ތުރުކީގެ ސިފައިންގެ ތެރެއިން ބަޔަކު ކުއްލިއަކަށް ރޭ އެޤައުމަށް ގެންނަން އުޅުނު ނާކާމިޔާބު ބަޣާވާތުގެ ހަމަނުޖެހުން ފަށާފައިވަނީ ރޭ ރާއްޖެ ގަޑިން 12:30 ހާ އިރުއެވެ. އެމީހުންވަނީ އެވަގުތުންފެށިގެން އިސްތަމްބޫލްގެ ބޮސްފޮރޮސް ބުރިޖު ބަންދުކޮށް އަންކާރާގެ މަތީގައި ހެލިކޮޕްޓަރުތަކުގައި އުދުހި ޢާއްމުންނަށް ބިރުދައްކަން ފަށާފައެވެ. ރާއްޖެގަޑިން 12:50ހާއިރު، އަންކާރާގައި ހުންނަ ސިފައިންގެ މައި މަރުކަޒުގައި ހަމަލާ ބަދަލު ކުރެވުނެވެ. ސިފައިންގެ ބަޔަކު ބަޣާވާތްކުރުމާއެކު، ތުރުކީ ސަރުކާރުންވަނީ ސިފައިންގެ ހުރިހާއެންމެން ވަގުތުން ޑިއުޓީއަށް ނުކުތުމަށް އަމުރުކޮށްފައެވެ. ބަޣާވާތް ކާމިޔާބުކުރުމަށްޓަކައި ބާޣީ ސިފައިންވަނީ ސިފައިންގެ އިންޓެލިޖަންސް މައި މަރުކަޒަށް ހަމަލާދީފައެވެ.
އެއާއެކު ރޭ މެންދަމު ރާއްޖެގަޑިން 1:45 ގައި ބާޣީން ވަނީ އެމީހުންނަށް ތުރުކީގެ ކޮންޓްރޯލް ލިބިއްޖެކަމަށާ، ތުރުކީގެ ސަރުކާރު ވައްޓާލެވިއްޖެކަމަށް ޢިއުލާންކޮށްފައެވެ.
ދެންފެނުނީ ތުރުކީ ރައްޔިތުންގެ އާދައާ ޚިލާފު ހިތްވަރާއި ކެރުމެވެ. ސަރުކާރަށް ސަޕޯޓުކުރާކަން ހާމަކޮށް އެތައް މިލިއަން ޢާއްމުރައްޔިތުން މަގުތަކަށް ނުކުމެ މުޒާހަރާ ކުރަންފެށިއެވެ. އެއްވެސް ހަތިޔާރެއްނެތި ބަރުހަތިޔާރުގެ ކުރިމައްޗަށް ނުކުމެ ބާޣީންނާ ކުރިމަތިލީތަނެވެ. އެއާއެކު ބާޣީ ސިފައިން، އާންމުންގެ ބައެއްމީހުން ހައްޔަރުކުރަން ފެށިއެވެ. ރާއްޖެ ގަޑިން ރޭ މެންދަމުންއަލިވެ ގާތްގަނޑަކަށް 1:40ހާއިރު ސިފައިންގެ މައި މަރުކަޒުތެރެއިން ވަރުގަދަ ގޮވުންތަކެއް ގޮވިއެވެ.
ތުރުކީގެ ޤައުމީ ޓީވީގެ ޚިދުމަތްވެސް ވަނީ މެދު ކެނޑިފައެވެ. އިރާނުންވަނީ ތުރިކީބޯޑަރު ބަންދުކޮށްފައެވެ. މި ބަޣާވާތުގެ ހަޤީގަތް އަދި އޭރު ނޭނގުނަސް، ބާޣީންނަށް ކާމިޔަބު ވެއްޖެކަމަށް އެމީހުން އަމިއްލައަށް ޢިއުލާންކުރުމާއެކު، ސޫރިޔާގެ ރައީސް ބައްޝާރުލް އަސަދުގެ ބާރުހިނގާ ސޫރިޔާގެ ސަރަޙައްދުތަކުން އުފާފާޅުކުރަން ފެށި މަންޒަރު މީޑިއާތަކުން ފެނުނެވެ.
އެހެންނަމަވެސް ތުރުކީގެ ކުރީގެ ރައީސް އަބްދުﷲ ޤުލް އާއި އެޤައުމުގެ ޤާނޫނުހަދާ މަޖިލީހުގެ ރަޢީސާއި މެމްބަރުން ވަނީ ބަޣާވާތް ކުއްވެރިކޮށްފައެވެ.
ބާޣީންނަށް ކާމިޔާބުވެއްޖެމަކަށް އެމީހުން އަމިއްލައަށް ޢިއުލާންކޮށްފައިވަނިކޮށް ތުރުކީގެ ރައްޔިތުން އިންތިޚާބުކޮށްފައިވާ އެޤައުމުގެ ރައީސް ރަޖަބު ޠައްޔިބު އުރުދުޣާން ވަނީ ރައްޔިތުން މަގުތަކަށް ނުކުތަމަށް ގޮވާލާފައެވެ. އެއާއެކު ރައްޔިތުން އުތުރު އަރައިގަތެވެ. އަދި ވަރުގަދަ ކުރިމަތިލުންތަކާއެކު ބާޣީން ބަލިކުރިއެވެ. ބޮޑެތި ޓޭންކުތައް ކުރިމަތީގައި އަންހެނުން އޮށޯވެ ތިބިތަންފެނުނެވެ. ވެހިކަލްތަކުން ބަޑިޖަހަމުންދަނިކޮށް، ވަޒަންތަކުގެ ތެރެއިން ދޮވެގޮސް ބަޑިޖަހާ ބާޣީމީހާ ހިފަހައްޓާ ޢާއްމުންގެ ކޮންޓްރޯލުގެ ދަށަށް ގެނައުންފަދަ އާދައާޚިލާފު ހިއްވަރު، ތުރުކީގެ ޢާއްމުންގެ ކިބައިން ފެނުނެވެ. ބަޣާވާތްކުރިތާ ޖުމުލަ 3 ގަޑިއިރު ވީ ފަހުން ތުރުކީ ސިފައިންގެ އިސްވެރިން ވަނީ އެމީހުން ތުރުކީސަރުކާރާ އެކީ ވާކަން ހާމަކޮށްފައެވެ.
ބަޣާވާތް ނާކާމިޔާބުކުރެވިއްޖެކަން ތުރުކީގެ އިންޓީރިއަރ މިނިސްޓަރު ޢިއުލާންކުރެއްވީ ރޭ ރާއްޖެގަޑިން4:45 ގައިއެވެ.
ބަޣާވާތް ކުރިކަމުގެ ތުހުމަތުގައި މިހާރުވަނީ 700 އަށް ވުރެ ގިނަ ސިފައިން ހައްޔަރުކޮށްފައެވެ. އޭގެ ތެރޭގައި ތުރުކީ ސިފައިންގެ ބައެއް އިސް ޖެނެރަލުންވެސް ހިމެނެއެވެ. ހަމަނުޖެހުންތަކުގައި މަރުވި މީހުންގެ އަދަދު 40އަށް ވުރެ މަތީގައި އުޅޭއިރު، ޒަޚަމްވި މީހުންގެ އަދަދު 1000އަށް ވުރެ މައްޗެވެ.
