އިނގިރޭސި ރާނީ އަވަހާރަވުމުން ހިނގައިދާނެ ކަންކަން

އިންސާނާގެ ޙަޔާތުގައި، މަރާއި ޓެކްސް އަކީ، ކުރިމަތިނުވެ ނުދާނެ ދެކަމެކެވެ. އިނގިރޭސިވިލާތުގެ ނަން، ހިތްމައްޗަށް ގެނެވޭހިނދު، ރާނީގެ ތަޞައްވުރު ނުކުރެވިއެއް ނުހުންނާނެއެވެ. ރާނީއަކީ، އިނގިރޭސި ތަޚުތުގައި އެންމެ ގިނަދުވަސްވަންދެން ރަނިކަންކުރެއްވި ކަމަނާއެވެ. އިނގިރޭސި ތަޚުތުން، ރާނީނޫން މޫނެއް ނުފެންނަ އެތައް ޖީލެއް އުފެދި ހިނގައްޖެއެވެ. ރާނީއާ ނުލައި ދުނިޔޭގައި ނޫޅޭ އެތައްބަޔަކު، އިނގިރޭސިވިލާތުގައި އެބަތިއްބެވެ. ރާނީ އަވަހާރަވެއްޖެނަމަ، އެއެންމެންގެ ޙަޔާތަށް އަސަރުތަކެއް ނުކޮށެއް ނުހުންނާނެއެވެ. އެހެން ޤައުމުތަކުގައިވެސް ރާނީން ތިއްބަވާއިރު، ރާނީއޭ ބުނާއަޑު އިވުމުން، ހިތްމައްޗަށް އަންނާނީ، އިނގިރޭސި ރާނީ ކްއީން އެލިޒަބަތު 2 އެވެ. ކްއީން އެލިޒަބަތު، އިނގިރޭސި ތަޚުތުގައި ރަނިކަންކުރައްވަމުން ގެންދަވަނީ 1952 ވަނަ އަހަރުން ފެށިގެންނެވެ. އެކަމަނާއަކީ، އިނގިރޭސި ވިލާތުގެ ތާރީޚުގައި، އެޤައުމުގެ ތަޚުތުގައި އެންމެ ގިނަދުވަހު ރަނިކަންކުރައްވަމުން ގެންދަވާ ރާނީއެވެ. ރަސްކަލަކުވެސް، އެހައި ގިނަދުވަހު، އިނގިރޭސި ތަޚުތުގައި ރެދަލިކުރައްވާފައެއް ނުވެއެވެ. އެކަމަނާ ރަނިކަންކުރައްވަމުން ގެންދަވާއިރު، ދޮޅަހަކަށް ބޮޑުވަޒީރުން ވެރިކަން ކުރައްވާފައި ވެއެވެ. ވިއްސަކަށް ސަމަރ އޮލިމްޕިކްސް ދެކެވަޑައިގެންފިއެވެ. ހައެއްކަ އަށެއްކަ ޕޯޕުން ބަދަލުވެފައި ވެއެވެ. އެކަމަނާއަކީ، ހިލޭސާބަހަށް މަސައްކަތްކުރާ،  6 ސަތޭކަވަރަކަށް ޖަމާޢަތެއްގެ ބެލެނިވެރި ފަރާތެވެ.

ރާނީ އަވަހާރަވުމުން، ޗާލްސް ރަސްކަމަށް އިސްވެވަޑައިގަތުމާއެކު، ކޮމަންވެލްތުގެ ޤައުމުތަކުގެ ސިޔާސަތަށް ބަދަލުތަކެއް  އަތުވެދާނެކަމަށް ގިނަބަޔަކު ދެކެއެވެ. ކޮމަންވެލްތުގެ 36 ޤައުމުގެ އެންމެ މަތީވެރިޔަކީ ރާނީއެވެ.

