ވަކި ފަރުދުންގެ އާމްދަނީންނަގާ ޓެކްސް (އިންކަމް ޓެކްސް) މިއަހަރު ތެރޭގައި ތަޢާރަފް ކުރެވޭނެ ކަމަށް ރައްޔިތުންގެ މަޖިލީހުގެ ރައީސް، ކުރީގެ ރައީސް މުޙައްމަދު ނަޝީދު ވިދާޅުވެއްޖެއެއެވެ. އެމަނިކުފާނު މިހެން ވިދާޅުވެފައިވަނީ ދައުލަތުގެ ޓެކްސް އިދާރާ މޯލްޑިވްސް އިންލެންޑް ރެވެނިއު އޮތޯރިޓީ (މީރާ) ގެ 9 ވަނަ އަހަރީ ދުވަސް ފާހަގަ ކުރުމަށް މިރޭ ބޭއްވި ޖަލްސާ ޝަރަފަވެރި ކޮށްދެއްވުމުގެ ގޮތުން ދެއްކެވި ވާހަކަފުޅުގައެވެ.
ރައްޔިތުންގެ މަޖިލީހުގެ ރައީސް ވިދާޅުވީ 2020 ވަނަ އަހަރަށް ދައުލަތުގެ ބަޖެޓް އަންދާޒާ ކުރައްވައިފައި އޮތީ ވަކި ފަރުދުންގެ އާމްދަނީން ނަގާ ޓެކްސް ހިމަނައިގެން ކަމުގައެވެ. އެހެންކަމުން މިއަހަރު ތެރޭގައި އެ ޓެކްސް ނަގަން ޖެހޭކަމަށް ވިދާޅުވިއެވެ. މިކަމާ ގުޅޭ ބިލް ރައްޔިތުންގެ މަޖިލީހުގެ މިދައުރަށް ތަޢާރަފް ކުރެވޭނެ ކަމަށާއި، އެބިލްގެ މަސައްކަތް ކުރައްވަން ބޭނުންފުޅުވި ނަމަވެސް މިދައުރު ނިންމުމުގެ ކުރިން ނިންމަންޖެހޭ ގިނަ މަސައްކަތްތައް ހުރުމުން އެބިލްގެ މަސައްކަތް މަޖިލީހުގައި ކުރެވޭނީ މަޖިލީސް ޗުއްޓީއަށްފަހު ފެށޭ މިއަހަރުގެ ފަހު ދައުރުގައި ކަމަށް ރައީސް ނަޝީދު ވިދާޅުވިއެވެ. މަޖިލީސް ޗުއްޓީ އަށް ދާނީ ސެޕްޓެމްބަރު ގައެވެ. މަޖިލީހުގެ މިއަހަރުގެ ފަހު ދައުރު ފެށެނީ އޮކްޓޫބަރުގައެވެ.
ވަކި ފަރުދުންގެ އާމްދަނީން ނަގާ ޓެކްސް ރައީސް ނަޝީދުގެ ވެރިކަމުގައި ތަޢާރަފު ކުރައްވަން ބޭނުންފުޅުވި ކަމަށާއި ނަމަވެސް އެކަން ނުވެ އުޅެނިކޮށް އެމަނިކުފާނުގެ ސަރުކާރު ވައްޓާލީކަމަށް ރައީސް ނަޝީދު ވިދާޅުވިއެވެ. ނަމަވެސް އަނެއްކާވެސް އެނބުރިވަޑައިގެން ތިއްބެވިކަމަށް ވިދާޅުވިއެވެ. ރާއްޖޭގެ ޓެކްސް ނިޒާމު ތަޢާރަފް ކުރައްވައިފައި ވަނީ 2010 ވަނަ އަހަރު ރައީސް ނަޝީދުގެ ވެރިކަމުގައެވެ. ޓެކުހާ ބެހޭ އިރާދާ އުފެދުނީ 2010 ވަނަ އަހަރު އޯގަސްޓް 2 ގައެވެ.
