ޖަޕާނުގެ ވެރިރަށް ޓޯކިޔޯގައި ހުކުރު ދުވަހު (23 ޖުލައި) ރަސްމީކޮށް ފެށުމަށް ހަމަޖެހިފައިވާ 2020 ވަނަ އަހަރުގެ އޮލިމްޕިކްސް ކުޅިވަރު މުބާރާތް ފަހު ވަގުތު ކެންސަލް ކުރަން ޖެހުމަކީ ނެތް ކަމެއް ނޫން ކަމުގައި އެ މުބާރާތް އިންތިޒާމުކުރާ ކޮމިޓީގެ ވެރިޔާ ޓިޝިރޯ މޫޓޯ ވިދާޅުވެއްޖެއެވެ.
މުބާރާތުގައި ބައިވެރިވާ ކުޅުންތެރިން ކޮވިޑް-19 އަށް ޕޮޒިޓިވްވާ މިންވަރު އިތުރުވަމުންދާތީ، މުބާރާތް ކެންސަލްކުރަން ޖެހިދާނެތޯ ނޫސްވެރިއަކު ސުުވާލު ދެންނެވުމުން އެއަށް ޖަވާބުދެއްވަމުން މޫޓޯ ވިދާޅުވެފައިވަނީ ޕޮޒިޓިވްވާ މިންވަރު އިތުރުވާނަމަ ކެންސަލް ކުރުމަކީ ނެތް ކަމެއް ނޫންކަމުގައެވެ.
"(ކޮވިޑް-19 އަށް ޕޮޒިޓިވްވާ) ކޭސްތައް އިތުރުވަމުންދާނަމަ އަހަރުމެން މަޝްވަރާތައް ކުރިއަށް ގެންދާނަން." މޫޓޯ ވިދާޅުވިއެވެ.
"އަަހަރުމެން އެއްބަސްވެފައި ވާނީ ކޮރޯނާވައިރަސްގެ ހާލަަތަަށް ބަލާފައި އަނެއްކާވެސް 'ފަސް ފަރާތުގެ' ވާހަކަތައް ކުރިއަށް ގެންދަން. މިވަގުތު ކޮރޯނާވައިރަސްގެ އަދަދުތަައް މައްޗަށްވެސް ހިނގައިދާނެ. ދަށަށްވެސް ހިނގައިދާނެ. ހާލަތު ދިމާވާ ގޮތަކުން އަހަރުމެން ކަންކުރާނެ ގޮތަކާ މެދު އަހަރުމެން ވިސްނާނަން." އޭނާ އިތުރަށް ވިދާޅުވިއެވެ. ފަސްފަރާތަކީ އިންޓަނޭޝަނަލް އޮލިމްޕިކް ކޮމިޓީ (އައިއޯސީ)، ޓޯކިޔޯ 2020 އޮގަނައިޒިންގ ކޮމިޓީ، ޖަޕާނު ސަރުކާރު، ޓޯކިޔޯ މެޓްރޮޕޮލިޓަން ސަރުކާރު އަދި އިންޓަނޭޝަނަލް ޕެރެލިމްޕިކް ކޮމިޓީއެވެ.
އިއްޔެއާ ހަމައަށް ޓޯކިޔޯ އޮލިމްޕިސްއާ ގުުޅުން ހުރި 71 މީހަކު ވަނީ ކޮވިޑް-19 އަށް ޕޮޒިޓިވް ވެފައެވެ.
ޓޯކިޔޯ 2020 އޮލިމްޕިކްސްގައި 200 އަށްވުރެ ގިނަ ގައުމުން 11 ހާހަށްވުރެ ގިނަ ކުޅުންތެރިން ބައިވެރިވެއެވެ. އެމީހުން ތިބޭނީ 21 އިމާރާތެއްގައެވެ.
2020 ވަނަ އަހަރު ޓޯކިޔޯގައި ބާއްވަން ހަމަޖެހިފައި އޮތް އޮލިމްޕިކްސްއާއި ޕެރެލިމްޕިކްސް މިއަހަރަށް ލަސްކުރީ ކޮވިޑް-19 ގެ ސަބަބުންނެވެ. މިއީ މިޒަމާނުގެ އޮލިމްޕިކްސް 124 އަހަރުގެ ތާރީޚުގައި އޮލިމްޕިކްސް ލަސްކުރަން ޖެހުނު ފުރަތަމަ ފަހަރެވެ.
ތަރައްގީވެފައިވާ އެެހެން ގައުމުތަކާ އަޅާބަލާއިރު، ޖަޕާން އުޅެނީ ވެކްސިން ޖެހުމުގައި ވަރަށް ފަހަތުގައެވެ. އެ ގައުމުގައި މިހާތަނަށް 8 ލައްކަ 40 ހާސް މީހުން ކޮވިޑް-19 އަށް ޕޮޒިޓިވްވެފައި ވާއިރު، 15 ހާހަށްވުރެ ގިނަ މީހުން ވަނީ މިބަލީގައި މަރުވެފައެވެ. އޮލިމްޕިކްސް ބާއްވާ ރަށް ޓޯކިޔޯގައި ކޮވިޑް-19 އަށް ޕޮޒިޓިވްވާ މީހުން އިތުރުވާން ފަށާފައި ވާއިރު، އިއްޔެ އެކަނިވެސް އެރަށުގައި 1387 މީހުން ބައްޔަށް ޕޮޒިޓިވްވެފައި ވެއެވެ.
