(13 ސެޕްޓެންބަރު 2019ގައި ޝާއިޢުކުރި ބަޔާ ގުޅޭ)
އާކިފާ އެކު ސާލާރް ދިޔައެވެ. މިކަހަލަ ތަނަކަށް އޭނާ އެންމެ ފަހުން ދިޔަ ދުވަސް ރަނގަޅަށް ހަނދާން އެބަހުއްޓެވެ. އެރެއެކޭ އެއްފަދައިން ރަހުމެއް ނެތި މިހާރުވެސް އިންސާނުންގެ މަސް ވިއްކަނީއެވެ.
އެތަނަށް އޭނާ އެންމެ ފުރަތަމަ އައި ދުވަސް ވެސް އިއްޔެހެން ހަނދާން އެބަހުއްޓެވެ. ރެޑްލައިޓު އޭރިއާގައި އުޅޭ މީހުންގެ ވަޒީފާ އަކީ ހަށި ވިއްކުމެވެ. ހިލޭ ފިރިހެނަކަށް އެމީހެއްގެ ގައިގައި އަތްނުލެވޭނެ ކަމަށް އޭނާ ހީކުރި މީހާ ވެސް މިހާރުވީ މި ބާޒާރުގައެވެ. ސާލާރަށް އެވާހަކަ އެއްވެސް މީހެއް ގާތު ނުބުނެވޭނެއެވެ. އެ އަންހެން ކުއްޖާގެ މަންޒިލަކަށް މިތަންވީ ކިިހިނެއް ހެއްޔެވެ؟ ސާލާރް ތުންފަތުގައި ދަތް އަޅައިލިއެވެ. އޭނާގެ ތުންފަތްވެސް ތުރުތުރު އަޅައެވެ. މި ބާޒާރުގައި ތިމަންނާ ދަންނަ އަންހެނަކު ނުވަތަ ތިމަންނާގެ އާއިލާ އަށް ނިސްބަތްވާ އަންހެނަކުވެސް ނޫޅެއޭ ބުނަން ކެރޭނީ ކިތައް ފިިރިހެނުންނަށް ހެއްޔެވެ؟
ސާލާރް އަކަށް ބުނާނެ އެއްޗެއް ނޭނގެއެވެ. އިމާމާ ހާޝިމް އަކީ އޭނާގެ އަނބިމީހާއެވެ. އިމާމާ އޭނާއާ އިނެވެ. އޭނާއަކީ ގަދަރުވެރި އާއިލާއެއްގެ ކުއްޖެކެވެ. މިކަހަލަ ތަނަކާއި އޭނާޔާ އެއްވެސް ގުޅުމެއް ނެތެވެ.
"އަހަންނާއެކު އާދޭ. އެކި އުމުރުގެ އަންހެނުން އެބަތިބި، އަހަރެންގެ ބެލުމުގެ ދަށުގައި، މި ބާޒާރުން ލިބޭނެ އެންމެ ރަނގަޅު ކުދިން. އަގުވެސް މާ ބޮޑެއް ނުވާނެ." ފިރިހެނަކު އޭނާއާ އެކު ކުރިއަށް ދާން ފެށިއެވެ. "އަހަރެން މިތަނަށް އައީ އަންހެނުން ހޯދާކަށް ނޫން." ސާލާރް މަޑުމަޑުން ބުނެލިއެވެ.
"ބޯނެ އެއްޗެއް ބޭނުންތަ؟ ނުވަތަ މަސްތުވާ އެއްޗެއް ބޭނުންތަ؟ ބޭނުން ކޮންމެ އެއްޗެއް ދީފާނަން." އާކިފް އެމީހާގެ ކުރިމަތީގައި ހުއްޓުނެވެ. "އެއްޗެއް ބޭނުމެއް ނޫނޭ ބުނި އަޑު ނީވޭތަ؟" އެމީހާ އެތާ މަޑުކުރިއެވެ.
ސާލާރް މަޑުމަޑުން ކުރިއަށް ދިޔައެވެ. އޭނާގެ ސިކުނޑީގައި ތޫފާނެއް އުފެދުނެވެ. އިމާމާ މިތަނަށް އައީ ކިހިނެއް، ކޮން އިރަކު، ކީއްކުރަން ހެއްޔެވެ؟ އޭނާގެ ސިކުނޑީގައި މާޒީ ނިއުޅެވެން ފެށިއެވެ.
