ރަޝިޔާ އަދި ޗައިނާއިން އެމެރިކާއަށް އެއްބާރުލުން ދެމުންގެންދާނަމަ އެދެގައުމާއެކު މަސައްކަތް ކުރައްވަންތައްޔާރަށް ހުންނެވި ކަމަށް އެމެރިކާގެރައިސްކަމަށް އިންތިޚާބް ވެވަޑައިގެންފައިވާ ޑޮނަލްޑް ޓްރަމްޕް ވިދާޅުވެއްޖެއެވެ. ވޯލް ސްޓްރީޓް ޖަރނަލް އަށް ދެއްވި އިންޓަރވިއުއެއްގައި ޓްރަމްޕް ވިދާޅުވީ ރަޝިޔާއާ ދެކޮޅަށް އަޅާފައިވާ ދަތިކުރުމުގެ ފިޔަވަޅު ކޮންމެވެސް މުއްދަތަކަށް އެގޮތުގައި ދެމެހެއްޓޭނެކަމަށާ ނަމަވެސް އެއަށްފަހު ދަތިކުރުމުގެ ފިޔަވަޅު ވީއްލިދާނެކަމަށެވެ. މީގެ އިތުރުން ޓްރަމްޕް ވިދާޅުވީ ތައިވާން އަށް ވަކި ގައުމެއްގެ ހައިސއްޔަތު ލިބިނުދޭ ، "އެއް ޗައިނާ ޕޮލިސީ" އާ މެދު މަޝްވަރާތައް ކުރިޔަށް ގެންދިއުމުގެ މަގު ހުޅުވާލެވިފައިވާކަމުގައެވެ. އިންޓަރވިއުގައި އިތުރަށް ވާހަކަފުޅު ދައްކަވަމުން ޓްރަމްޕް ވިދާޅުވީ މުސްލިމުންގެ ހަރުކަށި ފަރާތްތަކާދެކޮޅަށް ވޮޝިންގޓަނުން ކުރަމުންގެންދާ ހަގުރާމައިގައި ރަޝިޔާއިން އެހީތެރިވެދީފިނަމަ، ދަތިކުރުމުގެ ފިޔަވަޅު ވީއްލުމަށް ބާރަކަށް ވާނެކަމުގައެވެ. އަދި ދާދިއަވަހަށް ރައިސް ޕޫޓިންއާކު ބައްދަލް ވުމެއް ބޭއްވުމަށް އުންމީދު ކުރައްވާކަމަށްވެސް ޓްރަމްޕް ވިދާޅުވެފައިވެއެވެ.
ޗައިނާއާއެކު އޮތް ގުޅުންތަކާބެހޭގޮތުން ޑޮނަލްޑް ޓްރަމްޕް ވިދާޅުވީ ވިޔަފާރީގައި އެމެރިކާގެ ކުންފުނިތަކަށް ވާދަކުރުމުގެ ފުރުސަތު ޗައިނާއިން ދޭންޖެހޭ ކަމަށާ މިގޮތުން ޗައިނާގެ ފައިސާ "ފްލޯޓް" ކުރުން މުހިންމު ކަމަށެވެ.
އަނެއްކޮޅުން ޚަބަރުލިބޭގޮތުގައި އެމެރިކާގެ ރިޔާސީ އިންތިޚާބް ޓްރަމްޕް އަށް ކާމިޔާބުކޮށް ދިމުމަށް ރަޝިޔާއިން ކަންތައްތަކެއް ކުރިކަމަށް ލިބޭ ރިޕޯޓްތައް ތަހުގީގުކުރުމަށް ސެނެޓްގެ ޚާއްސަ ކޮމިޓީއެއް އެކުލަވާލާ މަސައްކަތް ފެށުމަށް ތައްޔާރުވަމުންދާކަމަށް ޚަބަރުލިބެއެވެ. މިކޮމިޓީގައި ރިޕަބްލިކަން އަދި ޑިމޮކްރެޓެކް ޕާޓީގެ މެމްބަރުން ހިމެނިވަޑައިގަންނަވައެވެ. / ބީބީސީ