ރާނީ އަވަހާރަވުމުން، އެންމެ ފުރަތަމަވެސް، މުޅި ވިލާތްއެއްކޮށް ޝޮކަކަށް ދާނެއެވެ. ނަފްސާނީގޮތުން އަސަރުކޮށް، ގިނަބަޔެއްގެ ހިތްފަޅައިގެންދާނެއެވެ. އެކަންވާނީ، އިނގިރޭސިވިލާތަށް ވަރަށްބޮޑު ކަމަކަށެވެ. ރަނިކަމުގެ ތަޚުތަށް ވެޑުވުނީއްސުރެ، ރާނީއަކީ މުޅިދުނިޔެއަށް މަޝްހޫރު ބޭފުޅެކެވެ. ޚާއްޞަކޮށް، އިނގިރޭސިވިލާތާއި އުތުރު އަޔަލޭންޑްގެ ދިރުމެވެ.  އެސަރަޙައްދުގެ މިއަދުގެ ޖީލުގެ އެތައްކަމެއްވަނީ ބަދަލު ވެފައެވެ. މަންޒަރުތައްވަނީ ތަފާތުވެފައެވެ. މިހުރިހައިކަމެއްގެ ނާރެހަކީ ރާނީއެވެ. އެހެންކަމުން، ރާނީ އަވަހާރަވިކަން ރައްޔިތުންނަށް އެނގުމުގެކުރިން، ހިނގާނެ އެތައްކަމެއް އެބަހުއްޓެވެ. ސްޓޮކް އެކްސްޗޭންޖް، ދުވަސްތަކަކަށް ބަންދުވެ، ހިތާމަފައުޅުކުރުމުގެ ދުވަސްތަކާއެކު، ރާނީ ވަޅުފުޅުލުމުގެ ރަސްމިއްޔާތަށް ހޭދަވާ ދުވަސްތަކުން، އިޤްތިޞާދަށް ލޮޅުން އަރައި، އެތައް ބިލިއަން ޕައުންޑެއްގެ ގެއްލުން ކުރިމަތިވާނެއެވެ. އައު ރަސްގެފާނުގެ ފޮޓޯފުޅުޖަހައި، އިނގިރޭސި ޕައުންޑް ޗާޕްކުރެވި، ރާނީގެ ފޮޓޯފުޅުޖެހި ނޫޓުތައް މަޑުމަޑުން ނެތިގެންދާނެއެވެ. ސްޓޭމްޕާއި ޕާސްޕޯރޓް އަދި ސިފައިންނާއި ފުލުހުންގެ ޔުނިފޯމަށް ބަދަލު ގެނެވޭނެއެވެ. އިނގިރޭސި ޤައުމީ ސަލާމްވެސް " ގޯޑް ސޭވް ދަ ކިންގް " އަށް ބަދަލު ކުރެވޭނެއެވެ.

އޮޕަރޭޝަން ލަންޑަން ބްރިޖަކީ، ރާނީ އަވަހާރަވުމުން ދެންހިނގައިދާ ކަންކަމަށް ދެވިގެންދާ ކޯޑެކެވެ. ލަންޑަން ބްރިޖްގެ ޙަރަކާތްތައް ފެށޭނެއެވެ. ލަންޑަން ބްރިޖްގެ ރޭވުމުގެ މަތިން، ދެންއޮންނަ މަސްއޫލިއްޔަތު އެޅިގެންދާނީ، ކްއީންގެ ޕްރައިވެޓް ސެކެޓްރީގެ އިސްތަށިފުޅުގައެވެ. އިނގިރޭސިވިލާތުގެ ބޮޑުވަޒީރަށް އެޚަބަރު  ދެންނެވުމަށެވެ. އެޚަބަރު ދެއްވުމަށް، ރާނީގެ ޕްރައިވެޓް ސެކެޓްރީ، ބޮޑުވަޒީރަށް ދަންނަވާނީ " ލަންޑަން ބްރިޖް އިޒް ޑައުން " މިފަދައިންނެވެ. މިޚަބަރު، ބޮޑުވަޒީރަށް ދެންނެވޭނީ ރާނީއަކީ ހެޑްއޮފް ސްޓޭޓްކަމުގައި ބެލެވޭ 15 ޤައުމެއްގެ ވެރިނންނަށް ދެންނެވުމުގެ ކުރިންނެވެ. އަދި ކޮމަންވެލްތުގެ 36 ޤައުމުގެ ވެރިންނަށްވެސް އެމަޢުލޫމާތު އެރުވުމުގެ ކުރިންނެވެ. މިކަންކުރާނީ، އިނގިރޭސި ފޮރިން އޮފީހުގެ ގްލޯބަލް ރެސްޕޮންސް ސެންޓަރުންނެވެ. މިތަން ހުންނަނީ ލަންޑަނުގައި ކަމަށްވިޔަސް، ހުންނަތަނެއް އެއްވެސް މީހަކަށް ނޭނގެއެވެ. އިނގިރޭސިވިލާތުގެ ރައްޔިތުންނަށް މިކަން ހާމަވެގެންދާނީ، ބަކިންގހަމްޕެލަސްގެ ގޭޓުގައި އެޚަބަރުގެ ނޯޓިސް ހަރުކުރެވޭ ހިސާބުންނެވެ. ޕެލަސްގެ އެންމެހައި މުއައްޒަފުންގެ ވައަތުގައި ކަޅުކުލައިގެ ބޭންޑެއް އެޅުވޭނެއެވެ. މިބޭންޑްގެ ފުޅައުމިނުގައި ހުންނަންޖެހޭނީ 3 އިންޗިއާއި އިންޗިއެއްގެ ހަތަރުބައިކުޅަ އެއްބައެވެ.