"ހެޔޮނުވާނެ، އަދި އެއްފަހަރު އޭނާ އާ ބައްދަލުކުރަން ގޮސްދީ. އަހަރެންގެ ހުރިހާ ވާހަކައެއް ކިޔާދީ، ބުނޭ އަހަންނާ އިންނާށޭ. އަހަރެން އޭނާގެ އަތުން އެއްވެސް އެއްޗެއް ބޭނުމެއް ނޫން. ﷲގެ ނަބިއްޔާއަށްޓަކައި ގޮސް މި ވާހަކަތައް ބުނެދީ، އޭނާ ދެކޮޅެއް ނަހަދާނެ. ރަސޫލާ ދެކެ އޭނާ ވަރަށް ލޯބިވޭ." އޭނާއަށް އިމާމާގެ އަޑު އިވުނީ މީގެ އެތައް އަހަރެއް ކުރިންނެވެ. ފޯނުކޮށްގެން އޭނާއަށް އާދޭސްކުރިއެވެ.
"އިމާމާ އާ އޮތީ ކޮން ގުޅުމެއް؟" ޖަލާލް ޝައުގުވެރިވިއެވެ.
"އިމާމާ... އިމާމާ އާ އަހަންނަކީ ދުވަސްވީ، ގާތް ދެ އެކުވެރީން." ޖަލާލް އިރުކޮޅަކު ވިސްނަން އިނެވެ. ޖަލާލް ވިސްނަނީ އޭނާ އާ އިމާމާ އާ މެދު ކަން އޭނާއަށް އެނގެއެވެ.
"ވަރަށް ސާފުކޮށް ބުނެދީ އަހަރެން އޭނަޔާ ނީންނާނަމޭ."
ޖަލާލްގެ މެސެޖު ދިނުމުން އިމާމާގެ މޫނަށް އަންނަ ކުލަވަރު ބަލަން އޭނާ ބޭނުންވިއެވެ. އޭނާ އިމާމާ އަށް ގުޅާފައި ޖަލާލްގެ މެސެޖު ދިނެވެ.
"އަހަންނަށްޓަކައި ވަރަަށް ގިނަ ކަންތައް ކޮށްދީފި، އަދި އެއް ކަމެއް ކޮށްދީ. އަހަރެން ވަރިކުރޭ." އިމާމާ ފޯނުން އޭނާއަށް އާދޭސް ކުރިއެވެ.
"ބުނާ ކަންތައް ކޮށްދީދީ މިހާރު އަހަރެން ވަރުބަލިވެއްޖެ. އިތުރަށް އެއްވެސް ކަމެއް ނުކޮށްދެވޭނެ. ތިބުނި ކަންތައް، ތީ އަމުދުން ވާން ނެތް ކަމެއް." ސާލާރް ބުންޏެވެ. "ވަރި އަށް އެދެންޏާ ކޯޓަށް ގޮސް ވަރި ނަގާ، އަހަރެން އިމާމާ ވަރިއެއް ނުކުރާނާން."
ސާލާރް ވަރަށް ބޮޑަށް ނޭވާ ހާސްވާން ފެށިއެވެ.
"އާނ، އަހަރެން އެ ހުރިހާ ކަމެއް ކުރިން. އެކަމަކު ޖަލާލް އާއެކު އޭނަ އުޅުނު ޚިޔާލީ ދުނިޔެއިން ނެރެދޭން އަހަރެން މަސައްކަތް ކުރީ. އަހަރެން އޭނައަށް ހުރިހާ ވާހަކައެއް ކިޔާދިނިން. އެއްވެސް ވާހަކައެއް ނުފޮރުވަން. އެއީ އަހަރެން ކުރި ސަމާސައެއް. އިމާމާއަށް ދެރަގޮތެއް ވާކަށް އަަހަރެން ނޭދެން." އޭނާ އަމިއްލަ ނަފްސު ހިތްހަމަޖައްސައިދެވޭތޯ މަސައްކަތް ކުރިއެވެ. "އިމާމާ އާ ދޭތެރޭ އަހަރެން ކަންތައް ކުރީ ވަރަށް އިހާނެތިކޮށް. ވަރިއަށް އެދުނީމަ އަހަރެން އެކަމަށް ދިނީ ބީރު ކަންފަތެއް. އެކަމަކު މި ބަޒާރުގައި އޭނާ ހަށިވިއްކަން އުޅޭކަށް އަހަރެން އޭރުވެސް ނޭދެން."
