ޕާކިސްތާނުން ދިން ހަމަލާއެއްގައި ވެއްޓުނު އިންޑިއާގެ ހަނގުރާމަވެރި ޖެޓު ދުއްވަން އިން އިންޑިއަން އެއާރފޯސްގެ ވިންގް ކޮމާންޑަރ އަބީނަންދަން ވަރުތަމާން ގެ ފުރާނަ ސަލާމަތްކޮށްދިނީ ޕާކިސްތާނުގެ ސިފައިންކަމަށް އޭނާ ބުނެފިއެވެ.
އަބީނަންދަން ދުއްވާފައިދިޔަ މިގް 21 ބައިސަން ޖެޓަށް މިދިޔަ މަހުގެ 27 ވަނަ ދުވަހު ހެނދުނު ހަމަލާދީ ގޮއްވާލުމުން ވައިކުޑައިގައި އޭނާ ފުންމާލިއެވެ. އޭނާއަށް ފޭބުނީ ޕާކިސްތާނުގެ ސަރަހައްދަށެވެ.
"އާއްމުން އަޅުގަނޑުގެ ފަހަތުން އަޅުގަނޑު ހައްޔަރުކުރަން ދުވަންފެށި. އެމީހުންތިބީ ވަރަށް ޖަޒުބާތުގައި." އަބީނަންދަން އޭނާއަށް ދިމާވި ހާދިސާގެ ވާހަކަ ކިޔައިދިނެވެ. "އެ ވަގުތު އެތަނަށް އައި ޕާކިސްތާން ސިފައިންގެ ދެމީހުން އަޅުގަނޑު އާއްމުންގެ އަތްދަށުން ސަލާމަތްކޮށްދިނީ."
އަބީނަންދަން ބުނިގޮތުގައި އޭނާއަށް ގެއްލުމެއްވިޔަނުދީ ރައްކާތެރިކަމާއެކު ސިފައިން އެމީހުންގެ ޔުނިޓަށް ގެންގޮސް ފަރުވާދިނެވެ. އަދި އިތުރަށް ފަރުވާދިނުމަށް ހޮސްޕިޓަލަށް ގެންދިޔައެވެ.
ޕާކިސްތާނަކީ ސުލްހައަށްއެދޭ އަމާންކަމަށް މަސައްކަތް ކުރާ ގައުމެއްކަން މުޅިދުނިޔެއަށް ހާމަކޮށް ދެއްކުމުގެ ގޮތުން ޕާކިސްތާނުގެ ބޮޑުވަޒީރު ޢިމްރާން ޚާން ވަނީ އަބީނަންދަން މިނިވަންކޮށް ހުކުރުދުވަހުގެރޭ އިންޑިއާއަށް ފޮނުވާލާފައެވެ. އޭނާ އިންޑިއާއަށް ދިޔައީ އިންޑިއާ-ޕާކިސްތާނުގެ ވާގާ ސަރަހައްދުންނެވެ.
އަބީނަންދަން މިނިވަންކޮށް ދޫކޮށްލުމުން އިމްރާންޚާނާއި ޕާކިސްތާނުން ދެއްކި ރީތި މިސާލަށް މުޅިދުނިޔެ ދަނީ ތައުރީފުކުރަމުންނެވެ.
"އެއްވެފައި ތިބި މީހުންގެ އަތްދަށުން އަޅުގަނޑު ސަލާމަތްކޮށްދިނީ ސިފައިންގެ ދެމީހުން. އެއީ ވަރަށް ޕްރޮފެޝަނަލް ބައެއް. އެމީހުންގެ އޯގާވެރިކަމުން އަޅުގަނޑަށް ވަރަށް ފުން އަސަރެއް ކުރި. އަޅުގަނޑަށް ބޭސްވަރުވާކުރުމުގައި އެމީހުން ވަރަށް ބޮޑަށް އެހީތެރިވެދިން."
އަބީނަންދަން ޕާކިސްތާނުގެ މަރުކަޒުތަކަށް ހަމަލާދޭނޭ އަމާޒުތައް ހޯދަމުންދަނިކޮށް އޭނާ ދުއްވަން އިން ޖެޓަށް ހަމަލާދީ ވައްޓާލީ ޕާކިސްތާނުގެ ހަނގުރާމަތީ ޖެޓަކުންނެވެ.
ޕައިލެޓު އަބީނަންދަން ޕާކިސްތާން މިނިވަންވެ، ސަރަހައްދު ހުރަސްްކޮށް އިންޑިއާއަށް ދިޔަތާ މާގިނައިރެއް ނުވަނީސް އިިންޑިއާގެ ދިފާއީ ވަޒީރު ނިރުމަލާ ސީތާރަމަން، އަބީނަންދަންއާ ބައްދަލުކުރެއްވިއެވެ. އަދި އޭނާގެ ހިތްވަރުގަދަކަމާމެދު ގައުމު ފަޚުރުވެރިވާކަމުގައި ވިދާޅުވިއެވެ.
އަބީނަންދަން އޭނާގެ އާއިލާއާއި އެއާރފޯސްގެ އިސްބޭފުޅުންނާ ބައްދަލު ކުރީ ހޮނިހިރުދުވަހުގެ ހެދުނުގެ ވަގުތެއްގައެވެ.
ޕާކިސްތާނާއި އިންޑިއާ ދެމެދު ކުރެވުނު ހަނގުރާމައެއްގައި އިންޑިއާގެ އަތްދަށުވި ޕާކިސްތާނުގެ ވައިގެ ސިފައިންގެ މީހަކު އިންޑިއާއިން ދޫކޮށްލީ 40 އަހަރު ފަހުންނެވެ. އެ މީހާ އިންޑިއާއިން މިނިވަންކުރިއިރު އެމީހާ ވަނީ މޮޔަވެފައެވެ. އެ މީހާ ހަނދާން ހުންނަނީ ހަމައެކަނި އެ މީހާގެ ސީރިއަލް ނަމްބަރެވެ.
