މިދުވަސްވަރު އޭސީފަދަ ވަސީލަތްތައް ބޭނުން ކުރުމުގައި އިތުރަށް ސަމާލުވުމަށް ސްޓެލްކޯ އިން އިލްތިމާސް ކޮށްފިއެވެ.
އެ ކުންފުނިން މިހެން އިލްތިމާސްކޮށްފައި މިވަނީ މި އޭޕްރިލް މަހަކީ މިއަހަރުގެ ވެސް އެންމެ ހޫނުގަދަ މަސްކަމަށް މެޓް އޮފީހުން ވެސް ބުނެފައިވަނިކޮށެވެ.
ސްޓެލްކޯ އިން ކުރި ޓްވީޓެއްގައި ބުނެފައިވަނީ މިދުވަސްވަރަކީ ރާއްޖެއަށް އެންމެ ހޫނު ގަދަވާނެ ދުވަސްވަރު ކަމަށް މޫސުމާއި ބެހޭ އިދާރާއިން ލަފާކޮށްފައިވާ ކަމަށާއި މިދުވަސްވަރާއި ރޯދަމަސް ދިމާވެފައިވާތީ، ކަރަންޓު އިގުތިސާދު ކުރުމަށް ޚާއްސަ ސަމާލުކަމެއްދިނުމަށް އެދޭ ކަމަށެވެ. އަދި އެންމެ ގިނައިން ކަރަންޓު ބޭނުން ކުރާ ކަމަށް ބެލެވޭ، އޭސީ ފަދަ ވަސީލަތްތައް ބޭނުން ކުރުމުގައި އިތުރަށް ސަމާލުވުމަށް ވަނީ އިލްތިމާސް ކޮށްފައެވެ.
މިދުވަސްވަރަކީ ރާއްޖެއަށް އެންމެ ހޫނު ގަދަވާނެ ދުވަސްވަރު ކަމަށް މޫސުމާއި ބެހޭ އިދާރާއިން ލަފާކޮށްފައިވާއިރު، އަދި މިދުވަސްވަރާއި ރޯދަމަސް ދިމާވެފައިވާތީ، ކަރަންޓު އިގުތިސާދު ކުރުމަށް ހާއްސަ ސަމާލުކަމެއްދީ، އެންމެ ގިނައިން ކަރަންޓު ބޭނުން ކުރާ ކަމަށް ބެލެވޭ،
— STELCO (@STELCOMALDIVES) April 8, 2022
ކޮންމެ އަހަރެއްގެ ވެސް އޭޕްރީލް މަހަކީ ރާއްޖެއަށް އެންމެ ހޫނުގަދަވާ ދުވަސްވަރު ކަމަށާއި މިއަހަރު ވެސް އެންމެ ހޫނުގަދަވާނެކަމަށް ލަފާކުރެވެނީ މިމަހުކަމަށް މެޓް އޮފީހުން ވަނީ ބުނެފައެވެ. އަދި މިމަހު ރާއްޖޭގެ ހޫނުމިން އާންމު ގޮތެއްގައި އުޅޭނީ 29.6 ނުވަތަ 29.7 ޑިގްރީ ސެލްސިއަސްގައި ކަމަށް ވެސް މެޓް އޮފީހުން ބުނެފައިވެއެވެ.
މީގެ އިތުރުން އެންމެ ހޫނު ގަދަވާނީ މެންދުރު ގަޑީގައި ކަމަށް ވެސް ބުނެފައިވެއެވެ.
މެޓް އޮފީހުން ބުނީ މިދުވަސްވަރު ވައި މަޑުވުމާއި އޭގެ ސަބަބުން ވައިގެ ތެތްކަން މަތިކޮށް ހިފެހެއްޓިފައި ހުރުމުން ވައިގެ ހޫނުމިނަށްވުރެ، އިހުސާސްކުރެވޭ ހޫނުމިން އެތައް ގުނައެއް މަތިވާނެކަމަށެވެ.