"މައިންބަފައިން ދޫކޮށްފަ ދާން އެހީތެރިވެދިނީ އަހަރެން. އެކަމަކު އަހަރެން އޭނާ މިތަނަކަށް ނުގެންނަން. އެއްވެސް މީހަކަށް އަހަރެންގެ ބޮލުގައި އެކަމުގެ ޒިއްމާ ނޭޅުވޭނެ."
އިމާމާ އެތާ އިންނާކަށް އޭނާ އެއްގޮތަކަށް ވެސް ނޭދެއެވެ. މައިގްރެއިން އެޓޭކެއް އަންނަހެން ހީވިއެވެ. ނިތްކުރީގައި ދެއަތުން ބާރަށް ފިރުމައިލިއެވެ. އިރުކޮޅަކުން ތަދު މަޑުވެއްޖެއެވެ. ލޯމަތި ހުރީ އަދިވެސް ފުސްވެފައެވެ. ކުރިމަތީގައި އޮތް މަގުވެސް ރަނގަޅަކަށް ނުފެނެއެވެ. ގައިމުވެސް އެމަގަކީ އިމާމާ އާއި އޭނާއަށް އަނދިރި މަގެކެެވެ. އޭނާ ހިނގަން ފެށިއެވެ. ތަންކޮޅެއް ދުރުގައި ހުރި އުސް އިމާރާތެެއްގެ ކައިރީގައި އާކިފް ހުއްޓިލައިގެން ހުއްޓެވެ.
"މީ އެ ގެއަކީ." ސާލާރްގެ މޫނުމަތިން ކުލަވަރު މުޅިން ބަދަލުވިއެވެ.
"އަހަރެމެން ދާން ޖެހޭނީ އެންމެ މަތީ ފަންގިފިލައަށް، ސަނޫބާ އުޅޭނީ އެތާ." އެހެން ބުނެފައި ހަނިހަނި ސިޑިއަކުން އަރަން ފެށިއެވެ. ފުރަތަމަ ހަރުފަތުން ސާލާރް އަރިއަޅާލިއެވެ. އާކިފް އެނބުރި ބަލާލާފައި ބުންޏެވެ.
"މީ ވަރަށް ވަރުދެރަ ސިޑިއެއް، ބަލައިގެން އަރައްޗޭ. ބޮތްކެއް ހައި ހިސާބުވެސް ނެތް ވިއްޔާ." ސާލާރް ތެދުވެފައި ފާރުގައި އަތް ހާކަމުން މައްޗަށް އެރިއެވެ. ހުޅުވާފައި ހުރި ދޮރެއްގެ ދޭތެރެއިން ފަނޑު އަލިކަމެއް ތަނަށް ވެރިވެފައި އޮތެވެ. އާކިފް ފެންނާކަށް ނެތެވެ. އޭނާ އެ ދޮރުން އެތެރެއަށް ވަނީކަން ކަށަވަރެވެ. ސާލާރް ވެސް ވަދެގެން ދިޔައެވެ. އޭނާއަށް ނުކުމެވުނީ ބެލްކަނީއަކަށެވެ. ބެލްކަނީގައި އެއްވެސް މީހަކު ނެތެވެ. އެތަނުގައި ހުރި ހުރިހާ ކޮޓަރިއެއްގެ ދޮރު ހުރި ލައްޕައިފައެވެ. އާކިފް ވީ އެތަނުން ކޮން ކޮޓަރިއެއްގައި ކަން އޭނާއަކަށް ނޭނގެއެވެ. އެތަން ހީވަނި ފަޅު ގޯއްޗެއްހެންނެވެ. އޭނާއަށް ހީވަނީ ކޮންމެ އިރަކުވެސް އެތަނުން ދޮރެއް ހުޅުވާލާފައި އިމާމާ ހާޝިމް އަތުވެދާނެހެންނެވެ.
"ޔާ ﷲ! އަހަރެން އިމާމާ އާ ކުރިމަތިލާނީ ކިހިނެއްހެއްޔެވެ؟" އެހެން ހިތަށް އެރުމުން ސާލާރްގެ ހިތަށް އުނދަގޫ ވިއެވެ.
