ސްޕެޝަލް އޮލިމްޕިކްސްގެ މޯލްޑިވްސް (އެސްއޯއެމް) ގެ ފުޓްބޯޅަ އަދި އެތްލެޓިކްސް ގެ ކޯޗުންގެ މަގާމަށް ކުރިމަތިލާން ހުޅުވާލައިފިއެވެ.
އެސްއޯއެމް އިން ކޮށްފައިވާ އިޢުލާނެއްގައި ބުނެފައިވަނީ މި ދެ ކުޅިވަރަށް ވެސް ބޭނުންވަނީ އަންހެން އަދި ފިރިހެން ކޯޗުން ކަމަށެވެ.
މި މަގާމުތަކަށް އެޕްލިކޭޝަން ފޮނުވުމުގެ ސުންގަޑިއަކީ 20 އެޕްރީލް 2022 ވާ ބުދަ ދުވަހުގެ 13:00 އަށް ހަމަވާއިރު، ސަރުކާރު ބަންދުނޫން ކޮންމެ ދުވަހަކު ހެނދުނު 10:00 އިން މެންދުރު ފަހު 13:00 އަށް މި މަގާމުތަކަށް އެޕްލިކޭޝަން ހުށަހެޅޭނެ ކަމަށް އެސްއޯއެމް އިން ބުނެއެވެ. އަދި ސްޕެޝަލް އޮލިމްޕިކްސް މޯލްޑިވްސްގެ އޮފީސް (ގަލޮޅުދަނޑު އެކަމަޑޭޝަން ބްލޮކް) ނުވަތަ admin@somaldives.org މެއިލް މެދުވެރިކޮށް ވެސް އެޕްލިކޭޝަން ހުށަހެޅޭނެ ކަމަށް އެސްއޯއެމް އިން ބުނެއެވެ.
އެސްއޯއެމް އިން ބުނީ މި ދެ ކުޅިވަރުގެ ކޯޗުންގެ މުސާރައަކީ މަހަކު 4000 ރުފިޔާ އާއި 5000 ރުފިޔާ އާއި ދެމެދު ކަމަށެވެ.
އެތްލެޓިކްސް ކޯޗުގެ ޝަރުތުތަކުގެ ތެރޭގައި IAAF ކޯޗިންގ ދަށްވެގެން ލެވެލް 1 އޮތުން ނުވަތަ ރާއްޖޭގެ އެތުލެޓިކްސް އެސޯސިއޭޝަން ޤަބޫލުކުރާ ކޯޗިންގ ކޯހެއް ހަދާފައިވުން ނުވަތަ ފިޒިކަލް ފިޓްނަސް ކޯހެއް ހަދާފައިވުން ހިމެނެއެވެ. ނުވަތަ އެތުލެޓިކްސް ކްލަބެއްގައި އެސިސްޓެންޓެއްގެ ގޮތުގައި މަސައްކަތް ކޮށްފައިވުން ނުވަތަ ނަފްސާނީ ނުކުޅެދުންތެރިކަން ހުންނަ ފަރާތްތައް ގެންގުޅުމުގެ ކޯހެއް (ޓީޗިންގ) ހަދާފައިވުން ނުވަތަ ނަފްސާނީ ނުކުޅެދުންތެރިކަން ހުންނަ ފަރާތްތަކަށް ޚިދުމަތް ކުރުމުގެ ޝައުޤު ހުރުން ވެސް ހިމެނެއެވެ.
ފުޓްބޯޅަ ކޯޗުގެ ޝަރުތުތަކުގެ ތެރޭގައި ފުޓްބޯޅަ ބީ ލައިސެންސް އޮތުން ނުވަތަ ފުޓްބޯޅަ ސީ ލައިސަންސް އޮތުން ނުވަތަ ފުޓްބޯޅަ ގްރާސް ރޫޓު ކޯޗިންގ ހަދާފައިވުން ނުވަތަ ފުޓްބޯޅަ ކްލަބެއްގައި އެސިސްޓެންސް ކޯޗެއްގެ ގޮތުގައި މަސައްކަތް ކޮށްފައިވުން ހިމެނެއެވެ.
މި މަގާމުތަކުގެ މަސްއޫލިއްޔަތުތަކުގެ ތެރޭގައި ސްޕެޝަލް އޮލިމްޕިކްސް މޯލްޑިވްސް އިން އަންގާ ގޮތެއްގެމަތިން ނަފްސާނީ ނުކުޅެދުންތެރިކަން ހުންނަ ކުދިން (ފަރާތް) ގެ އެތުލެޓިކްސް ކޯޗެއްގެ ގޮތުގައި މަސައްކަތް ކުރުން ހިމެނޭއިރު، މިއީ އެއް އަހަރުދުވަހުގެ މަގާމުތައް ކަމަށާއި އަހަރު ގުނާނީ އެއްބަސްވުމުގައި ސޮއި ކުރާ ތާރީޚުން ފެށިގެން ކަަމަށް އެސްއޯއެމް އިން ބުނެއެވެ.
ވަޒީފާ އަށް އެދޭ ފޯމު ސްޕެޝަލް އޮލިމްޕިކްސް މޯލްޑިވްސްގެ އޮފީހުންނާއި www.somaldives.org އިން ޑައުންލޯޑު ކުރެވޭނެއެވެ.
