އިންޑިޔާގެ ގާނޫނު އަސާސީގެ 370 ވަނަ މައްދާގެ ދަށުން ކަޝްމީރުގެ އިންޑިޔާ ފަޅިއަށް ދީފައި އޮތް ޚާއްސަ އިމްތިޔާޒު އުވާލައި، އެހެން ސްޓޭޓްތަކާއި އެއް ހަމައަކަށް ކަޝްމީރު ގެނައުމަށް އިންޑިޔާ ސަރުކާރުން ނިންމައިފިއެވެ. މިއީ ފާއިތުވި 70 ވަރަކަށް އަހަރުގެ ތެރޭގައި އިންޑީޔާގެ ކަޝްމީރާ ގުޅޭގޮތުން އެގައުމުން ނިންމާ އެންމެ ބޮޑު ނިންމުމެވެ.
މިއަދު އިންޑީޔާގެ ގާނޫނުހަދާ މަޖިލީހަށް ރިޔާސީ ގަރާރެއް ހުށަހަޅުއްވައި، ވާހަކަފުޅު ދައްކަވަމުން ހޯމް މިނިސްޓަރު އަމީތު ޝާހު ވިދާޅުވީ ގާނޫނު އަސާސީގެ 370 ވަނަ މައްދާ އުވާލުމުގެ ރައީސު ނާތު ކޯވިންދު ސޮއިކުރައްވާފައިވާ ކަމުގައެވެ. އެ މާއްދާއަކީ، މުސްލިމުންގެ ބައިބޯ ކަޝްމީރަށް ވަކި މިންވަރެއްގެ ޒާތީ މިނިވަންކަމެއް ދީފައި އޮތް މާއްދާއެކެވެ.
"ޖައްމޫ އެންޑް ކަޝްމީރު ސްޓޭޓް މައްޗަށް (ވެސް ދެން) މުޅި ގާނޫނު އަސަސީ ހިނގާނެ." އިދިކޮޅު މެންބަރުން އަޑުގަދަކުރައްވަމުން ގެންދަވަނިކޮށް ވާހަކަފުޅު ދައްކަވަމުން އިމިތު ޝާހު ވިދާޅުވިއެވެ. އިދިކޮޅު ޕާޓީތަކުން ވަނީ އެ މާއްދާ އުވާލުމާ ދެކޮޅުހަދާފައެވެ.
370 ވަނަ މާއްދާއިން އިންޑިޔާގެ އެހެން ސަރަހައްދުތަކުގެ މީހުން ކަޝްމީރުގެ ރަށްވެހިންނަށް ވުމާއި، އެ ސަރަހައްދުން ބިންގަތުމާއި، އެ ސަރަހައްދުގެ ސަރުކާރުގެ ވަޒީފާގައި އުޅުމާއި، ތައުލީމީ ސްކޯލާޝިޕް ހޯދުން މަނާކުރެއެވެ.
އަދި އެ މާއްދާއިން ކަޝްމީރުގެ އިންޑިޔާ ފަޅިއަށް އަމިއްލަ ގާނޫނު އަސާސީއެއް ހެދުމާއި، އަމިއްލަ ދިދައެއް ބޭނުންކުރުމާއި، ދިފާއީ، ޚާރިޖީ އަދި މުވާސަލާތީ ކަންކަން ފިޔަވައި އެހެން ހުރިހާ ކަމެއްގައި އަމިއްލަ މިނިވަންކަން ލިބިދެއެވެ.
ބޮޑުވަޒީރު ނަރެންދްރަ މޯދީގެ ޕާޓީ، ބާރަތިޔާ ޖަނަތާ ޕާޓީ (ބީޖޭޕީ) އިން އަބަދުވެސް ވަކާލާތުކުރަމުން އައީ، ކަޝްމީރަށް ގާނޫނު އަސާސީގައި ދީފައި އޮތް ޚާއްސަ އިމްތިޔާޒުގެ ސަބަބުން، އެ ސަރަހައްދު ފުރިހަމަ ގޮތުގައި އިންޑީޔާގެ އެހެން ސަރަހައްދުތަކާ އެކަތިގަނޑަކަށް ހެދުމަށް ހުރަސްއެލޭ ކަމަށެވެ.
މިއަދު އަމިތު ޝާހު ހުށަހެޅުއްވި ގަރާރުގެ ދަށުން ޖައްމޫ އެންޑް ކަޝްމީރު ސްޓޭޓް އުވާލައި އެ ސްޓޭޓް ދެ ޔުނިއަން ޓެރިޓަރީއަކަށް ބައިކުރުމަށްވެސް ވަނީ ނިންމާފައެވެ. އެއީ ޖައްމޫ އެންޑް ކަޝްމީރު ޔުނިއަން ޓެރިޓަރީއާއި، ލަދާޚް ޔުނިއަން ޓެރިޓަރީއެވެ. ޖައްމޫ އެންޑް ކަޝްމީރު ޓެރިޓަރީގައި ވަކި ގާނޫނުހަދާ މަޖިލީހެއް އޮންނައިރު، ލަދާޚް ޓެރިޓަރީގައި ގާނޫނުހަދާ މަޖިލީހެއް ނޯންނާނެއެވެ.
މި ގަރާރުގެ ސަބަބުން ހަމަނުޖެހުން އުފެދިނާތީ، އެކަމަށް ތައްޔާރުވުމުގެ ގޮތުން އިންޑީޔާ ސަރުކާރުން ވަނީ ކަޝްމީރަށް ސިފައިންގެ އެތައް ހާސް މީހުން އިތުރަށް ފޮނުވައި ސަލާމަތީ ކަންކަން ވަރުގަދަކޮށް، އިންޓަނެޓާއި، މޯބައިލް ފޯނުގެ ޚިދުމަތްތައް ކަނޑާލައި، ސަރަހައްދުގެ ބައެއް ސީޔާސީ ލީޑަރުން ގޭބަންދުގައި ބައިތިއްބާފައެވެ.
ކަޝްމީރުގެ ޚާއްސަ އިމްތިޔާޒު އުވާލާ ގަރާރާ ދެކޮޅަށް ކަޝްމީރުގެ ލީޑަރުން ގެންދަވަނީ ޝުއޫރު ފާޅުކުރައްވަމުންނެވެ.
ކަޝްމީރުގެ ކުރީގެ ޗީފް މިނިސްޓަރު މެހެބޫބާ މުފްތީ ވިދާޅުވީ އޮގަސްޓްމަހުގެ 5 ވަނަ ދުވަހަކީ ކަޝްމީރުގެ ތާރީޚުގައި އެންމެ ކަޅު ދުވަސްކަމުގައެވެ. ކުރީގެ ޗީފް މިނިސްޓަރު އަދި ނޭޝަނަލް ކޮންފަރެންސް ޕާޓީގެ ލީޑަރު އުމަރު ޢަބްދުﷲ ވިދާޅުވީ މިއަދުގެ ސަރުކާރުން މި އެޅި ފިޔަވަޅުގެ ސަބަބުން ކަޝްމީރުގެ ރައްޔިތުން އިންޑިޔާއަށް ކުރި އިތުބާރު މުޅިން ގެއްލިގެން ހިނގައްޖެ ކަމުގައެވެ.
