އަންނަހަފުތާގައި ފަށާ ޗަރުކޭސް ފެސްޓިވަލްގެ މެއިން ސްޕޮންސަރަކަށް އުރީދޫ ހަމަޖައްސައިފިއެވެ.
ދިވެހި އާޓިސްޓުންގެ ހުނަރު އާންމުންނަށް ދައްކާލުމަށް ކުރިއަށްގެންދާ މި ފެސްޓިވަލް މި އަހަރު ބާއްވަން ހަމަޖެހިފައިވަނީ އަންނަ ހަފްތާގެ ބުރާސްފަތި އަދި ހުކުރު ދުވަހުގެ ހަވީރު 4 ން ހަވީރު 6 ޖަހަންދެންނެވެ. އަދި ރޭގަނޑު 8 ން 12 ޖަހަންދެންނެވެ.
މި ފެސްޓިވަލްގެ ފައުންޑަރ، މުހައްމަދު އަހްނަފް އިބްރާހިމް ވިދާޅުވީ މި ފެސްޓިވަލްގެ މެއިން ސްޕޮންސަރަކަށް އުރީދޫ ހަމަޖެހިގެންދިއުމަކީ މި ފެސްޓިވަލް ކާމިޔާބުކަމާއެކު ކުރިއަށްގެންދިއުމަށް ލިބުނު އިތުރު ހިތްވަރެއްކަމަށެވެ. އަދި އެކަމަށް އުރީދޫ މޯލްޑިވްސް އަށް ދިވެހި އާޓިސްޓުންގެ ފަރާތުން އޭނާ ވަނީ ޝުކުރު އަދާކޮށްފައެވެ.
ދިވެހި އެންމެހާ އާޓިސްޓުންނަށް މި ފެސްޓިވަލަށް މަރުހަބާކިޔާނެ ކަމަށާއި ފުރުސަތު ހުޅުވާލާފައިވާ ކަމަށް ވެސް އޭނާ ވިދާޅުވިއެވެ.
މިދިޔަ އަހަރުގެ ޗަރުކޭސް ފެސްޓިވަލްގައި ވެސް މިއުޒިކާއި ވިޒުއަލް އަދި ލިޔުންތެރިކަމުގެ ފަންނުފަދަ ފަންނުގެ ހުށަހެޅުންތައް ދައްކާލާފައިވެއެވެ.
މި އަހަރު އެ ދާއިރާތަކުގެ އިތުރުން ޕަފޯމަންސް އާޓް ފަދަ ފަންނުތަކުންވެސް ފުރުސަތު ލިބިގެންދާނެ ކަމަށާއި އާޓިސްޓުންނަށް އެ އާޓިސްޓުންގެ މަސައްކަތް ވިއްކުމުގެ ފުރުސަތު ވެސް ލިބޭނެ ކަމަށް ވަނީ މައުލޫމާތު ލިބިފައެވެ.
މިއީ މި ފެސްޓިވަލް ބާއްވާ ދެވަނަ އަހަރެވެ.
