ކުޅުދުއްފުށީ ފަޅުތެރޭގައި އޮތް އެރަށު ސީ ކުއީން ބޯޓުގައި އަލިފާނުގެ ޙާދިސާއެއް ހިނގައިފިއެވެ.
މާލެއާއި ކުޅުދުއްފުއްޓާ ދެމެދު ދަތުރުކުރާ އެބޯޓުގައި ރޯވެފައިވާ ކަމުގެ މަޢުލޫމާތު މިއަދު 12:28 އެހައިކަންހާއިރު އެމްއެންޑީއެފަށް ލިބުމުން ކުޅުދުއްފުށީގައި މަސައްކަތްކުރާ އެމްއެންޑީއެފްގެ ފަޔަރ އެންޑް ރެސްކިޔު ޓީމުން ވަނީ އެ ސަރަޙައްދަށް ގޮސް އަލިފާން ނިއްވާލައިފައެވެ. މި ޙާދިސާގައި އެއްވެސް މީހަކަށް އަނިޔާއެއް ލިބިފައެް ނުވެއެވެ.
އެމްއެންޑީއެފުން ވިދާޅުވީ ބޯޓުގެ އިންޖީން ރޫމުން މިހާރުވެސް ބޯކޮށް ދުން އަރަމުން ދާ ކަމަށެވެ. ދުން ބޭރު ކުރުމުގެ މަސައްކަތް ވެސް މިހާރު ކުރަމުންދާ ކަމަށް އެމްއެންޑީއެފުން ވަނީ ވިދާޅުވިއެވެ.
މަޢުލޫމާތު ލިބިފައިވާ ގޮތުގައި އަލިފާން ރޯވީ ވެސް އިންޖީން ރޫމުގައެވެ. މި ޙާދިސާގައި ބޯޓަށް ލިބުނު ގެއްލުމާބެހޭ އެއްވެސް މަޢުލޫމާތެއް އަދި ނުލިބެއެވެ. އަދި އަލިފާން ރޯވާން ދިމާވި ސަބަބު ވެސް އެނގިފައެއް ނުވެއެވެ.