އެއަށްފަހު، ޕްރެސް އެސޯސިއޭޝަނާއި އެހެނިހެން ނޫސް އިދާރާތަކަށް އެޚަބަރު ޢާންމު ކުރެވޭނެއެވެ. އެހިސާބުން، ހުރިހައި ބޮޑެތި ޓީވީ ޗެނަލްތަކުގެ ޕްރޮގްރާމްތައް މެދުކަނޑައި ލެވޭނެއެވެ. އަދި ޚަބަރުކިޔާމީހުން، ކަޅުހެދުން ލައި ކަޅުޓައީ އަޅާނެއެވެ. ހުރިހައި ޗެނަލްތަކުން މިޔުޒިކް ފޮނުވާއިރު، ނޫކުލައިގެ ނިވިދިއްލޭ އައްޔެއް ގެނެސްދޭނެއެވެ. އޭގެ މާނަޔަކީ، ހޫނުޚަބަރެއް ގެނެސްދޭން ތައްޔާރުވަމުންދާ ކަމެވެ.  އައިޓީވީއާއި ސްކައިނިއުސްގެ މުއައްޒަފުން ކޯޑުބަސް ބޭނުންކުރާނެއެވެ. ރައްޔިތުންނާ ހަމަޔަށް އެޚަބަރު ފޯރާއިރު، ރާނީގެ ރަނިކަމާއި ހަޔާތްޕުޅާއި ޚިދުމަތުގެ މައްޗަށް ލިޔެވޭ ވާހަކަތައް ޗާޕްކުރެވި، ނޫސްވިއްކާތަންތަނުގައި ލިބެން ހުންނާނެއެވެ. ރާނީ އަވަހާރަވުމުގެ ޚަބަރު، މުޅިދުނިޔެއަށް ފެތުރިގެންދާކަށް ލަހެއްނުވާނެއެވެ. އެޚަބަރާއެކު، މުޅިދުނިޔެ ހުއްޓުމަކަށް އަންނާނެއެވެ. ކޮމަންވެލްތުގެ ޤައުމުތަކުންވެސް ރަސްމީގޮތުން ހިތާމަފައުޅު ކުރާނެއެވެ.

ކިންގ ޗާލްސް 3

އިނގިރޭސި ރާނީ އަވަހާރަވުމާއެކު، ޕްރިންސް ޗާލްސް ރަސްކަމުގެ ތަޚުތުގައި ވެޑުވޭނެއެވެ. އަމިއްލަފުޅުނަމެއް އިޚްތިޔާރު ކުރެއްވުމުގެ ހުއްދަ، ޕްރިންސް ޗާލްސް އަށް ލިބިވަޑައިގަންނަވާނެއެވެ. އަދި ބެލެވޭގޮތުގައި ޕްރިންސް ޗާލްސްވެވަޑައިގަންނަވާނީ، ކިންގ ޗާލްސް 3 އަށެވެ. ރަސްގެފާނުގެ ނަންފުޅު ކަނޑައެޅުމާބެހޭ ކައުންސިލް އެވަގުތު ބައްދަލުކުރަމުން ގެންދާނެއެވެ. މިކަމާބެހޭ ރަސްމީ މަސައްކަތް ހިނގަމުންދާނީ، ސެންޓް ޖޭމްސް ޕެލަސްގައެވެ. ރާނީއަވަހާރަވާތާ އެއްދުވަހުގެ ތެރޭގައި ޕްރިންސް ޗާލްސް ރަސްކަމަށް އިސްކުރެވެން ޖެހެއެވެ. އެއަށްފަހު، ރަސްމީ މުނާސަބަތެއްގައި، ރަސްގެފާނުގެ އުފަންބޭފުޅުން، ރަސްގެފާނުގެ އަތްޕުޅުގައި ބޮސްދެއްވަން ޖެހިވަޑައިގަންނަވާނެއެވެ. ހުރިހައި ރަސްމިއްޔާތެއް ހިނގަމުންދާނީ، ރާނީ ވަޅުފުޅުލުމުގެ ކުރިންނެވެ. ސްކޮޓްލޭންޑާއި، އުތުރު އަޔަލޭންޑާ އަދި ވޭލްސް އަށް، ޗާލްސް ޒިޔާރަތްކުރައްވާނެއެވެ. ރަސްގެފާނުގެ ޙައިޞިއްޔަތުން، ފުރަތަމަ އިއްވަވާ ބަސްފުޅު، ޗާލްސް އިއްވަވާނީ، ސެންޓް ޖޭމްސް ޕެލަސްގައެވެ.