އޭނާ ލައްޕައިފައި ހުރި ދޮރުތައް ކައިރިން ކުރިޔަށް ދިޔައެވެ. ވެރެންޑާގެ އެންމެ ކޮޅަށް ހުރި ދޮރުން އާކިފް ނިކުތެވެ. "ކޮންތާކުން ތި އައީ؟" އޭނާ ބާރަށް ބުންޏެވެ. "އާދެބަލަ."
ސާލާރް އޭނާގެ ކައިރިއަށް ދާން ހިނގައިގަތެވެ. ހިތުގެ ހިނގުން އަވަސްވިއެވެ. ހިތް ތެޅޭ އަޑު އޭނާއަށް އިވެއެވެ. އޭނާ ލޯ މަރައިލިއެވެ. އަދި ފިނިވެފައިވާ ދެއަތް މުށްކަވައިގެން ހުރެ އެ ކޮޓަރިއަށް ވަނެވެ. އާކިފް އެތަނުގައި ހުރި ގޮނޑިއެއްގައި އިށީނދެލައިގެން އިނދެ ބޯ އޮމާންކުރަން ހުރި އަންހެން ކުއްޖަކާ ވާހަކަ ދައްކަނީއެވެ.
"މީ އިމާމާ އެއް ނޫން!" އޭނާ ބުންޏެވެ.
"އާނ، މީ އިމާމާ އެއް ނޫން، އޭނާ ވެއްޖެ އެތެރޭގަ، އާދޭ." ގޮނޑިން ތެދުވެފައި އެހެން ކޮޓަރިއެއްގެ ދޮރު ހުޅުވައިލިއެވެ. ސާލާރް އޭނާގެ ފަހަތުން ދިޔައެވެ. އަނެއްކާވެސް އެތެރެއިން ދޮރެއް ހުޅުވާލާފައި ވަނެވެ.
"ސަނޫބާ!" އާކިފް ތަންކޮޅެއް ދުރުން ގޮވާ އަޑު އޭނާއަށް އިވެއެވެ. އޭނާގެ މޭގަނޑު އަނގަޔަށް އައެވެ. އޭނާ ބޭނުންވީ އެތަނުން ދުރަށް ދުއްވައިގަންނާށެވެ. ސާލާރް ދޮރު މަތީގައި ހުއްޓުނެވެ.
"ވަދޭ އެތެރެއަށް." އާކިފް ބުންޏެވެ. އާކިފް ހުރީ އަންހެން ކުއްޖަކާ ވާހަކަ ދައްކާށެވެ. ސާލާރްގެ ތަލިން ކުޅު ހިކިއްޖެއެވެ. އާކިފަށް އޭނާ އަންނަ އަޑު އިވުމުން އެ އަންހެން ކުއްޖާގެ ކުރިމަތިން އެއްފަރާތަށް ޖެހިލިއެވެ. އެކުއްޖާ ހުރީ ކޮޓަރީގެ އެންމެ ކޮޅުގައެވެ.
"މީ ސަނޫބާ." އާކިފް އޭނާއަށް ސަނޫބާ ތައާރަފްކޮށްދިނެވެ. ސާލާރް ކަޅިޖަހާ ނުލައި އެ ކުއްޖާއަށް ބަލަން ފެށިއެވެ. އެ ކުއްޖާވެސް ސާލާރަށް ބަލަނީއެވެ.
"އިމާމާ؟" އޭނާ ހުރީ އަދިވެސް އެކުއްޖާއަށް ބަލަހައްޓައިގެންނެެވެ.
"އާނ، ތީ އިމާމާ." އާކިފް ބުންޏެވެ.
ސާލާރް ކަކޫ މައްޗަށް ތިރިވިއެވެ. އާކިފް ހައިރާންވިއެވެ. "ކިހިނެއްވީ؟" ސާލާރް އޮތީ ދެއަތުން ބޮލުގައި ހިފަހައްޓައިގެން ބިން މަތީގައެވެ. ކަސްބީ އަންހެނެއްގެ ކުރިމަތިގީގައި ސަޖިދައަށް ތިރިވީ ހަމައެކަނި ފިރިހެނަކީ އޭނާއެވެ. އާކިފް ވާނުވާ ނޭނގިފައި އޭނާގެ ކޮނޑުގައި މަޑުމަޑުން އަތުން ޖެހިއެވެ. ސާލާރް ކުޑަކުއްޖެއްހެން ރޮނީއެވެ.