މީރާގެ 9 ވަނަ އަހަރީ ދުވަސް ފާހަގަ ކުރައްވަން ބޭއްވި ރަސްމިއްޔާތުގައި ވާހަކަ ފުޅު ދައްކަވަމުން ރައްޔިތުންގެ މަޖިލީހުގެ ރައީސް ވިދާޅުވީ ޓެކްސްގެ ގޮތުގައި ރައްޔިތުންގެ އަތުން ނެގޭ ފައިސާ ގެއްލުވައިލައިގެން ނުވާނެކަމަށާއި ވަރަށް ރަނގަޅަށް އެބަލަހަށްޓަން ޖެހޭނެކަމަށެވެ. ޓެކްސްގެ ގޮތުގައި ނެގޭ ފައިސާ ބެލެހެއްޓުމުގެ އިންތިޒާމުތައްވެސް ހަރުދަނާވާން ޖެހޭ ކަމަށް ވިދާޅުވިއެވެ. ޓެކްހާ ބެހޭ ޝަކުވާތައް ބެލުމުގެ އުޞޫލު ރަނގަޅުވާން ޖެހޭ ކަމަށާއި އަދި ސިޔާސީ ހަތިޔާރަކަށް ޓެކްސް ވެގެން ނުވާނެކަމަށް ރައީސް ނަޝީދު ވިދާޅުވިއެވެ.
"ޓެކްސް ވެގެންނުވާނެ ސިޔާސީ ހަތިޔާރަކަށް. ޓެކްސް އަކީ އެއްވެސް ޙާލެއްގައި އެއްވެސް ސިޔާސީ ކަމެއް، އޭގެ ތެރޭގައި ހިމެނިގެންވާނެ ކަމެއް ނުން. ޓެކްސް އޮފީހުގައި ހުންނަ އާންމު ރައްޔިތުންގެ މަޢުލޫމާތަކީ އެއްވެސް މީހަކަށް ލިބިގެންވާނެ މަޢުލޫމާތެއް ނުން. އެ މަޢުލޫމާތު ހުންނަން ޖެހޭނީ ހަމަ އެކަނި ޓެކްސް އޮފީހުގައި. ޓެކްސް ނެގުމުގައި ނުފޫޒެއް ބޭނުން ކޮށްގެން މީހަކަށް ގެއްލުންދީ ހެދުން އެއީ ވަރަށް ބޮޑު ގޯހަކަށް ވާނީ." ރައީސް ނަޝީދު ވިދާޅުވިއެވެ.
ޓެކްސްގެ ނިޒާމުގައި އެންމެ މުހިންމު ކަމަކަށް ވާންޖެހޭނީ ނަޒާހަތްތެރިކަންކަމަށް ރައީސް ނަޝީދު ފާހަގަ ކުރެއްވިއެވެ. އެފައިސާ ބަލަހައްޓަން ޖެހޭނީ ނަޒާހަތްތެރިކަމާ އެކީ، ކަމަށާއ އެފައިސާ ނަގާ މީހުންނަކީ "ދެގޮތެއްނުވާ ނުގުޑާ" ނަޒާހަތްތެރި ބަޔަކަށްވެސް ވާންޖެހޭ ކަމަށް އެމަނިކުފާނު ވިދާޅުވިއެވެ.
ރާއްޖޭގެ ޓެކްސް ނިޒާމަކީ މުޅި ދުނިޔޭގެވެސް އެންމެ ރަނގަޅު ޓެކްސްގެ ނިޒާމަށް ވެގެންދާނެކަމަށް ޔަޤީންކޮށް ކަށަވަރު ކުރައްވާކަމަށް ރައީސް ނަޝިދު ވިދާޅުވިއެވެ. މިސަރަޙައްދުގެ ޤައުތަކަށް ވުރެ ރަނަގަޅަށް މިހާރުވެސް ރާއްޖޭގެ ޓެކްސް ނިޒާމު ކުރިއަށްދާކަން އެމަނިކުފާނު ފާހަގަ ކުރެއްވިއެވެ.