ރާނީގެ ފިރިކަލުން، ޕްރިންސް ފިލިޕްމިހާރުވަނީ އަވަހާރަ ވެފައެވެ. ޕްރިންސް ފިލިޕް ދުނިޔޭގައި ހުންނެވިނަމަ، ޗާލްސް އަށްފަހު، ރަސްކަން ފުރޮޅިގެންދާނެ ތަރުތީބު ނިންމަވާނީ ޗާލްސް އެވެ. ރަސްކަން ފުރޮޅިގެންދާނީ، ބައްޕާފުޅު ޕްރިންސް ފިލިޕް އަށްތޯ ނުވަތަ، ދޮށީ ދަރިކަލުން ޕްރިންސް ވިލިއަމްއަށްތޯ ނިންމެވުމުގެ އިޚުތިޔާރު ޗާލްސްއަށް ލިބިވަޑައިގެން ވެއެވެ. ރާނީ ވަޅުފުޅު ލުމަށްފަހު، ކިންގް ޗާލްސް 3 ރަސްކަމުގެ ތަޚުތަށް އިސްވުމުގެ އިޙުތިފާލުތައް މަހެއްހައި ދުވަހަށް ދެމިގެންދާނެއެވެ. ފަހުން ނަމަވެސް، ޕްރިންސް އޮފް ވޭލްސްގެ ލަޤަބު، ޕްރިންސް ވިލިއަމްއަށް ބަދަލުވެގެންދާނެއެވެ.

ރާނީ އަވަހާރަވުމަށްފަހު، ވަޅުފުޅުލުމާ ދޭތެރޭ 10 ދުވަސް ވަރުހޭދަވާނެއެވެ. މިމުއްދަތުގައި ރާނީގެ ހަށިކޮޅު ބޭއްވިފައި އޮންނާނީ ބަކިންހަމް ޕެލަސްގައެވެ. ޢާއިލާގެ ހުރިހައިބޭފުޅުން ތިއްބަވާނީ އެކުގައެވެ. އެއަށްފަހު، ރާނީގެ ހަށިކޮޅު ގެންދެވޭނީ ވެސްޓްމިނިސްޓަރ ހޯލަށެވެ. އެތާނގައި ރާނީގެ ހަށިކޮޅު ދުވަސްކޮޅަކަށް ބޭއްވޭނެއެވެ. އެއީ ރައްޔިތުން އައިސް އެކަމަނާއަށް އިޙްތިރާމް އަދާކުރުމަށްޓަކައެވެ. ރާނީގެ މަންމާފުޅު އަވަހާރަވީ 2002 ވަނައަހަރުއެވެ. އެކަމަނާއަށް އިޙްތިރާމް އަދާކުރުމަށްޓަކައި 2 ލައްކަ މީހުން ޒިޔާރަތްކުރިއެވެ. ރާނީގެ ހަށިކޮޅު، ރަސްމީ ޢިއްޒަތުގައި ވަޅުފުޅުލުމަށްޓަކައި، 10 ވަނަދުވަހު، ދެން ގެންދެވޭނީ، ވެސްޓްމިނިސްޓަރ އަބޭ އަށެވެ. ދުނިޔޭގެ އެކި ޤައުމުތަކުގެ ވެރިން، މިރަސްމިއްޔާތުގައި ބައިވެރިވެވަޑައިގަންނަވާނެއެވެ. ރަސްމިއްޔާތު އިންތިޒާމްކުރާނީ، އިނގިރޭސި ސަރުކާރުންނާއި ސިފައިންނެވެ.

