ކުރާނެ އެއްވެސްކަމެއްނެތި ، ބޭކާރުގޮތުގައި ވަގުތުހޭދަކުރާ މީހުންނަކީ ، ތިމާގެ އަޚާގެ މަސްކައި ދައްކަންނުޖެހޭ ވާހަކަދައްކައި ، ޖަމާޢަތުގެ މަޞްލަޙަތު ގެއްލިދާނެކަންކަމުން ވަގުތުހޭދަކުރަންޖެހިފައިވާނެ މީހެކެވެ. އެކަން އެހެންދިމާވަނީ ، އެފަދަމީހުންގެ ސިކުނޑި މަސައްކަތްކުރާނީ އަމިއްލައެދުމަށްކަމަށްވާތީއެވެ. ކީރިތި ޤުރުއާނުގެ އައްތައުބާ ސޫރަތުގެ 87 ވަނަ އާޔަތުގައި ﷲ ސުބްޙާނަހޫ ވަތަޢާލާ ވަޙީކުރައްވައި އަންގަވައިފައި ވެއެވެ.
رَضُواْ بِأَن يَكُونُواْ مَعَ ٱلْخَوَالِفِ وَطُبِعَ عَلَىٰ قُلُوبِهِمْ فَهُمْ لاَ يَفْقَهُونَ
"(ހަނގުރާމަޔަށް ނުގޮސް) ގޭގައިތިބޭ އަންހެނުންނާ އެކުގައިވުމަށް ، އެއުރެން ރުހުނޫއެވެ. އަދި ، އެއުރެންގެ ހިތްތަކުގައި ސިއްކަ ގައްސަވައި ބަންދު ކުރައްވައިފައި ވެއެވެ. ފަހެ ، އެއުރެންނަށް ނުވިސްނެނީއެވެ."
ކަމެއްނުކޮށް ހުހަށް ހުރުން އިޚްތިޔާރުކޮށްފިނަމަ ، ތިމާ އަމިއްލަޔަށް ތިމާގެ ނަފްސު އެހުށަހެޅެނީ ނަފްސާނީ ބަލިމަޑު ކަމަކަށެވެ. އަމިއްލަ ހަލާކާއި ގެއްލުމަށެވެ. އެހެނީ ، ކަމެއްނުކޮށް ހުރުމުން ތިމާގެ ސިކުނޑިގެންދާނީ މާޒީއަށެވެ. މިހާރުގެ ޙާލަތަށެވެ. އަދި މުސްތަޤްބަލަށްވެސް މެއެވެ. އެކަމަކު އެސިކުނޑި ގޮސްހުއްޓޭނީ ހުސް މަސްއަލަތަކެއްގައެވެ. ކޮޅެއްމެދެއް ފެންނަންނެތް ހާސްކަމެއްގެ ތެރެޔަށެވެ. ރަނގަޅު އެއްވެސްކަމެއް ނުފެންނާނެއެވެ. އެހެންކަމުން ، ކަމެއްނުކޮށް ނުވަތަ މަސައްކަތެއްނުކޮށް ހުރުމުން ތިމާގެ އަމިއްލަ ނަފްސު ހަލާކުގެ ތެރެޔަށް ނުގެންދާށެވެ. އެއީ މަޑުމަޑުންގޮސް އަމިއްލަޔަށް މަރުވުންފަދަ ކަމެކެވެ.
މަސައްކަތެއްނުކޮށް ހުރުމަކީ ، ޗައިނާގެ ޖަލުތަކުގައި ޤައިދީންނަށް ދެވޭ އަނިޔާފަދަ ކަމެކެވެ. އެމީހުން ބައިތިއްބާނީ ފެން އިސްކުރެއްގެ ދަށުގައެވެ. އެއިސްކުރުން ފެންތިއްކެއްޖަހާނީ ގަޑިޔަކު އެއްފަހަރުއެވެ. ފެންތިއްކެއްޖަހަންދެން ، ޤައިދީން މަޑުކޮށްގެން އެތިބޭ ވަގުތުތަކުގައި ، އެބައިމީހުންގެ ސިކުނޑި ހާސްކަންމަތީ ގެންދާނީ ނާމާންކަމެއްގެ ތެރެޔަށެވެ.
އެހެންކަމުން ، ހުހަށްނުހުރެ ހޭލާށެވެ. ﷲ ގެ ރަޙުމަތާއި ނިޢުމަތުގެ މަތިން ހަނދުމަކޮށް ، ނަމާދެއް ކޮށްލާށެވެ. އަދި ކީރިތި ޤުރުއާނުން ކޮންމެވެސް މިންވަރެއް ކިޔަވައިލާށެވެ. ﷲ އަށް ހެޔޮދުޢާ ކުރާށެވެ. އަދި ﷲ އަށް ވަކީލުކުރާށެވެ. ޢިބްރަތްތެރި ވާހަކައެއް ކިޔައިލާށެވެ. ބޭނުންހުރި އެއްޗެއް ލިޔެލާށެވެ. ގޭތެރޭގެ ކޮންމެވެސް ކަމެއްކޮށްލާށެވެ. ދިރުންހުރި އުއްމީދެއްގައި ދިރިއުޅެން ދަސްކުރާށެވެ. ﷲ އިރާދަ ކުރެއްވިއްޔާ މަޑުމަޑުންގޮސް ތިބާގެ ދުނިޔެ އާބާދު ވެގެންދާތަން ލަހެއްނުވެ ، ތިބާއަށް ފެންނާނެއެވެ.
