އައްޑޫ ސިޓީ ހިތަދޫގައި ސަރުކާރުން ތަރައްގީ ކޮށްފައިވާ "އައްޑޫ އިކުއެޓޯރިއަލް ހޮސްޕިޓަލް" ގައި މިއަދު ދެ ޚިދުމަތެއް ދޭން ފަށައިފިއެވެ.
އައު ހޮސްޕިޓަލުގައި މިއަދުން ފެށިގެން ދޭން ފެށި ޚިދުމަތަކީ އީއެންޓީއާއި، ދަތުރގެ ފަރުވާގެ ޚިދުމަތެވެ. މިއީ ކުރިން ހިތަދޫ ރީޖަނަލް ހޮސްޕިޓަލް (އެޗުއާރުއެޗު) ގައި ދެމުން ގެންދެވި ދެ ޚިދުމަތެވެ. އެ ދެ ޚިދުމަތް މިހާރުވަނީ އައު ހޮސްޕިޓަލަށް ބަދަލުކޮށްފައެވެ. މިއަދުން ފެށިގެން އެދެ ޚިދުމަތް ލިބޭނީ އިކުއެޓޯރިއަލް ހޮސްޕިޓަލުންނެވެ.
މިއީ އެޗުއާރުއެޗުގެ ޚިދުމަތްތައް އައު ހޮސްޕިޓަލަށް ބަދަލު ކުރުމުގެ ފެށުމެވެ. އެހެން ޚިދުމަތްތައް ވެސް މަޑުމަޑުން އައު ހޮސްޕިޓަލަށް ބަދަލުކުރައްވަމުން ގެންދަވާނެ ކަމަށް އެތަނުން ވަނީ ވިދާޅުވެފައެވެ. އެގޮތަށް ބަދަލު ކުރައްވާނީ ޚިދުމަތް މެދުނުކެނޑި ދެވޭނެ އިންތިޒާމެއްގެ ދަށުން ކަމަށް އިކުއެޓޯރިއަލް ހޮސްޕިޓަލުން ވަނީ ވިދާޅުވެފައެވެ.
މި ދެ ޚިދުމަތް މިއަދުން ފެށިގެން އައު ހޮސްޕިޓަލުން ދޭން ފެއްޓެވިޔަސް އަދި އެ ހޮސްޕިޓަލް ރަސްމީކޮށް ނުއެއް ހުޅުވައެވެ. ހޮސްޕިޓަލް ހުޅުވާނެ ތާރީޚެއް ވެސް މިހާރު ކަނޑައެޅިފައެއް ނުވެއެވެ.
