު ، އަނެއްބަޔަކު އެވާހަކަ ދިފާޢުކޮށް ، ކުށްވެރިންގެ މައުސޫމްކަން ދައްކާނެއެވެ. ބަލަން އަދި އަޑުއަހަންތިބޭމީހުންނަށް ، ޤަބޫލުކުރާނީ ކޮންވާހަކައެއްކަން ނޭނގޭވަރު ކުރާނެއެވެ. އެހިސާބުން ތެދާއި ޙަޤީޤަތް ނެތި ފަނާވެގެން ދާނެއެވެ. ޑިމޮކްރަސީއަކީ މިއީ ހެއްޔެވެ ؟
އެހެންނަމަވެސް ޤަބޫލުކުރަންޖެހޭ ޙަޤީޤަތެއް އެބައޮތެވެ. އެއީ ތެދަކީ ، ޑިމޮކްރަސީގެ އެންމެ މަތީ އަސާސް ކަމެވެ. އެއާ ނުލައި ޑިމޮކްރަސީ ފުރިހަމަނުވުމުގެ އިތުރަށް ، ޑިމޮކްރަސީ ދެމިއެއްވެސް ނުއޮންނާނެ ކަމެވެ. ތާރީޚު ޢިއާދަ ވާނެއެވެ. ދޮގާއި މަކަރާއި ޙީލަތުން ބިނާކުރާ ޢިމާރާތް ހުންނާނީ ކައްޗަށެވެ. އެކަން ފަޅާ އަރާނެ ދުވަސް އަންނާނެއެވެ. ފެންނަން ހުއްޓަސް ތެދު ޤަބޫލުނުކުރާމީހުންނަށް ، އެއީ ތެދުކަން އިޙްސާސްވާނެ ކޮންމެވެސް ދުވަހެއް އަންނާނެއެވެ. އެކަން ޔަޤީނެވެ.
އެމެރިކާގެ މީސްމީޑިއާ ޤަބޫލުކުރާގޮތުގައި ، އެބައިމީހުންގެ ވާޖިބަކީ ތެދު ކަށަވަރު ކުރުމެއް ނޫނެވެ. ދެފަރާތް ދެއްކުމެވެ. އެއްފަރާތުން ބުނާވާހަކަ ފާޅުކޮށް ، އަނެއްފަރާތުގެ ރައްދު ޢާންމު ކުރުމެވެ. އެމެރިކާގެ މީސްމީޑިއާ ޤަބޫލުކުރާ ގޮތުގައި މެދުގައިހުރެ ، ދެފަރާތުގެ ވާހަކަ ހާމަކުރުން އެއީ ތެދެވެ. ނޫނެކެވެ. އެއީ ތެދެއް ނޫނެވެ. އެވަނީ ދޮގަށެވެ. ކަނޑައެޅިގެން އެނގޭ ތެދު ހާމަނުކުރުމުން އެއިން ނުކުންނަ ނަތީޖާއަކީ ، ހަމަނުޖެހުމެވެ. އަރައިރުމާއި ތަޅައިފޮޅުމެވެ. ހަނގުރާމައާއި ސުންނާފަތި ކަމެވެ. މިފަދަ ކަންކަމުގައި އެންމެ ނުކިއްސަރު ވަޞީލަތަކީ ސޯޝަލް މީޑިއާއެވެ. ޖަހައިލާ އެންމެ ނޯޓަކުން މުޅިތަން ގޮއްވައިލައެވެ. އެއީ އެހާވެސް ބާރުގަދަ ވަޞީލަތެކެވެ.
އިންތިޚާބު ވަގަށް ނެގިވާހަކަ މީހަކު ދައްކައިފިނަމަ ، ވަގަށް ވޯޓު އެޅިކަމުގެ ހެއްކެއް ސާބިތުނުވާ ވާހަކަ ބުނެއެވެ. ފޮތުގައި އޮތްގޮތް ބަލައިގެން ، އެކަން ސާބިތެއް ނުވެއެވެ. އެކަމަކު އެކަން އޮތީ ކޮށްފައެވެ. ޙަޤީޤަތް އެނގެނީ މަޤާމާ ޙަވާލުވެ ޤާނޫނީ ހުވާ ކުރުމަށްފަހުގައެވެ. ދެން ހެދޭނެގޮތެއް ނުއޮވެއެވެ. ނުވަތަ ގޮތެއް ހެދެން އޮތަސް އެގޮތަކަށް ވެރިކަމުން ނުފޫޒު ފޯރުވައެވެ. ކަނޑައެޅިގެން ސާބިތުވާ މިހެކި ފޮރުވުމަށްޓަކައި " މޫނުމަތި ރީތިކުރަން " އެތައް ޚަރަދެއްކޮށް ރައްޔިތުންގެ ލޮލުގައި އަނދުންއަޅުވައިގެން ، ވެރިކަމުގެ ދައުރު ނިންމައިލައެވެ.
އެމެރިކާގެ މީސްމީޑިއާއަކަށް މިކަމެއް ނުވިސްނެއެވެ. ޔަހޫދީންގެ ވެރިކަމާއި އެމީހުންގެ މުށުތެރޭގައި އިޤްތިޞާދާއި މީސްމީޑިއާ އޮތަނެއްގައި ، ކިތަންމެ ޒަމާނެއްވަންދެން ޑިމޮކްރަސީ އޮތްނަމަވެސް އެއީ ދިރުމެއްލިބޭނެ ނިޒާމެއްނޫނެވެ. އެހެންކަމުން އެމެރިކާގެ ޑިމޮކްރަސީއަކީ ރެނދުލަމުން ހަލާކުވަމުންދާ ނިޒާމެއްކަން މިއަދުގެ ޙާލަތުން ސާފުކޮށް އެނގެއެވެ. އެމެރިކާނޫނަސް ، އެފަދަ ގޮތަކަށް ނިޒާމްތައް ބަށްޓަންވެފައިވާ ކޮންމެ ޤައުމަކަށްވެސް އެމެރިކާގެ ޑިމޮކްރަސީއަކީ ފިލާވަޅެކެވެ.
