ހިތަދޫގައި އަލަށް ގާއިމްކުރި ޓާޝަރީ ފެންވަރުގެ ހޮސްޕިޓަލް، އައްޑޫ އީކުއެޓޯރިއަލް ހޮސްޕިޓަލް (އޭ.އީ.އެޗް) ގައި ސްޕީޗް ތެރެޕީގެ ހިދުމަތް ދޭން މިއަދު ފަށައިފި ކަމަށް އެހޮސްޕިޓަލުން ވިދާޅުވެއްޖެއެވެ.
މި ޚިދުމަތް ދިނުމަށްޓަކައި އެކަމަށް ޚާއްސަ މުވައްޒަފުން ވަނީ ތައްޔާރުކޮށްފައެވެ. އެ ފުޅުންގެ ބެއްލެވުމުގެ ދަށުން އެޚިދުމަތް ފުޅާކުރެވެމުންދާނެ ކަމަށް މައުލޫމާތު ލިބިފައިވެއެވެ. މި ޚިދުމަތް ފަށާނެ ކަމަށް އެ ހޮސްޕިޓަލުން އިއުލާން ކުރެއްވީ ހުސްވި ހަފްތާގައެވެ. މިއީ މާލޭ ސަރަހައްދު ފިޔަވައި އެހެން ސަރަހައްދެއްގައި ސަރުކާރުން ސިއްހީ ހިދުމަތްފޯރުކޮށްދޭ ހޮސްޕިޓަލެއްގައި މި ހިދުމަތް ދޭން ފެށި ފުރަތަމަ ފަހަރެވެ.
ސްޕީޗް ތެރަޕީގެ ހިދުމަތަކީ ވާހަކަ ދެއްކުމުގައި ދަތިތަކެއް ހުންނަ ފަރާތްތަކަށް ދެވޭ ހާއްސަ ޚިދުމަތެކެވެ. ހާއްސަކޮށް އޯޓިޒަމް އާއި އެޓެންޝަން ޑެފިސިޓް ހައިޕަރއެކްޓިވިޓީ ޑިސްއޯރޑަރ ( އޭ.ޑީ.އެޗް.ޑީ) ހުންނަ ފަރާތްތަކުގެ ކިބައިގައި މިފަދަ މައްސަލަ ހުރެއެވެ. އޭއީއެޗްގައި މިޚިދުމަތް ދޭން ފެށިގެން ދިއުމަކީ މިސަރަހައްދުގެ ދިރިއުޅެމުންދާ މިފަދަ ފަރާތްތަކަށް ފަރުވާހޯދުމަށް މިހާރު އުފުލަމުންދާ ތަކުލީފް ބޮޑުތަނުން ކުޑަވެގެންދާނެ ކަމެއްކަމަށް އެ ހޮސްޕިޓަލުން ވިދާޅުވިއެވެ. ދިވެހިރާއްޖޭގެ ކުޑަކުދިންގެ އާބާދީގައި މިފަރުވާ ބޭނުންވާ ކުދިން ގިނަކަން ވަނީ ފާހަގަވެފައެވެ.