"ފެން... ފެން... ފެން ގެންނަންތަ؟" ސަނޫބާ ހުރީ ހާސްވެފައެވެ. އެނދުގެ އެއް އަރިމަތީގައި ހުރި މޭޒުމަތީގައި ފެން ޖަގެއް ހުއްޓެވެ. އޭނާ އެ ޖަގުން ފެން ތަށްޓެއް އަޅައިގެން އައިސް ސާލާރްގެ ކައިރީ ބިންމަތީގައި އިށީނދެއްޖެއެވެ.
"ސާލާރް ސާހިބް! ފެން ފޮދެއް ބޯލަބަލަ."
ސާލާރް ކުއްލިއަކަށް ތެދުވެ ބިންމަތީގައި އިށީނެވެ. އޭނާގެ މޫނު ހުރީ ކަރުނައިން ތެމި ފޯވެފައެވެ. އަނގައިން ވެސް ނުބުނެ ވޮލެޓުގައި ހުރި ނޫޓުތައް ނަގައި ސަނޫބާގެ ކުރިމަތީގައި އަތުރަމުން ދިޔައެވެ. އިރުކޮޅަކުން އޭނާގެ ވޮލެޓު ހުސްވެއްޖެއެެވެ. ދެން ތެދުވެ، ދުމެއް ޖަހާފައި ކޮޓަރިން ނުކުންނަން ދިޔައެވެ. ދޮރާއި ހަމަޔަށް ދެވުނުތަނާ އަނެއްކާ އަރި އަޅައިލިއެވެ. އާކިފް ހުރީ ވާނުވާ ނޭނގިފައެވެ.
"ސާލާރް! ސާލާރް! ކިހިނެއްވީ؟ ކޮންތާކަށް ތި ދަނީ؟" އޭނާ ސާލާރްގެ ކޮނޑުގައި ހިފަހައްޓަން މަސައްކަތް ކުރިއެވެ. ސާލާރް އޭނާ ފޮޅުވައިލިއެވެ.
"ދޫކުރޭ، އަހަރެންގެ ގައިގައި އަތްނުލާތި! ދޫކުރޭ!" އޭނާ ބާރަށް ރޮމުން ހަޅޭއްލަވައިގަތެވެ.
"އިމާމާ އާ ބައްދަލުކުރާކަށް ނޫންތަ އައީ؟" އާކިފް ބެލީ ސާލާރަށް ހަނދާންކޮށްދެވޭތޯ އެވެ.
"އެއީ އިމާމާ އެއް ނޫން، އިމާމާ ހާޝިމެއް ނޫން!"
"އެންމެ ރަނގަޅު، އެކަމަކު ދާންވާނީ އަހަންނާ އެކު."
"އަހަރެން އެކަނި ހިނގައިދާނަން. މީހެއްގެ އެހީ އެއް ބޭނުމެއް ނޫން." އޭނާ އެތަނުން ނުކުމެގެން ދިޔައެވެ. އާކިފް ސަނޫބާއާ ދިމާއަށް އެނބުރުނެވެ. ސަނޫބާ ދެ ލޯ މުދުނަށް އަރުވައިގެން އޭނާގެ ކުރިމަތީގައި އަތުރާފައި ހުރި ނޫޓުތަކަށް ބަލަހައްޓައިގެން އިނެވެ.
