ހެޔޮޢަމަލަކީ، އިންސާނާގެ ޙަޔާތުގައި ދިމާވާ ކޮންމެ ހިނދުކޮޅަކަށްވެސް ޚާއްޞަކުރެވިގެންދާފަދަ އަޅުކަމެކެވެ. ބޭނުންކުރަން އެނގިއްޖެ ނަމައެވެ. ޝައިޠާނާގެ ވަސްވާހުން ދުރުހެލިވެ، ވިސްނައި ފިކުރުކޮށްގެން ތިމާގެ ޢަމަލުތައް ސީދާ ކުރެވިއްޖެނަމަ، ހެޔޮޢަމަލުގެ ތިލަފަތް ބަރުކޮށްލެވޭފަދަ ޙާލަތްތަކެއް އިންސާނާއަށް އުފެއްދިދާނެއެވެ.
ހުކުރު ދުވަހެކެވެ. އަޙްމަދަށް ހުކުރަށްދާން ތައްޔާރުވެވުނީ ތަންކޮޅެއް އަވަހަށެވެ. ޢާންމުގޮތެއްގައި ހުކުރުދުވަހަކީ، ފާޚާނާ ދޮވެލާ ދުވަސްމެއެވެ. ފެންވަރަން ވަދެ އަޙްމަދު ފާޚާނާއިން ނުކުތީ ފާޚާނާ ދޮވެލުމަށްފަހުގައެވެ. އަޙްމަދުގެ އަންހެނުން އޭރު އަވަދިނެތި އުޅެނީ މެންދުރަށް ކެއްކުމުގެ މަސައްކަތުގައި ބަދިގޭގައެވެ. އަންހެނުންނަށް ފާޚާނާ ދޮންނަން ނުޖައްސަންވެގެން އަޙްމަދު ފާޚާނާ ދޮވެލީއެވެ. އެއީ ހެޔޮ ޢަމަލެކެވެ. ހުކުރުވަގުތަށް މިސްކިތަށްދާން އަދި ވަގުތުކޮޅެއް އޮތީމަ، ކަހްފުސޫރަތް ކިޔަވާލަން ހިތަށްއަރައި ޚަތިމް ނަގައިގެން ކަހްފު ސޫރަތް ކިޔަވައިލިއެވެ. ހުކުރަށްދާން ގެއިން ނުކުންނަންވާއިރަށް ކަހްފު ސޫރަތް ކިޔަވައި ނިންމައިލެވުނެވެ. އެއީ އަދި މާހެޔޮކަން ބޮޑުވެގެންވާ ޢަމަލެކެވެ.
އަޙްމަދު ހުކުރަށްދާން ގެއިން ނުކުތެވެ. އޭރުހުރީ މެންދުރަށް ބަންގިގޮވަން ގާތްވެފައެވެ. ހުކުރަށްދާ މީހުން ހިނގާފަޔާއި ސައިކަލުގައި މިސްކިތާދިމާއަށް ދެއެވެ. މަގުމަތީ ހިނގަމުންދަނިކޮށް މަގުމައްޗަށް މީހަކު އެއްލައިލާފައިއޮތް ދަނގަޑުބުރިއެއް ފެނުނެވެ. އެދަގަނޑުބުރިއަށް ސައިކަލަކަށް އެރިއްޖިއްޔާ ގައިމުވެސް ގެއްލުމެއް ނުލިބިއެއް ނުދާނެއެވެ. އެއީ ހެޔޮ ޢަމަލެކެވެ.
އަޙްމަދު މިސްކިތާ ދިމާއަށް ހިނގާފައިދަނިކޮށް، ސައިކަލުގައިދިޔަ މީހަކު ކައިރިކޮށްލައި ހުއްޓައިލިއެވެ. އަދި އަޙްމަދު އެދަނީ މިސްކިތަށްތޯ އަހައިލިއެވެ. އެއީ އަޙްމަދު ދަންނަވެސް މީހެއްނޫނެވެ. އާނއެކޭ ބުނުމުން ސައިކަލަށް އަރާށޭ ބުންޏެވެ. ސައިކަލުގައި އަޙްމަދު މިސްކިތަށް ގެނދިޔަމީހާ އެކުރީ ހެޔޮ ޢަމަލެކެވެ.
ހުކުރަށްގޮސް، މިސްކިތުގެ ފުރަތަމަ ފަންގިފިލަޔަށް އަރައި، އިމާމްމީހާ ހުކުރުކުރާތަން ފެންނަގޮތަށް އިނުމަކީ އަޙްމަދުގެ އާދައެކެވެ. ފުރަތަމަ ފަންގިފިލަޔަށް އަރަން އަޙްމަދު ދިޔައިރު މުސްކުޅިވަރެއްގެ މީހަކު ފަޔަށް ތަދުވާތީ، ހުއްޓެމުން ކަހަލަ ގޮތަކަށް ފުރަތަމަ ފަންގިފިލަޔަށް އަރަން މަސައްކަތް ކުރަމުން ގެންދެއެވެ. އަޙްމަދު އެމުސްކުޅިޔާގެ އަތުގައި ހިފައިލިއެވެ. އަދި އޭނާއަރަން އެހީތެރިވެދިނެވެ. އެއީވެސް އަޙްމަދަށް ކުރެވުނު ހެޔޮ ޢަމަލެކެވެ. މިހެންގޮސް ހެޔޮކަމެއްގެ ގޮތުގައި ކުރެވިދާނެ ކިތަންމެކަމެއް ހުންނާނެއެވެ. ދިރިއުޅުމުގެ ކޮންމެ ޙާލަތެއްގައި، ކޮންމެ ހިނދެއްގައިވެސް މެއެވެ.
