ފާއިތުވި އޮކްޓޯބަރު މަހު ބްރެޒިލްގައި ބޭއްވުނު ރިޔާސީ އިންތިޚާބު ކާމިޔާބުކުރެއްވި ޖައެރް ބޮލްސޮނާރޯ އެގައުމުގެ ރައީސުކަމުގެ ހުވައިކުރައްވައި މަގާމާ ހަވާލުވެވަޑައިގެންފިއެވެ. ސިފައިންގެ ކުރީގެ ކެޕްޓަނެއް ކަމުގައިވާ ބޮލްސޮނާރޯގެ ވެރިކަމާ ހަވާލުވެވަޑައިގަތުން ވެގެންދާނީ ބްރެޒިލް ގެ ޒަމާނީވީ ޑިމޮކްރަސީ ކަނާތު ފިޔައަށް ބުރަވުމުގެ ފެށުން ކަމުގައެވެ.
އުމުރުފުޅުން 63 އަހަރުގެ ބޮލްސޮނާރޯއަކީ ކުރީގެ ސަރުކާރުތަކުގެ ސިޔާސަތުތަކަށް ނުރުހިފައި ތިބި އާއްމު ރައްޔިތުންގެ ބޮޑު ތާއީދާއެކު ހޮވިވަޑައިގެންނެވި ބޭފުޅެކެވެ. އެހެންކަމުން، އެމީހުންގެ އުއްމީދުތައް ހާސިލުކޮށްދެއްވުމަށް ބޮޑެތި މަސައްކަތްތަކެއް ކުރައްވަން އޭނާއަށް ޖެހިވަޑައިގަންނަވާނެއެވެ.
ދެކުނު އެމެރިކާގެ އެންމެ ބޮޑު ގައުމު، ބްރެޒިލް މުޅިން އާ މިސްރާބަކަށް ގެންދަވަން ބޮލްސޮނާރޯ ވަނީ ވައުދުވެވަޑައިގެންފައެވެ. ޖަރީމާތައް މަދުކުރެއްވުމަށާއި، ތިމާވެށީގެ ގޮތުން ނާޒުކު ހާލަތެއްގައިވާ އެމޭޒަން ޖަންގަލި ހިމާޔަތްކުރެއްވުމަށް ހަރުކަށި ފިޔަވަޅު އަޅުއްވާނެކަމުގައި އޭނާ ވަނީ ވިދާޅުވެފައެވެ.
ޖައިރް ބޮލްސޮނާރޯއަކީ 1964 އިން 1985 އަށް ބްރެޒިލްގައި އޮތް އަސްކަރީ ވެރިކަމަށް ވަރަށް ތާއީދުކުރައްވާ ބޭފުޅެކެވެ. އޭނާގެ ނާއިބު ރައީސާއީ ބައެއް ވަޒީރުންނަކީ ކުރީގެ އަސްކަރީ އޮފިސަރުންނެވެ.
"ބްރެޒިލް އެގައުމުގެ މަންޒިލަށް ގެންދިއުމަށް ވަރުބަލިކަމެއް ނެތި އަހަރެން މަސައްކަތްކުރާނަން." "ބްރެޒިލްގެ ޑިމޮކްރެސީ އަހަރެން ވަރުގަދަކުރާނަން." ރައީސުކަމުގެ ހުވައިކުރެއްވުމަށް ފަހު ބްރެޒިލްގެ ކޮންގްރެސްއާ މުޚާޠަބުކުރައްވަމުން ބޮލްސޮނާރޯ ވިދާޅުވިއެވެ. އޭނާ ވަނީ "ތަފާތުކުރުމެއް ނެތް މުޖުތަމައެއް ބިނާކުރެއްވުމަށްވެސް ވައުދުވެވަޑައިގެންފައެވެ.
ރައީސުކަމުގެ ހުވައިކުރެއްވުމަށް ފަހު ބޮލްސޮނާރޯ ވަނީ އޭނާއަށް ތާއީދުކުރާ އެތައް ހާސް މީހުންނާ ބައްދަލުކުރައްވާފައެވެ. އަދި ރިޔާސީ ގަނޑުވަރަށް ބަދަލުވެވަޑައިގެންފައެވެ.