***
ސިޑިބަރި އަދިވެސް އޮތީ އަނދިރިކޮށެވެ. މިވަގުތު ނަފްސާނީ ހާލަތު ހުރި ގޮތުން ސިޑިން ފައިބާކަށް ފާރުގެ އެހީއެއް ނުވަތަ އަލިކަމެއް ބޭނުމެއް ނުވެއެވެ. ދުވެފައި ކަހަލަ ގޮތަކަށް ސިޑީން ފައިބަނިކޮށް އޭނާ ވެއްޓުނެވެ. އެ ސިޑިއަކީ ސީދަލަށް ހުރި ސިޑިއެއް ނަމަ އޭނާ ވެއްޓޭނީ ސިޑިބަރީގެ އެންމެ ތިރިއަށެވެ. ނަމަވެސް ސިޑި ހުރި ގޮތުން އޭނާ ގޮސް ވަކި ހިސާބެއްގައި ހަރުލައިފިއެވެ. ފަޔާއި ކުޑަހުޅަށް އަނިޔާވިއެވެ. އެހެންނަމަވެސް ތެދުވެ ތިރިއަށް ދާން މަސައްކަތް ކުރިއެވެ. އަރިއަޅާލައިގެން ގޮސް ބިން މައްޗަށް ވެއްޓުނު ވަގުތު ފާރުގައި ބޯ ޖެހި ބޮލަށް އަނިޔާވިއެވެ. ގައިން ތަނެއް ބިންދައިގެން ނުދިޔަ ނަމަވެސް ގައިގެ އެކި ތަންތަނަށް އެކިވަރުގެ އަނިޔާ ވިއެވެ. ބިން މަތީގައި އޮތް އިރު ކުރިމަތީގަިއ އޮތް މަގުގައި ހުރި މަގު ބައްތިތައް ފެނެއެވެ. ތެދުވެގެން ކުރިއަށް ދާން އުޅުނު ނަމަވެސް ކުރިއަކަށް ނުދެވުނެވެ. ދެތިން ފިޔަވަޅެއް އަޅާފައި އެ ގޭގެ ބޭރުގައި ހުރި ފާރުބުރިއެއްގެ މަތީ އޭނާ އިށީނެވެ. ބޮލަށް އެނބުރުން އަރާގޮތްވެ ހޮޑު ލެވޭހެން ހީވިއެވެ. އެވަގުތު ގުދުވެލާފައި ހޮޑު ލަމުން ރޮމުން ގެންދިޔައެވެ. އެމަގުން ހިނގާފައި ދާ މީހުންނަށް މިއީ އާ ކަމަކަށް ނުވިއެވެ. އެއީ ރަލުގެ ސަބަބުން ނުވަތަ މަސްތުވާ ތަކެތީން އަމަލުވެގެން ނުކުންނަ މީހުން އުޅޭ ހާލެވެ. ކިރިޔާވެސް ބައެއްގެ އިހްތިރާމް ލިބޭނީ އޭނާ އަޅައިގެން ހުރި ހެދުމަށެވެ. ހޮޑާއި ރުއިމުން ދޭހަވަނީ އެގެއިން އޭނާއަށް ބޭނުންވާ ޚިދުމަތުން މަހްރޫމު ވުމެވެ. އެތަނަކީ ބޮޑެތި ވިޔަފާރި ވެރިންނާއި މުއްސަނދިން ރޮއި ނަގަން ތިބޭ ތަނެކެވެ. އެ ތަނަކީ ހުރިހާ އެންމެންގެ ހިތަށް އުފާވެރިކަން ލިބޭ ތަނެއް ނޫނެވެ. މަގުމަތިން ހިނގާފައި ދިޔަ އެކަކުވެސް އޭނާގެ ހާލު އަހައެއް ނުލައެވެ. ހާލުއަހުވާލު ބެލުމަކީ މި ބާޒާރުގައި އޮންނަ އާދައެއް ނޫނެވެ. އާކިފް އަދިވެސް ތިރިއަކަށް ނުފައިބައެވެ. އޭނާ އައި ނަމަ އެތަނަށް މަޑުކުރީހެވެ. އެތާކު އިމާމާ ހާޝިމެއް ނެތެވެ. ސަނޫބާ އަކީ އިމާމާ ހާޝިމެއް ނޫނެވެ. އޭނާގެ ބޮލުން ބޮޑު ބުރައެއް އުފުލުނު ފަދައެވެ. ހޮޑުލައި ރޮއި އެހަދަނީ އެތަނުން އިމާމާ ނުފެނުމުންނެވެ. އިމާމާ އެތަނުން ފެނުނު ނަމަ އޭނާގެ ހާލަކީ ކޮބާ ހެއްޔެވެ؟ އޭނާ ބިރުވެތިވަނީ ﷲ އަށެވެ. ﷲ ކިހައި އޯގާތެރި ހެއްޔެވެ؟ އިންސާނާއަށް އެކަލާނގެ ނުދެއްވަނީ ކޮން ނިއުމަތެއް ހެއްޔެވެ؟ އިންސާނާގެ ހިތުގައި އެކަލާނގެ އިންސާނިއްޔަތުކަން އަށަގަންނުވަނީ އެކި ގޮތްގޮތަށެވެ.
