ސުޕްރީމް ކޯޓުގެ ފަނޑިޔާރު ކަމަށް އައްޔަން ކުރުމަށް ޖުޑިޝަލް ސާވިސް ކޮމިޝަންގެ ލަފައަކަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ފޮނުއްވި، ހައިކޯޓުގެ މިހާރުގެ ފަނޑިޔާރު މއ. ވޭސައިޑް އަބްދުއްރައޫފް އިބްރާހީމް ސުޕްރީމް ކޯޓުގެ ފަނޑިޔާރު ކަމަށް އައްޔަން ކުރަން ނުފެންނަ ކަމަށް ޖޭއެސްސީ ން ރައީސުލް ޖުމްހޫރިއްޔާ އަށް ދަންނަވަން ނިންމައިފިއެވެ.
މިކަމާ ބެހޭގޮތުން ޖޭއެސްސީން ނިންމި ނިންމުން ހާމަކޮށް އެކޮމިޝަނުން މިއަދު ނެރުނު ނޫސް ބަޔާނެއްގައި ވަނީ، ރައޫފާ ގުޅޭގޮތުން ތިން ފަރާތަކުން އެ ކޮމިޝަނަށް ޝަކުވާ ހުށަހަޅާފައިވާ ކަމަށެވެ. އަދި ރައޫފް ސުޕްރީމް ކޯޓުގެ ފަނޑިޔާރު ކަމަށް އައްޔަން ކުރުމަކީ ގަބޫލު ކުރެވޭ ކަމެއްނޫންކަމަށް ރައީސަށް މަޝްވަރާ އަރުވަން ކޮމިޝަނުން ނިންނީ، އެ ޝަކުވާތަކާ ގުޅޭ ގޮތުން ބަލަން ޖެހޭ ބެލުންތައް ބެލުމަށްފަހު އިއްޔެ ކަމަށްވެސް ވިދާޅުވެފައި ވެއެވެ.
މީގެ ކުރިން ސުޕްރީމް ކޯޓުގެ ފަނޑިޔާރު ކަމަށް އައްޔަން ކުރުމަށް އެދިވަޑައިގެން ރައީސުލް ޖުމްހޫރިއްޔާ ޖޭއެސްސީއަށް ފޮނުއްވި ކުރީގެ އުއްތަމަ ފަނޑިޔާރު، އަހުމަދު ފާއިޒް ހުސެއިން، ވެސް ސުޕްރީމް ކޯޓުގެ ފަނޑިޔާރު ކަމަށް އައްޔަން ކުރަން ނުފެންނަ ކަމަށް ޖޭއެސްސީން ވަނީ ރައީސަށް ލަފާ އަރުވައިފައެވެ.
ޖޭއެސްސީން ވިދާޅުވީ އުއްތަމަ ފަނޑިޔާރުކަމާއި، ސުޕްރީމް ކޯޓުގެ ފަނޑިޔާރު ކަމުގެ މަގާމުގައި ފާއިޒް ހުންނެވިއިރު، ސުޕްރީމް ކޯޓުން ނިންމި ގާނޫނުތަކާއި ގާނޫނު އަސާސީއާ ޚިލާފު ނިންމުން ތަކުގައި އޭނާ ބައިވެރިވެފައިވާ ކަމަށެވެ.
