މިހާރު 11 އަހަރުގެ ޖަލުޙުކުމެއް ތަންފީޒުކުރައްވަމުންދާ ކުރީގެ ޑިފެންސް މިނިސްޓަރު ކަނަލް ރިޓަޔާޑް މުޙަންމަދު ނާޒިމްގެ އެޕާޓްމަންޓުން ފެނުނުކަމަށް ބުނާ ފިސްތޯލައިން ކުރީގެ ނައިބުރައީސް އަހުމަދު އަދީބުގެ ޑިއެންއޭ ފެނިފައިވާކަމަށް އެންމެފަހުން ފުލުހުން ވެސް ހާމަކޮށްފިއެވެ.
މިކަން ހަމަކުރީ، ފުލުހުން ރޭ ކުއްލިގޮތަކަށް ބޭއްވި ނޫސްވެރިންގެ ބައްދަލުވުމެއްގައި އެސިސްޓެންޓް ކޮމިޝަނާ އޮފް ޕޮލިސް އަބްދުﷲ ނަވާޒެވެ. އޭނާ ވިދާޅުވީ، ކުރީގެ ޑިފެންސް މިނިސްޓަރު ކާނަލް ރިޓަޔާޑް މުހައްމަދު ނާޒިމްގެ އެޕާޓްމަންޓުން ފެނުނު ހަތިޔަރުން ނެގި ސާންޕަލްތަކުން ކުރީގެ ނައިބު ރައީސް އަހުމަދު އަދީބުގެ ޑީއެންއޭ ފެނިފައިވާ ކަމަށާ، އެކަން މިހާރު ފޮރެންސިކް ތަހުލީލުތަކުން ކަށަވަރުވެފައިވާކަމަށެވެ.
އެ ހަތިޔާރުން ނެގި ޑީއެންއޭ ޕްރޮފައިލްތަކުގެ ތެރެއިން އެއް ޑީއެންއޭ އަދީބާ ގުޅޭއިރު، އަދިވެސް އެއިންފެނުނު ގޮތްނޭނގޭ ބައެއް ޕްރޮފައިލްތަކުގެ ތަހުލީލު ނުނިމޭ ކަމަށް ނަވާޒު ވިދާޅުވިއެވެ.
ކާނަލް ނާޒިމްގެ މައްޗަށް ޝަރީޢަތް ހިންގުނީ އޭނާ "ފްރޭމް" ކޮށްގެންކަމަށް މީ ކުރިންވެސް އޭނާގެ ވަކީލުން ހާމަކުރައްވާފައިވާ ވާހަކައެކެވެ. އަދި އެކަމުގެ އެންމެ އަޑީގައި ހުންނެވީ އަދީބުކަމަށްވެސް ވަކީލުން ގެންދެވީ ވިދާޅުވަމުންނެނެވެ.
އެންމެފަހުން ރޭ ފުލުހުން މިމަޢުލޫމާތު ހާމަކުރުމުގެ ދެތިންގަޑިއެއްހާއިރު ކުރިން ވެސް ނަޒިމްގެ ޤާނޫނީވަކީލް އަލްއުސްތާޛު ހުސްނުއް ސުއޫދު ވަނީ މީގެ ބައެއް މައުލޫމާތު ހާމަކުރައްވާފައެވެ. އެގޮތުން ނާޒިމްގެ ކޮޓަރިން ފެނުނު ހަތިޔާރުން އަދީބުގެ ޑީއެންއޭ ފެނުނުކަމަށާ، އެކަން ދޮގުކުރައްވަން ހޯމް މިނިސްޓަރަށްވެސް އަދި ފުލުހުންނަށްވެސް ނުކެރޭނެކަމަށް ސުޢޫދު ވިދާޅުވެފައިވެއެވެ.
ނާޒިމް 11 އަހަރަށް ޖަލަށް ލީ މައްސަލަ މިޙާރު އޮތީ ސުޕްރީމްކޯޓުގައެވެ. އެމައްސަލަ އެކޯޓަށް ބަލައިގަންނަން ފެނޭތޯ ބެލުމަށް ބޭއްވި އިޖުރާޢީ އަޑުއެހުން އިއްޔެ އޮތެވެ. އަދި ވަކިގޮތެއް ނިންމެވިކަމެއް ސުޕްރީމްކޯޓުން ހާމައެއް ނުކުރައްވައެވެ.