ރާނީ ވަޅުފުޅުލާ ދުވަހަކީ، ޤައުމީ ހިތާމައިގެ ދުވަހެއްގެ ގޮތުގައި ފާހަގަކުރެވޭނެއެވެ. ތާޖުގެ ޖަވާހިރުތައް، އެދުވަހުގެ ހެނދުނު ސާފުކުރެވޭނެއެވެ. އެދުވަހުގެ 11 ޖަހާއިރު، ރާނީގެ ހަށިކޮޅު ވެސްޓްމިނިސްޓަރ އަބޭއަށް ގެންދެވުމުގެ ކުރިން، މުޅި ޤައުމުގައި ހަމަހިމޭންކަން ޤާއިމްވާނެއެވެ. ރާނީ އަވަހާރަވީ، އިނގިރޭސިވިލާތުން ބޭރުގައިކަމަށްވަންޏާ އެކަމަނާ ބޭއްވުމަށްޓަކައި، އިނގިރޭސިވިލާތުން، ސަންދޯއްޕުޅެއް ފޮނުވޭނެއެވެ.

ކްއީން އެލިޒަބަތު އިނގިރޭސި ތަޚުތަށް އިސްކުރެވުނީ އެކަމަނާގެ ޢުމުރުފުޅުން 25 އަހަރުފުޅުގައެވެ. ޕްރިންސް ޗާލްސް އަކީ ރާނީ އަވަހާރަވުމުން، އިނގިރޭސި ތަޚުތުގައި ވެޑުވޭނެ ރަސްގެފާނެވެ. ޗާލްސްގެ ޢުމުރުފުޅަކީ، 77 އަހަރެވެ. ޕްރިންސް ޗާލްސްއަކީ، ތަޚުތަށް އެންމެ ގިނަދުވަހު އިންތިޒާރުކުރެއްވި ޕްރިންސެވެ. އަދި ޕްރިންސް ޗާލްސަކީ، އިނގިރޭސި ތަޚުތަށް މިހާތަނަށް އިސްކުރެވޭ ޢުމުރުން އެންމެ ދުވަސްވީ ޕްރިންސެވެ. ރަސްކަމަށް އިސްވެ ވަޑައިގަތުމުން، ޕްރިންސް ޗާލްސްގެ އަނބިކަނބަލުން، ޕަމިލާ ވެގެންދާނީ ކުއީނަށެވެ. ނުވަތަ ރާނީއަށެވެ. ޗާލްސްއާ ކައިވެނިބައްލަވައިގަތުމުން،  ޕަމިލާގެ ލަޤަބަކަށް ވެގެންދާނީ، ޕްރިންސަސް އޮފް ވޭލްސްއެވެ. އެހެންނަމަވެސް، ޕަމިލާވަނީ އެލަޤަބުގެ ބަދަލުގައި އެހެން ލަޤަބެއް ބޭނުންކުރައްވާފައެވެ. އެއީ ޑަޗަސް އޮފް ކޯންވޯލް އެވެ. ޕްރިންސަސް އޮފް ވޭލްސްގެ ލަޤަބު، ޕަމިލާ ބޭނުންނުކުރެއްވީ، އެލަޤަބަކީ، ޗާލްސްގެ ކުރީގެ އަނބިކަނަބަލުން ޑަޔާނާއާ ގުޅިފައިވާ ލަޤަބަކަށްވާތީ ކަމަށްވުމަކީ އެކަށީގެންވާ ކަމެކެވެ.

ޗާލްސް، ރަސްކަމަށް އިސްވެ ވަޑައިގަތުމުން، ދޮށީދަރިކަލުން، ވިލިއަމް ވެގެންދާނީ، ޑިއުކު އޮފް ކޯންވޯލް އަށެވެ. ޗާލްސްއަށްފަހު، އިނގިރޭސި ރަސްކަމަށް އިސްކުރެވިގެންދާނީ ވިލިއަމް އެވެ. އަދި ރަސްކަމަށް ވަޑައިގަތުމަށްޓަކައި، ޗާލްސް ކުރެއްވި އިންތިޒާރުހައި ދިގު އިންތިޒާރެއް، ރަސްކަމަށް ވަޑައިގަތުމަށްޓަކައި ވިލިއަމް އަށް ކުރައްވަން ޖެހިވަޑައިނުގެންފާނެއެވެ. އެއީ، ރަސްކަމަށް އިސްކުރެވޭއިރު، ޗާލްސްއަކީ ޢުމުރުފުޅުން ދޮށީ ބޭފުޅަކަށް ވާތީއެވެ. ވިލިއަމްއަކީ އަދި ހަމަ ޒުވާން ބޭފުޅެކެވެ.