ޔޫރޯ ފުޓްބޯޅަ މުބާރާތުގެ ފައިނަލުގެ ޖާގައެއް ފްރާންސް ހޯދައިފިއެވެ.
ޔޫރޯ ފުޓްބޯޅަ މުބާރާތުގެ ފައިނަލުގެ އެންމެ ފަހު ޖާގަ ފްރާންސް ހޯދާފައިވަނީ، ރޭ ޖަރުމަނުވިލާތާ ދެކޮޅަށް ކުޅުނުމެޗް ކާމިޔާބުކޮށްގެންނެވެ. މާސޭގައި ކުޅުނު މިމެޗް ޖަރުމަނުވިލާތުގެ މައްޗަށް ފްރާންސް ކުރިހޯދީ ދޭއް ސުމެއްގެ ނަތީޖާއަކުންނެވެ. މެޗްގައި ފްރާންސުން ޖެހި ދެ ލަނޑުވެސް އެޓީމަށް ކާމިޔާބުކޮށްދިނީ ގްރިޒްމަންއެވެ.
މެޗްގައި ފެނިގެންދިއަ ފުރަތަމަ ލަނޑު ގްރިޒްމަން ކާމިޔާބުކޮށްފައިވަނީ، ލިބުނު ޕެނަލްޓީއަކުން ސާޅީސް ފަސްވަނަ މިނެޓް ތެރޭގައެވެ. އަދި ދެވަނަ ލަނޑު ކާމިޔާބުކޮށްފަވަނީ ހަތްދިހަ ދެވަނަ މިނެޓް ތެރޭގައެވެ. ގްރިޒްމަން ރޭ ކާމިޔާބުކުރި ދެ ލަނޑާއިއެކު އޭނާ ހިމެނިފައިވަނީ މި މުބާރާތުގައި މިހާތަނަށް އެންމެ ގިނަ ލަނޑު ޖެހި ކުޅުންތެރިއާއަށެވެ. މި މުބާރާތުގައި ގްރިޒްމަން މިހާތަނަށް ވަނީ ހަ ލަނޑު ޖަހާފައެވެ. މުބާރާތުގެ ފައިނަލުގައި ފްރާންސް ނިކުންނާނީ ޕޯޗްގަލް އާއިދެކޮޅަށެވެ. މިމެޗް ކުޅުމަށް ހަމަޖެހިފައިވަނީ މިމަހުގެ ދިހަވަނަ ދުވަހުގެ ރޭ ޕެރިހުގައެވެ.