ހަޔާތުގައި ހޭދަވި ކަޅު އަނދިރި ފަތިފުށާ މެދު މިހާރު އެ ކުރެވޭ އިހުސާސެއް މީގެ ކުރިން ދުވަހަކުވެސް އޭނާއަކަށް ނުކުރެވެއެވެ. "އަހަރެން ކުރިން މިތަނަށް އައީ ކީއްކުރަން ހެއްޔެވެ؟ ފައިސާ ދީފައި ނިކަމެތި އަންހެނުންގެ ފަރާތުން އުފާ ހޯދީ ކީއްކުރަން ހެއްޔެވެ؟ އެކުރަނީ ފާފައެއްކަން ބުނެދީ ހޭލުންތެރިކުރަން މަސައްކަތް ނުކުރީ ކީއްވެހެއްޔެވެ؟" ބޮލުގައި ދެ އަތުން ހިފަހައްޓައިގެން މަގުގެ އެއްފަރާތުގައި އިށީނދެ އިނދެ ބާރަށް ރޮމުން ގެންދިިޔައެވެ. "އެ ހުރިހާ ފާފައަކުން ދުރުވެ ކުރިން އަހަރެންގެ ހިތުގައި ނާޅާ ވޭނެއް މިހާރު އަޅަނީ ކީއްވެގެން ހެއްޔެވެ؟ މީގެ ކުރިން އެ ތަދު އިހުސާސް ނުކުރެވުނީ ކީއްވެގެން ހެއްްޔެވެ؟ އެ ހުރިހާ ސުވާލެއްގެ ޖަވާބު މި އަޅާއަށް އެނގެއެވެ. ހައްދަވާ ގެންގުޅުއްވާ އިލާހު، މި އަޅާ އަށް މިތަނުގައި ޖަވާބުދޭން ނުޖައްސަވާށެވެ. އަދި މިއަޅާ ލޯބިވާ އަންހެން މީހާ މި ބާޒާރުން ސަލާމަތް ކުރައްވާނދޭވެ."
ސާލާރް ރުއިން ހުއްޓާލައިފިއެވެ. ލޯބީގެ ވާހަކަ ހިތަށް އެރުމުން ލޯބިވީ ކިހިނެއް، ކޮން އިރަކުތޯ އޭނާގެ ހިތަށް އެރިއެވެ.
"ލޯބި؟" ސާލާރަށް ވައި އަޑުން ބުނެވުނެވެ. "އޭނާ ދެކެ އަހަރެން ލޯބިވޭތަ؟" ސާލާރް ތުރުތުރު އަޅައެވެ. "އަހަންނަށް އިހުސާސް މިކުރެވޭ ކެކުޅުމަކީ ލޯބީގެ ސަބަބުން ކުރެވެޭ އިހުސާސެެއް ހެއްޔެވެ؟ އަހަރެން މި ދުވަނީ ލޯބީގެ ފަހަތުން ހެއްޔެވެ؟" އޭނާ އިނީ ހަރަކާތް ހުއްޓިފައެވެ. "އިމާމާ އަކީ އަހަރެންގެ ހިތަށް ހެރިފައި އިން ކަށްޓެއް ހެއްޔެވެ؟ ނުވަތަ އަހަރެން އެންމެ ހިތް އެދޭ ކުއްޖާ ހެއްޔެވެ؟" ސާލާރްގެ ލޮލުން ހުއްޓުމެއް ނެތި ކަރުނަ ފައިބަމުން ދިޔައެވެ. "އެ ކުއްޖާ ހޯދަން މި ބާޒާރުގައި އަތް ފުނާ އަޅަން ޖެހުމުން އަހަރެންގެ ފައި ތުރުތުރު އަޅަން ފެށީ އޭނާ އަކީ އަހަރެންގެ ހިތުން ވަރަށް ޚާއްޞަ ގަދަރެއް ދެވިފައިވާ ކުއްޖަކަށް ވާތީއެވެ. އަހަރެންގެ ހިތުން އޭނާއަށް ދެވިފައިވާ ދަރަޖަ ދުލުން ބަޔާނެއް ނުކުރެވޭނެއެވެ."
(ނުނިމޭ)
Neyvaa hifahattaalaigen kiyaalan .jehunu part eh...varah reethi....
Finally salar ah realize vejje dhw .imama dheke loabivaakan...☺
Haadha lahakun thi upkuree mivahaka kiyaa hih varahvey v reethi