ޢީދު އުފަލަކީ ޒަމާނުއްސުރެ ދިވެހިންނަށް އަންނަ ވަރަށް މުހިންމު އުފަލެކެވެ. އިޖުތިމާޢީ ގުޅުން ބަދަހިވެގެންދާ ދުވަހެކެވެ. ކުނިޖެހި އަނގައިނުބުނެ ތިބޭ އަވަށްޓެރިންގެ ގުޅުން އަލުން ބަދަހިވެ އާލާވެގެންދާ ދުވަހެކެވެ. މައިންބަފައިންނާއި ގާތްތިމާގެކަމުގެ ގުޅުން އާލާވެގެންދާ ދުވަހެކެވެ.
އެހެންނަމަވެސް އެއީ މާޒީއެވެ. މިދެންނެވިހާ ފުރިހަމައަށް މި މަޤުސަދު މިހަރު ޙާސިލްވަމުންދެއެކޭ ނުދެންނެވޭނެއެވެ. ޢިދުއުފާވެސް މިހާރުވަނީ އެހެން ސިފަޔަކަށް ބަދަލުވެ އޭގައި އެހެން ކުލަކުލަ ޖެހިފައެވެ.
މިނޭދެވޭ އަސަރު ކަނޑުވާލައި ޢީދުގެ އުފަލުގެ ހަޤީގީ މާނަ ނެރެވޭތޯ ސަރުކާރާއި ކަމާބެހޭ އެކިއެކި މުއައްސަސާތައް ދަނީ ފަހަކަށް އައިސް މަސައްކަތް ކުރަމުންނެވެ. އެންމެ މުހިންމު ކަމަކީ ޢީދުގެ ކުޅިވަރުތަކާއި އެހެނިހެން ޙަރަކާތްތަކުގައި އެންމެހާ ރައްޔިތުން ބައިވެރިކުރުމެވެ.
މިފަހަރުގެ ފިތުރު އީދު ދުވަސް ފާހަގަކުރުމުގެ ގޮތުން މިއަދު މާލޭގައި ބޭއްވި ޙަރަކާތްތަކުން މިކަން ކޮންވެސްވަރަކަށް ޙާސިލްވެގެން ދާކަމުގެ އިޙުސާސް ކުރެވުނެވެ. ޚާއްސަކޮށް ކުޅިވަރުތައް ބަލަން އެއްވި މީހުންނާއެކު މާލޭގެ މަގުތައް ތޮއްޖެހިއްޖެހި ފުރިބާރުވެގެން ދިއުމަކީ ހެޔޮފާލެކެވެ.
ފޯރިގަދަ ކުޅިވަރުތަކާއި އެކު ސަގާފީ ހަވީރެއް މިއަދު ބާއްވާފައިވާއިރު، އާދައާޚިލާފު ގިނަ ޢަދަދަކަށް އެހަރަކާތްތައް ބަލަން ކުދިބޮޑު ޢާއްމުން ވަނީ މަގުތަކަށް އެއްވެފައެވެ.
ޔޫތް މިނިސްޓްރީން އިންތިޒާމް ކޮށްގެން ބޭއްވި ސަގާފީ ހަވީރު ފަށާފައިވަނީ މިއަދު ހަވީރު ހަތަރުގަޑި ތިރީހުގައި މާލޭގެ ޝޯޝަލް ސެންޓަރު ސަރަޙައްދުންނެވެ. ދިވެހި ސަގާފީ ކުލަތަކަކާއެކު ބޮޑުމަސް ދުއްވުމާއި، މާލި ނެށުމާއި ބޮޑު ފަދަ ފޯރިގަދަ ހަރަކާތްތަކަކާއެކު މާލޭގައި މިއަދު ބޭއްވި މި ހަވީރުގެ ކުޅިވަރުތަށް މާލޭގެ ބައެއް މަގުތަކުގައި ވަނީ ކުރިއަށް ގެންގޮސްފައެވެ.
މިއަދު އަތޮޅުތެރޭގެ ގިނަ ރަށްރަށުންވެސް މިފޯރި ފެނުނުކަމަށް ޚަބަރުލިބެއެވެ. މިއީ ޢީދުގެ އުފާ ދެގުނައަށް އިތުރުވެގެންދިޔަކަމެކެވެ. މިފަދަ އެއްބައިވަންތަކަމާއި، އެކުވެރި ގުޅުންތައް ބަދަހިވެގެންދާނެ ގޮތަށް މިފަދަ ދުވަސްތަކުގެ ހަރަކާތްތައް އިންތިޒާމުކޮށް ރޭވުމަކީ މިއަދު ވީދިފައިވާ އަޅުގަނޑުމެންގެ އިޖުތިމާޢީ ފޭރާން އާކޮށްލަން ކުރެވޭނެ އެންމެ މުހިންމު މަސައްކަތެވެ.
