ގުރައިދޫ ދާއިރާގެ ރައްޔިތުންގެ އެކުވެރި މިތުރެއްގެ ގޮތުގައި ދެމިހުންނަވާނެ ކަމަށް އެދާއިރާގެ މަޖިލީސް ގޮނޑި މިފަހަރު ކާމިޔާބު ކުރެއްވި ޕީޕީއެމްގެ ކެންޑިޑޭޓު މުޙައްމަދު ޣައްސާން މައުމޫން ވިދާޅުވެއްޖެއެވެ.
އެދާއިރާގެ ގޮނޑިއަށް އޭނާ އިންތިޚާބު ކޮށްދެއްވީތީ ރައްޔިތުންނަށް ޝުކުރު އަދާ ކުރެއްވުމުގެ ގޮތުން ނެރުއްވި ބަޔާނެއްގައި ވިދާޅުވެފައިވަނީ "އިރާދަކުރެއްވިއްޔާ އަޅުގަނޑު އިންތިޚާބު ކޮށްދެއްވި ދާއިރާގެ ކޮންމެ ރައްޔިތެއްގެ އެކުވެރި މިތުރެއްގެ ގޮތުގައި އަދި ދެގޮތެއް ނުވެ ރައްޔިތުންގެ ސަފުގައި އަޅުގަނޑު ދެމިހުންނާނަމެވެ." އަދި އޭނާހޮވަން މަސައްކަތް ކޮށް ވޯޓު ދިން އެންމެނަށް ވަރަށް ބޮޑަށް ޝުކުރު އަދާ ކުރައްވާ ކަމަށް ވިދާޅުވެފައި ވެއެވެ.
ޣައްސާން ވަނީ އެދާއިރާ އަށް ވާދަކުރެއްވި ހުރިހާ ކެންޑިޑޭޓުންނަށް ވެސް ޝުކުރު އަދާ ކުރައްވައިވައެވެ. ގުރައިދޫ ދާއިރާގެ ރައްޔިތުންގެ މަންފާއަށް ކުރައްވާ ކޮންމެ ކަމެއްގައި އެދާއިރާއަށް ވާދަކުރެއްވި ކެންޑިޑޭޓުންގެ ޚިޔާލާއި މަޝްވަރާ ހޯއްދަވާނެ ކަމަށް ވެސް ޣައްސާން ވިދާޅުވެފައިވެއެވެ.
ނިމިދިޔަ އިންތިޚާބުގައި މަޖިލީހަށް އިންތިޚާބުވި ކޮންމެ މެމްބަރަކު ވެސް މަސައްކަތް ކުރައްވަންވާނީ "ޤައުމުގެ މަސްލަޙަތު އިސްކޮށް އިސްލާމްދީނާއި ދިވެހިވަންތަ ކަމުގެ ޢަސާސްތައް ޙިމާޔަތްކޮށް ދިވެހިރާއްޖޭގެ އުފާފާގަތިކަމަށް އަދައިގެން ރައްޔިތުންނަށް އެންމެ ލާބަހުރި މަގުން ކަންކަން ނިންމަމުން ދިއުމެވެ." އޭނާ ވިދާޅުވެފައިވެއެވެ.
ނަވާރަވަނަ މަޖިލިހަކީ އުފެއްދުންތެރި ޤައުމުގެ ކުރިމަގަށް މުހިންމު ނިންމުންތަކެއް ޒިންމާދާރު ކަމާއެކު ނިންމާ މަޖިލީހަކަށް ވާނެ ކަމަށް އުންމީދު ކުރައްވާ ކަމަށް ވެސް އޭނާ ވިދާޅުވެފައިވެއެވެ. އަދި މަޖިލީސް ވެގެންދާނީ ތަފާތު ފިކުރުތަކަށް އިޙްތިރާމްކޮށް ކޮންމެ ކަމެއްގައި ވެސް ޤައުމަށް އެންމެ ހެޔޮގޮތް އިސްކުރާނެ ނަމޫނާ މަޖިލިހަކަށް ކަމަށް ވެސް ވިދާޅުވެފައިވެއެވެ. ކޮންމެ މެމްބަރަކުވެސް މަސައްކަތް ކުރައްވަންވާނީ ކޮނޑުގައި ބޮޑު މަސްއޫލިއްޔަތެއް އެޅިފައިވާކަން ދަނެގެން ކަމަށް ވެސް ޣައްސާން ވިދާޅުވިއެވެ.
"އަޅުގަނޑުގެ އީމާނަކީ އަދި ޔަޤީން ކަމަކީ ﷲއަށް އީމާންވާ އަދި ފަސް ވަގުތު ބަންގީގެ އަޑު އަބަދުމެ ގުގުމާ، ނިޔަނެތި، ސާދާ، ދިވެހިންގެ މި ބިމާއި ވަޠަނަށް ކީރިތި ﷲ ދެރަގޮތެއް މެދުވެރި ނުކުރައްވާނެ ކަމެވެ. ކޮންމެ ނުސިޔާސީނު ކަމަކާ ނުރައްކަލަކުން މި ފަސްގަނޑު ސަލާމަތް ކުރައްވައި މިނިވަންކަމާއި އިސްލާމީ ޢަޤީދާގައި ލެހެއްޓެވުން އޯގާވަންތަ ﷲ މިވަރު ކުރައްވާނޭކަމެވެ. އަދި ދިވެހީންނަށް އުފާވެރި އުޖާލާ މުސްތަޤުބަލެއް މިންވަރު ކުރެއްވުމަށް އެދިވަޑައިގަންނަވާ ކަމަށް ވެސް ޣައްސާން ވިދާޅުވިއެވެ.
